From StotraSamhita
< Bhagavatam | Skandha 01
aSTamO'dhyAyaH
sUta uvAca
atha tE samparEtAnAM svAnAmudakamicchatAm| dAtuM sakRSNA gaGgAyAM puraskRtya yayuH striyaH||1|| |
tE ninIyOdakaM sarvE vilapya ca bhRzaM punaH| AplutA haripAdAbjarajaHpUtasarijjalE||2|| |
tatrAsInaM kurupatiM dhRtarASTraM sahAnujam| gAndhArIM putrazOkArtAM pRthAM kRSNAM ca mAdhavaH||3|| |
sAntvayAmAsa munibhirhatabandhUJzucArpitAn| bhUtESu kAlasya gatiM darzayanna pratikriyAm||4|| |
sAdhayitvAjAtazatrOH svaM rAjyaM kitavairhRtam| ghAtayitvAsatO rAjJaH kacasparzakSatAyuSaH||5|| |
yAjayitvAzvamEdhaistaM tribhiruttamakalpakaiH| tadyazaH pAvanaM dikSu zatamanyOrivAtanOt||6|| |
Amantrya pANDuputrAMzca zainEyOddhavasaMyutaH| dvaipAyanAdibhirvipraiH pUjitaiH pratipUjitaH||7|| |
gantuM kRtamatirbrahmandvArakAM rathamAsthitaH| upalEbhE'bhidhAvantImuttarAM bhayavihvalAm||8|| |
uttarOvAca
pAhi pAhi mahAyOgindEvadEva jagatpatE| nAnyaM tvadabhayaM pazyE yatra mRtyuH parasparam||9|| |
abhidravati mAmIza zarastaptAyasO vibhO| kAmaM dahatu mAM nAtha mA mE garbhO nipAtyatAm||10|| |
sUta uvAca
upadhArya vacastasyA bhagavAnbhaktavatsalaH| apANDavamidaM kartuM drauNErastramabudhyata||11|| |
tarhyEvAtha munizrESTha pANDavAH paJca sAyakAn| AtmanO'bhimukhAndIptAnAlakSyAstrANyupAdaduH||12|| |
vyasanaM vIkSya tattESAmananyaviSayAtmanAm| sudarzanEna svAstrENa svAnAM rakSAM vyadhAdvibhuH||13|| |
antaHsthaH sarvabhUtAnAmAtmA yOgEzvarO hariH| svamAyayAvRNOdgarbhaM vairATyAH kurutantavE||14|| |
yadyapyastraM brahmazirastvamOghaM cApratikriyam| vaiSNavaM tEja AsAdya samazAmyadbhRgUdvaha||15|| |
mA maMsthA hyEtadAzcaryaM sarvAzcaryamayE JcyutE| ya idaM mAyayA dEvyA sRjatyavati hantyajaH||16|| |
brahmatEjOvinirmuktairAtmajaiH saha kRSNayA| prayANAbhimukhaM kRSNamidamAha pRthA satI||17|| |
kuntyuvAca
namasyE puruSaM tvAdyamIzvaraM prakRtEH param| alakSyaM sarvabhUtAnAmantarbahiravasthitam||18|| |
mAyAjavanikAcchannamajJAdhOkSajamavyayam| na lakSyasE mUDhadRzA naTO nATyadharO yathA||19|| |
tathA paramahaMsAnAM munInAmamalAtmanAm| bhaktiyOgavidhAnArthaM kathaM pazyEma hi striyaH||20|| |
kRSNAya vAsudEvAya dEvakInandanAya ca| nandagOpakumArAya gOvindAya namO namaH||21|| |
namaH paGkajanAbhAya namaH paGkajamAlinE| namaH paGkajanEtrAya namastE paGkajAGghrayE||22|| |
yathA hRSIkEza khalEna dEvakI kaMsEna ruddhAticiraM zucArpitA| vimOcitAhaM ca sahAtmajA vibhO tvayaiva nAthEna muhurvipadgaNAt||23|| |
viSAnmahAgnEH puruSAdadarzanAdasatsabhAyA vanavAsakRcchrataH| mRdhE mRdhE'nEkamahArathAstratO drauNyastratazcAsma harE'bhirakSitAH||24|| |
vipadaH santu tAH zazvattatra tatra jagadgurO| bhavatO darzanaM yatsyAdapunarbhavadarzanam||25|| |
janmaizvaryazrutazrIbhirEdhamAnamadaH pumAn| naivArhatyabhidhAtuM vai tvAmakiJcanagOcaram||26|| |
namO'kiJcanavittAya nivRttaguNavRttayE| AtmArAmAya zAntAya kaivalyapatayE namaH||27|| |
