From StotraSamhita
< Bhagavatam | Skandha 04
caturviMzO'dhyAyaH
maitrEya uvAca
vijitAzvO'dhirAjAsItpRthuputraH pRthuzravAH| yavIyObhyO'dadAtkASThA bhrAtRbhyO bhrAtRvatsalaH||1|| |
haryakSAyAdizatprAcIM dhUmrakEzAya dakSiNAm| pratIcIM vRkasaMjJAya turyAM draviNasE vibhuH||2|| |
antardhAnagatiM zakrAllabdhvAntardhAnasaMjJitaH| apatyatrayamAdhatta zikhaNDinyAM susammatam||3|| |
pAvakaH pavamAnazca zucirityagnayaH purA| vasiSThazApAdutpannAH punaryOgagatiM gatAH||4|| |
antardhAnO nabhasvatyAM havirdhAnamavindata| ya indramazvahartAraM vidvAnapi na jaghnivAn||5|| |
rAjJAM vRttiM karAdAna daNDazulkAdidAruNAm| manyamAnO dIrghasattra vyAjEna visasarja ha||6|| |
tatrApi haMsaM puruSaM paramAtmAnamAtmadRk| yajaMstallOkatAmApa kuzalEna samAdhinA||7|| |
havirdhAnAddhavirdhAnI vidurAsUta SaTsutAn| barhiSadaM gayaM zuklaM kRSNaM satyaM jitavratam||8|| |
barhiSatsumahAbhAgO hAvirdhAniH prajApatiH| kriyAkANDESu niSNAtO yOgESu ca kurUdvaha||9|| |
yasyEdaM dEvayajanamanuyajJaM vitanvataH| prAcInAgraiH kuzairAsIdAstRtaM vasudhAtalam||10|| |
sAmudrIM dEvadEvOktAmupayEmE zatadrutim yAM vIkSya cArusarvAGgIM kizOrIM suSThvalaGkRtAm parikramantImudvAhE cakamE'gniH zukImiva||11|| |
vibudhAsuragandharva munisiddhanarOragAH| vijitAH sUryayA dikSu kvaNayantyaiva nUpuraiH||12|| |
prAcInabarhiSaH putrAH zatadrutyAM dazAbhavan| tulyanAmavratAH sarvE dharmasnAtAH pracEtasaH||13|| |
pitrAdiSTAH prajAsargE tapasE'rNavamAvizan| dazavarSasahasrANi tapasArcaMstapaspatim||14|| |
yaduktaM pathi dRSTEna girizEna prasIdatA| taddhyAyantO japantazca pUjayantazca saMyatAH||15|| |
vidura uvAca
pracEtasAM giritrENa yathAsItpathi saGgamaH| yadutAha haraH prItastannO brahmanvadArthavat||16|| |
saGgamaH khalu viprarSE zivEnEha zarIriNAm| durlabhO munayO dadhyurasaGgAdyamabhIpsitam||17|| |
AtmArAmO'pi yastvasya lOkakalpasya rAdhasE| zaktyA yuktO vicarati ghOrayA bhagavAnbhavaH||18|| |
maitrEya uvAca
pracEtasaH piturvAkyaM zirasAdAya sAdhavaH| dizaM pratIcIM prayayustapasyAdRtacEtasaH||19|| |
sasamudramupa vistIrNamapazyansumahatsaraH| mahanmana iva svacchaM prasannasalilAzayam||20|| |
nIlaraktOtpalAmbhOja kahlArEndIvarAkaram| haMsasArasacakrAhva kAraNDavanikUjitam||21|| |
mattabhramarasausvarya hRSTarOmalatAGghripam| padmakOzarajO dikSu vikSipatpavanOtsavam||22|| |
tatra gAndharvamAkarNya divyamArgamanOharam| visismyU rAjaputrAstE mRdaGgapaNavAdyanu||23|| |
tarhyEva sarasastasmAnniSkrAmantaM sahAnugam| upagIyamAnamamara pravaraM vibudhAnugaiH||24|| |
taptahEmanikAyAbhaM zitikaNThaM trilOcanam| prasAdasumukhaM vIkSya praNEmurjAtakautukAH||25|| |
sa tAnprapannArtiharO bhagavAndharmavatsalaH| dharmajJAnzIlasampannAnprItaH prItAnuvAca ha||26|| |
zrIrudra uvAca
yUyaM vEdiSadaH putrA viditaM vazcikIrSitam| anugrahAya bhadraM va EvaM mE darzanaM kRtam||27|| |
