From StotraSamhita
< Bhagavatam | Skandha 05
paJcadazO'dhyAyaH
zrIzuka uvAca
bharatasyAtmajaH sumatirnAmAbhihitO yamu ha vAva kEcitpAkhaNDina RSabha padavImanuvartamAnaM cAnAryA avEdasamAmnAtAM dEvatAM svamanISayA pApIyasyA kalau kalpayiSyanti||1|| |
tasmAdvRddhasEnAyAM dEvatAjinnAma putrO'bhavat||2|| |
athAsuryAM tattanayO dEvadyumnastatO dhEnumatyAM sutaH paramESThI tasya suvarcalAyAM pratIha upajAtaH||3|| |
ya AtmavidyAmAkhyAya svayaM saMzuddhO mahApuruSamanusasmAra||4|| |
pratIhAtsuvarcalAyAM pratihartrAdayastraya AsannijyAkOvidAH sUnavaH pratihartuH stutyAmaja bhUmAnAvajaniSAtAm||5|| |
bhUmna RSikulyAyAmudgIthastataH prastAvO dEvakulyAyAM prastAvAnniyutsAyAM hRdayaja AsIdvibhurvibhO ratyAM ca pRthuSENastasmAnnakta AkUtyAM jajJE naktAddrutiputrO gayO rAjarSipravara udArazravA ajAyata sAkSAdbhagavatO viSNOrjagadrirakSiSayA gRhItasattvasya kalAtmavattvAdilakSaNEna mahApuruSatAM prAptaH||6|| |
sa vai svadharmENa prajApAlanapOSaNaprINanOpalAlanAnuzAsanalakSaNEnEjyAdinA ca bhagavati mahApuruSE parAvarE brahmaNi sarvAtmanArpitaparamArthalakSaNEna brahmaviccaraNAnusEvayApAdita bhagavadbhaktiyOgEna cAbhIkSNazaH paribhAvitAtizuddhamatiruparatAnAtmya Atmani svayamupalabhyamAnabrahmAtmAnubhavO'pi nirabhimAna EvAvanimajUgupat||7|| |
tasyEmAM gAthAM pANDavEya purAvida upagAyanti||8|| |
gayaM nRpaH kaH pratiyAti karmabhiryajvAbhimAnI bahuviddharmagOptA| samAgatazrIH sadasaspatiH satAM satsEvakO'nyO bhagavatkalAmRtE||9|| |
yamabhyaSiJcanparayA mudA satIH satyAziSO dakSakanyAH saridbhiH| yasya prajAnAM duduhE dharAziSO nirAziSO guNavatsasnutOdhAH||10|| |
chandAMsyakAmasya ca yasya kAmAndudUhurAjahrurathO baliM nRpAH| pratyaJcitA yudhi dharmENa viprA yadAziSAM SaSThamaMzaM parEtya||11|| |
yasyAdhvarE bhagavAnadhvarAtmA maghOni mAdyatyurusOmapIthE| zraddhAvizuddhAcalabhaktiyOga samarpitEjyAphalamAjahAra||12|| |
yatprINanAdbarhiSi dEvatiryaG manuSyavIruttRNamAviriJcAt| prIyEta sadyaH sa ha vizvajIvaH prItaH svayaM prItimagAdgayasya||13|| |
gayAdgayantyAM citrarathaH sugatiravarOdhana iti trayaH putrA babhUvuzcitrarathAdUrNAyAM samrADajaniSTa tata utkalAyAM marIcirmarIcErbindumatyAM bindumAnudapadyata tasmAtsaraghAyAM madhurnAmAbhavanmadhOH sumanasi vIravratastatO bhOjAyAM manthupramanthU jajJAtE manthOH satyAyAM bhauvanastatO dUSaNAyAM tvaSTAjaniSTa tvaSTurvirOcanAyAM virajO virajasya zatajitpravaraM putra zataM kanyA ca viSUcyAM kila jAtam||14|| |
tatrAyaM zlOkaH
praiyavrataM vaMzamimaM virajazcaramOdbhavaH akarOdatyalaM kIrtyA viSNuH suragaNaM yathA||15|| |
||iti zrImadbhAgavatE mahApurANE pAramahaMsyAM saMhitAyAM paJcamaskandhE paJcadazO'dhyAyaH||