From StotraSamhita

saptadazO'dhyAyaH

sUta uvAca

tatra gOmithunaM rAjA hanyamAnamanAthavat| daNDahastaM ca vRSalaM dadRzE nRpalAJchanam||1||

vRSaM mRNAladhavalaM mEhantamiva bibhyatam| vEpamAnaM padaikEna sIdantaM zUdratADitam||2||

gAM ca dharmadughAM dInAM bhRzaM zUdrapadAhatAm| vivatsAmAzruvadanAM kSAmAM yavasamicchatIm||3||

papraccha rathamArUDhaH kArtasvaraparicchadam| mEghagambhIrayA vAcA samArOpitakArmukaH||4||

kastvaM maccharaNE lOkE balAddhaMsyabalAnbalI| naradEvO'si vESENa naTavatkarmaNAdvijaH||5||

yastvaM kRSNE gatE dUraM sahagANDIvadhanvanA| zOcyO'syazOcyAnrahasi praharanvadhamarhasi||6||

tvaM vA mRNAladhavalaH pAdairnyUnaH padA caran| vRSarUpENa kiM kazciddEvO naH parikhEdayan||7||

na jAtu kauravEndrANAM dOrdaNDaparirambhitE| bhUtalE'nupatantyasminvinA tE prANinAM zucaH||8||

mA saurabhEyAtra zucO vyEtu tE vRSalAdbhayam| mA rOdIramba bhadraM tE khalAnAM mayi zAstari||9||

yasya rASTrE prajAH sarvAstrasyantE sAdhvyasAdhubhiH| tasya mattasya nazyanti kIrtirAyurbhagO gatiH||10||

ESa rAjJAM parO dharmO hyArtAnAmArtinigrahaH| ata EnaM vadhiSyAmi bhUtadruhamasattamam||11||

kO'vRzcattava pAdAMstrInsaurabhEya catuSpada| mA bhUvaMstvAdRzA rASTrE rAjJAM kRSNAnuvartinAm||12||

AkhyAhi vRSa bhadraM vaH sAdhUnAmakRtAgasAm| AtmavairUpyakartAraM pArthAnAM kIrtidUSaNam||13||

janE'nAgasyaghaM yuJjansarvatO'sya ca madbhayam| sAdhUnAM bhadramEva syAdasAdhudamanE kRtE||14||

anAgaHsviha bhUtESu ya AgaskRnniraGkuzaH| AhartAsmi bhujaM sAkSAdamartyasyApi sAGgadam||15||

rAjJO hi paramO dharmaH svadharmasthAnupAlanam| zAsatO'nyAnyathAzAstramanApadyutpathAniha||16||

dharma uvAca

EtadvaH pANDavEyAnAM yuktamArtAbhayaM vacaH| yESAM guNagaNaiH kRSNO dautyAdau bhagavAnkRtaH||17||

na vayaM klEzabIjAni yataH syuH puruSarSabha| puruSaM taM vijAnImO vAkyabhEdavimOhitAH||18||

kEcidvikalpavasanA AhurAtmAnamAtmanaH| daivamanyE'parE karma svabhAvamaparE prabhum||19||

apratarkyAdanirdEzyAditi kESvapi nizcayaH| atrAnurUpaM rAjarSE vimRza svamanISayA||20||

sUta uvAca

EvaM dharmE pravadati sa samrADdvijasattamAH| samAhitEna manasA vikhEdaH paryacaSTa tam||21||

rAjOvAca

dharmaM bravISi dharmajJa dharmO'si vRSarUpadhRk| yadadharmakRtaH sthAnaM sUcakasyApi tadbhavEt||22||

athavA dEvamAyAyA nUnaM gatiragOcarA| cEtasO vacasazcApi bhUtAnAmiti nizcayaH||23||

tapaH zaucaM dayA satyamiti pAdAH kRtE kRtAH| adharmAMzaistrayO bhagnAH smayasaGgamadaistava||24||

idAnIM dharma pAdastE satyaM nirvartayEdyataH| taM jighRkSatyadharmO'yamanRtEnaidhitaH kaliH||25||

iyaM ca bhUmirbhagavatA nyAsitOrubharA satI| zrImadbhistatpadanyAsaiH sarvataH kRtakautukA||26||

zOcatyazrukalA sAdhvI durbhagEvOjjhitA satI| abrahmaNyA nRpavyAjAH zUdrA bhOkSyanti mAmiti||27||

iti dharmaM mahIM caiva sAntvayitvA mahArathaH| nizAtamAdadE khaDgaM kalayE'dharmahEtavE||28||

taM jighAMsumabhiprEtya vihAya nRpalAJchanam| tatpAdamUlaM zirasA samagAdbhayavihvalaH||29||

patitaM pAdayOrvIraH kRpayA dInavatsalaH| zaraNyO nAvadhIcchlOkya Aha cEdaM hasanniva||30||

rAjOvAca

na tE guDAkEzayazOdharANAM baddhAJjalErvai bhayamasti kiJcit| na vartitavyaM bhavatA kathaJcana kSEtrE madIyE tvamadharmabandhuH||31||

tvAM vartamAnaM naradEvadEhESvanupravRttO'yamadharmapUgaH| lObhO'nRtaM cauryamanAryamaMhO jyESThA ca mAyA kalahazca dambhaH||32||

na vartitavyaM tadadharmabandhO dharmENa satyEna ca vartitavyE| brahmAvartE yatra yajanti yajJairyajJEzvaraM yajJavitAnavijJAH||33||

yasminharirbhagavAnijyamAna ijyAtmamUrtiryajatAM zaM tanOti| kAmAnamOghAnsthirajaGgamAnAmantarbahirvAyurivaiSa AtmA||34||

sUta uvAca

parIkSitaivamAdiSTaH sa kalirjAtavEpathuH| tamudyatAsimAhEdaM daNDapANimivOdyatam||35||

kaliruvAca

yatra kva vAtha vatsyAmi sArvabhauma tavAjJayA| lakSayE tatra tatrApi tvAmAttESuzarAsanam||36||

tanmE dharmabhRtAM zrESTha sthAnaM nirdESTumarhasi| yatraiva niyatO vatsya AtiSThaMstE'nuzAsanam||37||

sUta uvAca

abhyarthitastadA tasmai sthAnAni kalayE dadau| dyUtaM pAnaM striyaH sUnA yatrAdharmazcaturvidhaH||38||

punazca yAcamAnAya jAtarUpamadAtprabhuH| tatO'nRtaM madaM kAmaM rajO vairaM ca paJcamam||39||

amUni paJca sthAnAni hyadharmaprabhavaH kaliH| auttarEyENa dattAni nyavasattannidEzakRt||40||

athaitAni na sEvEta bubhUSuH puruSaH kvacit| vizESatO dharmazIlO rAjA lOkapatirguruH||41||

vRSasya naSTAMstrInpAdAntapaH zaucaM dayAmiti| pratisandadha AzvAsya mahIM ca samavardhayat||42||

sa ESa EtarhyadhyAsta AsanaM pArthivOcitam| pitAmahEnOpanyastaM rAjJAraNyaM vivikSatA||43||

AstE'dhunA sa rAjarSiH kauravEndrazriyOllasan| gajAhvayE mahAbhAgazcakravartI bRhacchravAH||44||

itthambhUtAnubhAvO'yamabhimanyusutO nRpaH yasya pAlayataH kSauNIM yUyaM satrAya dIkSitAH||45||

||iti zrImadbhAgavatE mahApurANE pAramahaMsyAM saMhitAyAM prathamaskandhE saptadazO'dhyAyaH||

See Also

• http://vedabase.net/sb/1/17/en