From StotraSamhita
< Bhagavatam | Skandha 02
prathamO'dhyAyaH
zrIzuka uvAca
varIyAnESa tE praznaH kRtO lOkahitaM nRpa| AtmavitsammataH puMsAM zrOtavyAdiSu yaH paraH||1|| |
zrOtavyAdIni rAjEndra nRNAM santi sahasrazaH| apazyatAmAtmatattvaM gRhESu gRhamEdhinAm||2|| |
nidrayA hriyatE naktaM vyavAyEna ca vA vayaH| divA cArthEhayA rAjankuTumbabharaNEna vA||3|| |
dEhApatyakalatrAdiSvAtmasainyESvasatsvapi| tESAM pramattO nidhanaM pazyannapi na pazyati||4|| |
tasmAdbhArata sarvAtmA bhagavAnIzvarO hariH| zrOtavyaH kIrtitavyazca smartavyazcEcchatAbhayam||5|| |
EtAvAnsAGkhyayOgAbhyAM svadharmapariniSThayA| janmalAbhaH paraH puMsAmantE nArAyaNasmRtiH||6|| |
prAyENa munayO rAjannivRttA vidhiSEdhataH| nairguNyasthA ramantE sma guNAnukathanE harEH||7|| |
idaM bhAgavataM nAma purANaM brahmasammitam| adhItavAndvAparAdau piturdvaipAyanAdaham||8|| |
pariniSThitO'pi nairguNya uttamazlOkalIlayA| gRhItacEtA rAjarSE AkhyAnaM yadadhItavAn||9|| |
tadahaM tE'bhidhAsyAmi mahApauruSikO bhavAn| yasya zraddadhatAmAzu syAnmukundE matiH satI||10|| |
EtannirvidyamAnAnAmicchatAmakutObhayam| yOginAM nRpa nirNItaM harErnAmAnukIrtanam||11|| |
kiM pramattasya bahubhiH parOkSairhAyanairiha| varaM muhUrtaM viditaM ghaTatE zrEyasE yataH||12|| |
khaTvAGgO nAma rAjarSirjJAtvEyattAmihAyuSaH| muhUrtAtsarvamutsRjya gatavAnabhayaM harim||13|| |
tavApyEtarhi kauravya saptAhaM jIvitAvadhiH| upakalpaya tatsarvaM tAvadyatsAmparAyikam||14|| |
antakAlE tu puruSa AgatE gatasAdhvasaH| chindyAdasaGgazastrENa spRhAM dEhE'nu yE ca tam||15|| |
gRhAtpravrajitO dhIraH puNyatIrthajalAplutaH| zucau vivikta AsInO vidhivatkalpitAsanE||16|| |
abhyasEnmanasA zuddhaM trivRdbrahmAkSaraM param| manO yacchEjjitazvAsO brahmabIjamavismaran||17|| |
niyacchEdviSayEbhyO'kSAnmanasA buddhisArathiH| manaH karmabhirAkSiptaM zubhArthE dhArayEddhiyA||18|| |
tatraikAvayavaM dhyAyEdavyucchinnEna cEtasA manO nirviSayaM yuktvA tataH kiJcana na smarEt padaM tatparamaM viSNOrmanO yatra prasIdati||19|| |
rajastamObhyAmAkSiptaM vimUDhaM mana AtmanaH| yacchEddhAraNayA dhIrO hanti yA tatkRtaM malam||20|| |
yasyAM sandhAryamANAyAM yOginO bhaktilakSaNaH| Azu sampadyatE yOga AzrayaM bhadramIkSataH||21|| |
rAjOvAca
yathA sandhAryatE brahmandhAraNA yatra sammatA| yAdRzI vA harEdAzu puruSasya manOmalam||22|| |
zrIzuka uvAca
jitAsanO jitazvAsO jitasaGgO jitEndriyaH| sthUlE bhagavatO rUpE manaH sandhArayEddhiyA||23|| |
vizESastasya dEhO'yaM sthaviSThazca sthavIyasAm| yatrEdaM vyajyatE vizvaM bhUtaM bhavyaM bhavacca sat||24|| |
aNDakOzE zarIrE'sminsaptAvaraNasaMyutE| vairAjaH puruSO yO'sau bhagavAndhAraNAzrayaH||25|| |
pAtAlamEtasya hi pAdamUlaM paThanti pArSNiprapadE rasAtalam| mahAtalaM vizvasRjO'tha gulphau talAtalaM vai puruSasya jaGghE||26|| |
dvE jAnunI sutalaM vizvamUrtErUrudvayaM vitalaM cAtalaM ca| mahItalaM tajjaghanaM mahIpatE nabhastalaM nAbhisarO gRNanti||27|| |
uraHsthalaM jyOtiranIkamasya grIvA maharvadanaM vai janO'sya| tapO varATIM vidurAdipuMsaH satyaM tu zIrSANi sahasrazIrSNaH||28|| |
indrAdayO bAhava AhurusrAH karNau dizaH zrOtramamuSya zabdaH| nAsatyadasrau paramasya nAsE ghrANO'sya gandhO mukhamagniriddhaH||29|| |
dyaurakSiNI cakSurabhUtpataGgaH pakSmANi viSNOrahanI ubhE ca| tadbhrUvijRmbhaH paramESThidhiSNyamApO'sya tAlU rasa Eva jihvA||30|| |
chandAMsyanantasya zirO gRNanti daMSTrA yamaH snEhakalA dvijAni| hAsO janOnmAdakarI ca mAyA durantasargO yadapAGgamOkSaH||31|| |
vrIDOttarauSThO'dhara Eva lObhO dharmaH stanO'dharmapathO'sya pRSTham| kastasya mEDhraM vRSaNau ca mitrau kukSiH samudrA girayO'sthisaGghAH||32|| |
nADyO'sya nadyO'tha tanUruhANi mahIruhA vizvatanOrnRpEndra| anantavIryaH zvasitaM mAtarizvA gatirvayaH karma guNapravAhaH||33|| |
Izasya kEzAnvidurambuvAhAnvAsastu sandhyAM kuruvarya bhUmnaH| avyaktamAhurhRdayaM manazcasa candramAH sarvavikArakOzaH||34|| |
vijJAnazaktiM mahimAmananti sarvAtmanO'ntaHkaraNaM giritram| azvAzvataryuSTragajA nakhAni sarvE mRgAH pazavaH zrONidEzE||35|| |
vayAMsi tadvyAkaraNaM vicitraM manurmanISA manujO nivAsaH| gandharvavidyAdharacAraNApsaraH svarasmRtIrasurAnIkavIryaH||36|| |
brahmAnanaM kSatrabhujO mahAtmA viDUruraGghrizritakRSNavarNaH| nAnAbhidhAbhIjyagaNOpapannO dravyAtmakaH karma vitAnayOgaH||37|| |
iyAnasAvIzvaravigrahasya yaH sannivEzaH kathitO mayA tE| sandhAryatE'sminvapuSi sthaviSThE manaH svabuddhyA na yatO'sti kiJcit||38|| |
sa sarvadhIvRttyanubhUtasarva AtmA yathA svapnajanEkSitaikaH taM satyamAnandanidhiM bhajEta nAnyatra sajjEdyata AtmapAtaH||39|| |
||iti zrImadbhAgavatE mahApurANE pAramahaMsyAM saMhitAyAM dwitIyaskandhE prathamO'dhyAyaH||