yaH paraM raMhasaH sAkSAttriguNAjjIvasaMjJitAt| bhagavantaM vAsudEvaM prapannaH sa priyO hi mE||28|| |
svadharmaniSThaH zatajanmabhiH pumAnviriJcatAmEti tataH paraM hi mAm| avyAkRtaM bhAgavatO'tha vaiSNavaM padaM yathAhaM vibudhAH kalAtyayE||29|| |
atha bhAgavatA yUyaM priyAH stha bhagavAnyathA| na madbhAgavatAnAM ca prEyAnanyO'sti karhicit||30|| |
idaM viviktaM japtavyaM pavitraM maGgalaM param| niHzrEyasakaraM cApi zrUyatAM tadvadAmi vaH||31|| |
maitrEya uvAca
ityanukrOzahRdayO bhagavAnAha tAJchivaH| baddhAJjalInrAjaputrAnnArAyaNaparO vacaH||32|| |
zrIrudra uvAca
jitaM ta Atmavidvarya svastayE svastirastu mE| bhavatArAdhasA rAddhaM sarvasmA AtmanE namaH||33|| |
namaH paGkajanAbhAya bhUtasUkSmEndriyAtmanE| vAsudEvAya zAntAya kUTasthAya svarOciSE||34|| |
saGkarSaNAya sUkSmAya durantAyAntakAya ca| namO vizvaprabOdhAya pradyumnAyAntarAtmanE||35|| |
namO namO'niruddhAya hRSIkEzEndriyAtmanE| namaH paramahaMsAya pUrNAya nibhRtAtmanE||36|| |
svargApavargadvArAya nityaM zuciSadE namaH| namO hiraNyavIryAya cAturhOtrAya tantavE||37|| |
nama Urja iSE trayyAH patayE yajJarEtasE| tRptidAya ca jIvAnAM namaH sarvarasAtmanE||38|| |
sarvasattvAtmadEhAya vizESAya sthavIyasE| namastrailOkyapAlAya saha OjObalAya ca||39|| |
arthaliGgAya nabhasE namO'ntarbahirAtmanE| namaH puNyAya lOkAya amuSmai bhUrivarcasE||40|| |
pravRttAya nivRttAya pitRdEvAya karmaNE| namO'dharmavipAkAya mRtyavE duHkhadAya ca||41|| |
namasta AziSAmIza manavE kAraNAtmanE namO dharmAya bRhatE kRSNAyAkuNThamEdhasE puruSAya purANAya sAGkhyayOgEzvarAya ca||42|| |
zaktitrayasamEtAya mIDhuSE'haGkRtAtmanE| cEtaAkUtirUpAya namO vAcO vibhUtayE||43|| |
darzanaM nO didRkSUNAM dEhi bhAgavatArcitam| rUpaM priyatamaM svAnAM sarvEndriyaguNAJjanam||44|| |
snigdhaprAvRDghanazyAmaM sarvasaundaryasaGgraham| cArvAyatacaturbAhu sujAtarucirAnanam||45|| |
padmakOzapalAzAkSaM sundarabhru sunAsikam| sudvijaM sukapOlAsyaM samakarNavibhUSaNam||46|| |
prItiprahasitApAGgamalakai rUpazObhitam| lasatpaGkajakiJjalka dukUlaM mRSTakuNDalam||47|| |
sphuratkirITavalaya hAranUpuramEkhalam| zaGkhacakragadApadma mAlAmaNyuttamarddhimat||48|| |
siMhaskandhatviSO bibhratsaubhagagrIvakaustubham| zriyAnapAyinyA kSipta nikaSAzmOrasOllasat||49|| |
pUrarEcakasaMvigna valivalgudalOdaram| pratisaGkrAmayadvizvaM nAbhyAvartagabhIrayA||50|| |
zyAmazrONyadhirOciSNu dukUlasvarNamEkhalam| samacArvaGghrijaGghOru nimnajAnusudarzanam||51|| |
padA zaratpadmapalAzarOciSA nakhadyubhirnO'ntaraghaM vidhunvatA| pradarzaya svIyamapAstasAdhvasaM padaM gurO mArgagurustamOjuSAm||52|| |
EtadrUpamanudhyEyamAtmazuddhimabhIpsatAm| yadbhaktiyOgO'bhayadaH svadharmamanutiSThatAm||53|| |
bhavAnbhaktimatA labhyO durlabhaH sarvadEhinAm| svArAjyasyApyabhimata EkAntEnAtmavidgatiH||54|| |
taM durArAdhyamArAdhya satAmapi durApayA| EkAntabhaktyA kO vAJchEtpAdamUlaM vinA bahiH||55|| |
