From StotraSamhita

gItArthasaGgrahaH

yatpadAmbhOruhadhyAnavidhvastAzESakalmaSaH| vastutAmupayAtO'haM yAmunEyaM namAmi tam||

svadharmajJAnavairagyasAdhyabhaktyEkagOcaraH| nArAyaNaH paraM brahma gItAzAstrE samIritaH||1||

jJAnakarmAtmikE nESTE yOgalakSyE susaMskRtE| AtmAnubhOtisiddhyarthE pUrvaSaTkEna cOditE||2||

madhyamE bhagavattattvayAthAtmyAvAptisiddhayE| jJAnakarmAbhinirvartyO bhaktiyOgaH prakIrtitaH||3||

pradhAnapuruSavyaktasarvEzvaravivEcanam| karmadhIrbhaktirityAdi pUrvazESO'ntimOditaH||4||

asthAnasnEhakArpaNyadharmAdharmadhiyA''kulam| pArthaM prapannamuddizya zAstrAvataraNaM kRtam||5||

nityAtmAsaGgakarmEhAgOcarA sAGkhyayOgadhIH| dvitIyE sthitadhIlakSA prOktA tanmOhazAntayE||6||

asaktyA lOkarakSAyai guNESvArOpya kartRtAm| sarvEzvarE vA nyasyOktA tRtIyE karmakAryatA||7||

prasaGgAt svasvabhAvOktiH karmaNO'karmatA'sya ca| bhEdA jJAnasya mAhatmyaM caturthAdhyAya ucyatE||8||

karmayOgasya saukaryaM zaighryaM kAzcana tadvidhAH| brahmajJAnaprakArazca paJcamAdhyAya ucyatE||9||

yOgAbhyAsavidhiryOgI caturdhA yOgasAdhanam| yOgasiddhiH svayOgasya pAramyaM SaSTa ucyatE||10||

svayAthAtmyaM prakRtyAsya tirOdhiH zaraNAgatiH| bhaktabhEdaH prabuddhasya zraiSThyaM saptama ucyatE||11||

aizvaryAkSarayAthAtmyabhagavaccaraNArthinAm| vEdyOpAdEyabhAvAnAmaSTamE bhEda ucyatE||12||

svamAhAtmyaM manuSyatvE paratvaM ca mahAtmanAm| vizESO navamE yOgO bhaktirUpaH prakIrtitaH||13||

svakalyANaguNAnantyakRtsnasvAdhInatAmatiH| bhaktyutpattivivRddhyarthA vistIrNA dazamOditA||14||

EkAdazE svayAthAtmyasAkSAtkArAvalOkanam| dattamuktaM vidiprAptyOrbhaktyEkOpAyatA tathA||15||

bhaktEH zraiSThyamupAyOktirazaktasya''tmaniSThatA| tatprakArastvatiprItiH bhaktErdvAdaza ucyatE||16||

dEhasvarUpamAtmAptihEturAtmavizOdhanam| bandhahEturvivEkazca trayOdaza udIryatE||17||

guNabandhavidhA tESAM kartRtvaM tannivartanam| gatitrayasvamUlatvaM caturdaza udIryatE||18||

acinmizrAdvizuddhAcca cEtanAt puruSOttamaH| vyApanAdbharaNAt svAmyAdanyaH paJcadazOditaH||19||

dEvAsuravibhAgOktipUrvikA zAstravazyatA| tattvAnuSThAnavijJAnasthEmnE SODaza ucyatE||20||

azAstramAsuraM kRtsnaM zAstrIyaM guNataH pRthak| lakSaNaM zAstrasiddhasya tridhA saptadazOditam||21||

IzvarE kartRtAbuddhiH sattvOpAdEyatA'ntimE| svakarmapariNAmazca zAstrasArArtha ucyatE||22||

karmayOgastapastIrthadAnayajJAdisEvanam| jJAnayOgO jitasvAntaiH parizuddhAtmani sthitiH||23||

bhaktiyOgaH paraikAntaprItyA dhyAnAdiSu sthitiH| trayANAmapi yOgAnAM tribhiranyOnyasaGgamaH||24||

nityanaimittikAnAM ca parArAdhanarUpiNAm| AtmadRSTEsrayO'pyEtE yOgadvArENa sAdhakAH||25||

nirastanikhilAjJAnO dRSTvA''tmAnaM parAnugam| pratilabhya parAM bhaktiM tayaiva''pnOti tatpadam||26||

bhaktiyOgastadarthI cEt samagraizvaryasAdhakaH| AtmArthI cEt trayO'pyEtE tatkaivalyasya sAdhakAH||27||

EkAntyaM bhagavatyESAM samAnamadhikAriNAm| yAvatprApti parArthI cEt tadEvAtyantamaznutE||28||

jJAnI tu paramaikantI tadAyattatmajIvanaH| tatsaMzlESaviyOgaikasukhaduHkhastadEkadhIH||29||

bhagavaddhyAnayOgOktivandanastutikIrtanaiH| labdhAtmA tadgataprANamanObuddhIndriyakriyaH||30||

nijakarmAdi bhaktyantaM kuryAt prItyaiva kAritaH| upAyatAM parityajya nyasyEddEvE tu tAmabhIH||31||

EkAntAtyantadAsyaikaratistatpadamApnuyAt| tatpradhAnamidaM zAstramiti gItArthasaGgrahaH||32||

||iti zrI yAmunAcAryaviracitaM gItarthasaGgrahaH sampUrNaH||