manyE tvAM kAlamIzAnamanAdinidhanaM vibhum| samaM carantaM sarvatra bhUtAnAM yanmithaH kaliH||28|| |
na vEda kazcidbhagavaMzcikIrSitaM tavEhamAnasya nRNAM viDambanam| na yasya kazciddayitO'sti karhiciddvESyazca yasminviSamA matirnRNAm||29|| |
janma karma ca vizvAtmannajasyAkarturAtmanaH| tiryaGnRRSiSu yAdaHsu tadatyantaviDambanam||30|| |
gOpyAdadE tvayi kRtAgasi dAma tAvadyA tE dazAzrukalilAJjanasambhramAkSam| vaktraM ninIya bhayabhAvanayA sthitasya sA mAM vimOhayati bhIrapi yadbibhEti||31|| |
kEcidAhurajaM jAtaM puNyazlOkasya kIrtayE| yadOH priyasyAnvavAyE malayasyEva candanam||32|| |
aparE vasudEvasya dEvakyAM yAcitO'bhyagAt| ajastvamasya kSEmAya vadhAya ca suradviSAm||33|| |
bhArAvatAraNAyAnyE bhuvO nAva ivOdadhau| sIdantyA bhUribhArENa jAtO hyAtmabhuvArthitaH||34|| |
bhavE'sminklizyamAnAnAmavidyAkAmakarmabhiH| zravaNasmaraNArhANi kariSyanniti kEcana||35|| |
zRNvanti gAyanti gRNantyabhIkSNazaH smaranti nandanti tavEhitaM janAH| ta Eva pazyantyacirENa tAvakaM bhavapravAhOparamaM padAmbujam||36|| |
apyadya nastvaM svakRtEhita prabhO jihAsasi svitsuhRdO'nujIvinaH| yESAM na cAnyadbhavataH padAmbujAtparAyaNaM rAjasu yOjitAMhasAm||37|| |
kE vayaM nAmarUpAbhyAM yadubhiH saha pANDavAH| bhavatO'darzanaM yarhi hRSIkANAmivEzituH||38|| |
nEyaM zObhiSyatE tatra yathEdAnIM gadAdhara| tvatpadairaGkitA bhAti svalakSaNavilakSitaiH||39|| |
imE janapadAH svRddhAH supakvauSadhivIrudhaH| vanAdrinadyudanvantO hyEdhantE tava vIkSitaiH||40|| |
atha vizvEza vizvAtmanvizvamUrtE svakESu mE| snEhapAzamimaM chindhi dRDhaM pANDuSu vRSNiSu||41|| |
tvayi mE'nanyaviSayA matirmadhupatE'sakRt| ratimudvahatAdaddhA gaGgEvaughamudanvati||42|| |
zrIkRSNa kRSNasakha vRSNyRSabhAvanidhrugrAjanyavaMzadahanAnapavargavIrya| gOvinda gOdvijasurArtiharAvatAra yOgEzvarAkhilagurO bhagavannamastE||43|| |
sUta uvAca
pRthayEtthaM kalapadaiH pariNUtAkhilOdayaH| mandaM jahAsa vaikuNThO mOhayanniva mAyayA||44|| |
tAM bADhamityupAmantrya pravizya gajasAhvayam| striyazca svapuraM yAsyanprEmNA rAjJA nivAritaH||45|| |
vyAsAdyairIzvarEhAjJaiH kRSNEnAdbhutakarmaNA| prabOdhitO'pItihAsairnAbudhyata zucArpitaH||46|| |
Aha rAjA dharmasutazcintayansuhRdAM vadham| prAkRtEnAtmanA viprAH snEhamOhavazaM gataH||47|| |
ahO mE pazyatAjJAnaM hRdi rUDhaM durAtmanaH| pArakyasyaiva dEhasya bahvyO mE'kSauhiNIrhatAH||48|| |
bAladvijasuhRnmitra pitRbhrAtRgurudruhaH| na mE syAnnirayAnmOkSO hyapi varSAyutAyutaiH||49|| |
nainO rAjJaH prajAbharturdharmayuddhE vadhO dviSAm| iti mE na tu bOdhAya kalpatE zAsanaM vacaH||50|| |
strINAM maddhatabandhUnAM drOhO yO'sAvihOtthitaH| karmabhirgRhamEdhIyairnAhaM kalpO vyapOhitum||51|| |
yathA paGkEna paGkAmbhaH surayA vA surAkRtam bhUtahatyAM tathaivaikAM na yajJairmArSTumarhati||52|| |
||iti zrImadbhAgavatE mahApurANE pAramahaMsyAM saMhitAyAM prathamaskandhE aSTamO'dhyAyaH||