yatra nirviSTamaraNaM kRtAntO nAbhimanyatE| vizvaM vidhvaMsayanvIrya zauryavisphUrjitabhruvA||56|| |
kSaNArdhEnApi tulayE na svargaM nApunarbhavam| bhagavatsaGgisaGgasya martyAnAM kimutAziSaH||57|| |
athAnaghAGghrEstava kIrtitIrthayOrantarbahiHsnAnavidhUtapApmanAm| bhUtESvanukrOzasusattvazIlinAM syAtsaGgamO'nugraha ESa nastava||58|| |
na yasya cittaM bahirarthavibhramaM tamOguhAyAM ca vizuddhamAvizat| yadbhaktiyOgAnugRhItamaJjasA munirvicaSTE nanu tatra tE gatim||59|| |
yatrEdaM vyajyatE vizvaM vizvasminnavabhAti yat| tattvaM brahma paraM jyOtirAkAzamiva vistRtam||60|| |
yO mAyayEdaM pururUpayAsRjadbibharti bhUyaH kSapayatyavikriyaH| yadbhEdabuddhiH sadivAtmaduHsthayA tvamAtmatantraM bhagavanpratImahi||61|| |
kriyAkalApairidamEva yOginaH zraddhAnvitAH sAdhu yajanti siddhayE| bhUtEndriyAntaHkaraNOpalakSitaM vEdE ca tantrE ca ta Eva kOvidAH||62|| |
tvamEka AdyaH puruSaH suptazaktistayA rajaHsattvatamO vibhidyatE| mahAnahaM khaM marudagnivArdharAH surarSayO bhUtagaNA idaM yataH||63|| |
sRSTaM svazaktyEdamanupraviSTazcaturvidhaM puramAtmAMzakEna| athO vidustaM puruSaM santamantarbhuGktE hRSIkairmadhu sAraghaM yaH||64|| |
sa ESa lOkAnaticaNDavEgO vikarSasi tvaM khalu kAlayAnaH| bhUtAni bhUtairanumEyatattvO ghanAvalIrvAyurivAviSahyaH||65|| |
pramattamuccairiti kRtyacintayA pravRddhalObhaM viSayESu lAlasam| tvamapramattaH sahasAbhipadyasE kSullElihAnO'hirivAkhumantakaH||66|| |
kastvatpadAbjaM vijahAti paNDitO yastE'vamAnavyayamAnakEtanaH| vizaGkayAsmadgururarcati sma yadvinOpapattiM manavazcaturdaza||67|| |
atha tvamasi nO brahmanparamAtmanvipazcitAm| vizvaM rudrabhayadhvastamakutazcidbhayA gatiH||68|| |
idaM japata bhadraM vO vizuddhA nRpanandanAH| svadharmamanutiSThantO bhagavatyarpitAzayAH||69|| |
tamEvAtmAnamAtmasthaM sarvabhUtESvavasthitam| pUjayadhvaM gRNantazca dhyAyantazcAsakRddharim||70|| |
yOgAdEzamupAsAdya dhArayantO munivratAH| samAhitadhiyaH sarva EtadabhyasatAdRtAH||71|| |
idamAha purAsmAkaM bhagavAnvizvasRkpatiH| bhRgvAdInAmAtmajAnAM sisRkSuH saMsisRkSatAm||72|| |
tE vayaM nOditAH sarvE prajAsargE prajEzvarAH| anEna dhvastatamasaH sisRkSmO vividhAH prajAH||73|| |
athEdaM nityadA yuktO japannavahitaH pumAn| acirAcchrEya ApnOti vAsudEvaparAyaNaH||74|| |
zrEyasAmiha sarvESAM jJAnaM niHzrEyasaM param| sukhaM tarati duSpAraM jJAnanaurvyasanArNavam||75|| |
ya imaM zraddhayA yuktO madgItaM bhagavatstavam| adhIyAnO durArAdhyaM harimArAdhayatyasau||76|| |
vindatE puruSO'muSmAdyadyadicchatyasatvaram| madgItagItAtsuprItAcchrEyasAmEkavallabhAt||77|| |
idaM yaH kalya utthAya prAJjaliH zraddhayAnvitaH| zRNuyAcchrAvayEnmartyO mucyatE karmabandhanaiH||78|| |
gItaM mayEdaM naradEvanandanAH parasya puMsaH paramAtmanaH stavam japanta EkAgradhiyastapO mahatcaradhvamantE tata ApsyathEpsitam||79|| |
||iti zrImadbhAgavatE mahApurANE pAramahaMsyAM saMhitAyAM caturthaskandhE caturviMzO'dhyAyaH||