From StotraSamhita
< Bhagavatam | Skandha 05
dwAdazO'dhyAyaH
rahUgaNa uvAca
namO namaH kAraNavigrahAya svarUpatucchIkRtavigrahAya| namO'vadhUta dvijabandhuliGga nigUDhanityAnubhavAya tubhyam||1|| |
jvarAmayArtasya yathAgadaM satnidAghadagdhasya yathA himAmbhaH| kudEhamAnAhividaSTadRSTEH brahmanvacastE'mRtamauSadhaM mE||2|| |
tasmAdbhavantaM mama saMzayArthaM prakSyAmi pazcAdadhunA subOdham| adhyAtmayOgagrathitaM tavOktamAkhyAhi kautUhalacEtasO mE||3|| |
yadAha yOgEzvara dRzyamAnaM kriyAphalaM sadvyavahAramUlam| na hyaJjasA tattvavimarzanAya bhavAnamuSminbhramatE manO mE||4|| |
brAhmaNa uvAca
ayaM janO nAma calanpRthivyAM yaH pArthivaH pArthiva kasya hEtOH| tasyApi cAGghryOradhi gulphajaGghA jAnUrumadhyOrazirOdharAMsAH||5|| |
aMsE'dhi dArvI zibikA ca yasyAM sauvIrarAjEtyapadEza AstE| yasminbhavAnrUDhanijAbhimAnO rAjAsmi sindhuSviti durmadAndhaH||6|| |
zOcyAnimAMstvamadhikaSTadInAnviSTyA nigRhNanniranugrahO'si| janasya gOptAsmi vikatthamAnO na zObhasE vRddhasabhAsu dhRSTaH||7|| |
yadA kSitAvEva carAcarasya vidAma niSThAM prabhavaM ca nityam| tannAmatO'nyadvyavahAramUlaM nirUpyatAM satkriyayAnumEyam||8|| |
EvaM niruktaM kSitizabdavRttamasannidhAnAtparamANavO yE| avidyayA manasA kalpitAstE yESAM samUhEna kRtO vizESaH||9|| |
EvaM kRzaM sthUlamaNurbRhadyadasacca sajjIvamajIvamanyat| dravyasvabhAvAzayakAlakarma nAmnAjayAvEhi kRtaM dvitIyam||10|| |
jJAnaM vizuddhaM paramArthamEkamanantaraM tvabahirbrahma satyam| pratyakprazAntaM bhagavacchabdasaMjJaM yadvAsudEvaM kavayO vadanti||11|| |
rahUgaNaitattapasA na yAti na cEjyayA nirvapaNAdgRhAdvA| na cchandasA naiva jalAgnisUryairvinA mahatpAdarajO'bhiSEkam||12|| |
yatrOttamazlOkaguNAnuvAdaH prastUyatE grAmyakathAvighAtaH| niSEvyamANO'nudinaM mumukSOrmatiM satIM yacchati vAsudEvE||13|| |
ahaM purA bharatO nAma rAjA vimuktadRSTazrutasaGgabandhaH| ArAdhanaM bhagavata IhamAnO mRgO'bhavaM mRgasaGgAddhatArthaH||14|| |
sA mAM smRtirmRgadEhE'pi vIra kRSNArcanaprabhavA nO jahAti| athO ahaM janasaGgAdasaGgO vizaGkamAnO'vivRtazcarAmi||15|| |
tasmAnnarO'saGgasusaGgajAta jJAnAsinEhaiva vivRkNamOhaH hariM tadIhAkathanazrutAbhyAM labdhasmRtiryAtyatipAramadhvanaH||16|| |
||iti zrImadbhAgavatE mahApurANE pAramahaMsyAM saMhitAyAM paJcamaskandhE dwAdazO'dhyAyaH||