From StotraSamhita

paJcadazO'dhyAyaH

zrIzuka uvAca

UcaturmRtakOpAntE patitaM mRtakOpamam| zOkAbhibhUtaM rAjAnaM bOdhayantau saduktibhiH||1||

kO'yaM syAttava rAjEndra bhavAnyamanuzOcati| tvaM cAsya katamaH sRSTau purEdAnImataH param||2||

yathA prayAnti saMyAnti srOtOvEgEna bAlukAH| saMyujyantE viyujyantE tathA kAlEna dEhinaH||3||

yathA dhAnAsu vai dhAnA bhavanti na bhavanti ca| EvaM bhUtAni bhUtESu cOditAnIzamAyayA||4||

vayaM ca tvaM ca yE cEmE tulyakAlAzcarAcarAH| janmamRtyOryathA pazcAtprAGnaivamadhunApi bhOH||5||

bhUtairbhUtAni bhUtEzaH sRjatyavati hanti ca| AtmasRSTairasvatantrairanapEkSO'pi bAlavat||6||

dEhEna dEhinO rAjandEhAddEhO'bhijAyatE| bIjAdEva yathA bIjaM dEhyartha iva zAzvataH||7||

dEhadEhivibhAgO'yamavivEkakRtaH purA| jAtivyaktivibhAgO'yaM yathA vastuni kalpitaH||8||

zrIzuka uvAca

EvamAzvAsitO rAjA citrakEturdvijOktibhiH| vimRjya pANinA vaktramAdhimlAnamabhASata||9||

zrIrAjOvAca

kau yuvAM jJAnasampannau mahiSThau ca mahIyasAm| avadhUtEna vESENa gUDhAviha samAgatau||10||

caranti hyavanau kAmaM brAhmaNA bhagavatpriyAH| mAdRzAM grAmyabuddhInAM bOdhAyOnmattaliGginaH||11||

kumArO nArada RbhuraGgirA dEvalO'sitaH| apAntaratamA vyAsO mArkaNDEyO'tha gautamaH||12||

vasiSThO bhagavAnrAmaH kapilO bAdarAyaNiH| durvAsA yAjJavalkyazca jAtukarNastathAruNiH||13||

rOmazazcyavanO datta AsuriH sapataJjaliH| RSirvEdazirA dhaumyO muniH paJcazikhastathA||14||

hiraNyanAbhaH kauzalyaH zrutadEva RtadhvajaH| EtE parE ca siddhEzAzcaranti jJAnahEtavaH||15||

tasmAdyuvAM grAmyapazOrmama mUDhadhiyaH prabhU| andhE tamasi magnasya jJAnadIpa udIryatAm||16||

zrIaGgirA uvAca

ahaM tE putrakAmasya putradO'smyaGgirA nRpa| ESa brahmasutaH sAkSAnnAradO bhagavAnRSiH||17||

itthaM tvAM putrazOkEna magnaM tamasi dustarE| atadarhamanusmRtya mahApuruSagOcaram||18||

anugrahAya bhavataH prAptAvAvAmiha prabhO| brahmaNyO bhagavadbhaktO nAvAsAditumarhasi||19||

tadaiva tE paraM jJAnaM dadAmi gRhamAgataH| jJAtvAnyAbhinivEzaM tE putramEva dadAmyaham||20||

adhunA putriNAM tApO bhavataivAnubhUyatE| EvaM dArA gRhA rAyO vividhaizvaryasampadaH||21||

zabdAdayazca viSayAzcalA rAjyavibhUtayaH| mahI rAjyaM balaM kOSO bhRtyAmAtyasuhRjjanAH||22||

sarvE'pi zUrasEnEmE zOkamOhabhayArtidAH| gandharvanagaraprakhyAH svapnamAyAmanOrathAH||23||

dRzyamAnA vinArthEna na dRzyantE manObhavAH| karmabhirdhyAyatO nAnA karmANi manasO'bhavan||24||

ayaM hi dEhinO dEhO dravyajJAnakriyAtmakaH| dEhinO vividhaklEza santApakRdudAhRtaH||25||

tasmAtsvasthEna manasA vimRzya gatimAtmanaH| dvaitE dhruvArthavizrambhaM tyajOpazamamAviza||26||

zrInArada uvAca

EtAM mantrOpaniSadaM pratIccha prayatO mama| yAM dhArayansaptarAtrAddraSTA saGkarSaNaM vibhum||27||

yatpAdamUlamupasRtya narEndra pUrvE zarvAdayO bhramamimaM dvitayaM visRjya sadyastadIyamatulAnadhikaM mahitvaM prApurbhavAnapi paraM na cirAdupaiti||28||

||iti zrImadbhAgavatE mahApurANE pAramahaMsyAM saMhitAyAM SaSThaskandhE paJcadazO'dhyAyaH||

See Also

• http://vedabase.net/sb/6/15/en