bAlamukundASTakam

karAravindEna padAravindaM mukhAravindE vinivEzayantam‌|
vaTasya patrasya puTE zayAnaM bAlaM mukundaM manasA smarAmi||1||

saMhRtya lOkAn vaTapatramadhyE zayAnamAdyantavihInarUpam|
sarvEzvaraM sarvahitAvatAraM bAlaM mukundaM manasA smarAmi||2||

indIvarazyAmalakOmalAGgaM indrAdidEvArcitapAdapadmam‌|
santAnakalpadrumamAzritAnAM bAlaM mukundaM manasA smarAmi||3||

lambAlakaM lambitahArayaSTiM zRGgAralIlAGkitadantapaGktim|
bimbAdharaM cAruvizAlanEtraM bAlaM mukundaM manasA smarAmi||4||

zikyE nidhAyAdyapayOdadhIni bahirgatAyAM vrajanAyikAyAm‌|
bhuktvA yathESTaM kapaTEna suptaM bAlaM mukundaM manasA smarAmi||5||

kalindajAntasthitakAliyasya phaNAgraraGgE naTanapriyantam‌|
tatpucchahastaM zaradinduvaktraM bAlaM mukundaM manasA smarAmi||6||

ulUkhalE baddhamudArazauryaM uttuGgayugmArjuna-bhaGgalIlam‌|
utphullapadmAyata-cArunEtraM bAlaM mukundaM manasA smarAmi||7||

AlOkya mAturmukhamAdarENa stanyaM pibantaM sarasIruhAkSam‌|
saccinmayaM dEvamanantarUpaM bAlaM mukundaM manasA smarAmi||8||

||iti bAlamukundASTakaM sampUrNam‌||

AkuJcitaM jAnu karaM ca vAmaM nyasya kSitau dakSiNahastapadmE|
AlOkayantaM navanItakhaNDaM bAlaM mukundaM manasA smarAmi||