From StotraSamhita
< Bhagavatam | Skandha 08
dwAdazO'dhyAyaH
zrIbAdarAyaNiruvAca
vRSadhvajO nizamyEdaM yOSidrUpENa dAnavAn| mOhayitvA suragaNAnhariH sOmamapAyayat||1|| |
vRSamAruhya girizaH sarvabhUtagaNairvRtaH| saha dEvyA yayau draSTuM yatrAstE madhusUdanaH||2|| |
sabhAjitO bhagavatA sAdaraM sOmayA bhavaH| sUpaviSTa uvAcEdaM pratipUjya smayanharim||3|| |
zrImahAdEva uvAca
dEvadEva jagadvyApinjagadIza jaganmaya| sarvESAmapi bhAvAnAM tvamAtmA hEturIzvaraH||4|| |
AdyantAvasya yanmadhyamidamanyadahaM bahiH| yatO'vyayasya naitAni tatsatyaM brahma cidbhavAn||5|| |
tavaiva caraNAmbhOjaM zrEyaskAmA nirAziSaH| visRjyObhayataH saGgaM munayaH samupAsatE||6|| |
tvaM brahma pUrNamamRtaM viguNaM vizOkam AnandamAtramavikAramananyadanyat| vizvasya hEturudayasthitisaMyamAnAm AtmEzvarazca tadapEkSatayAnapEkSaH||7|| |
EkastvamEva sadasaddvayamadvayaM ca svarNaM kRtAkRtamivEha na vastubhEdaH| ajJAnatastvayi janairvihitO vikalpO yasmAdguNavyatikarO nirupAdhikasya||8|| |
tvAM brahma kEcidavayantyuta dharmamEkE EkE paraM sadasatOH puruSaM parEzam| anyE'vayanti navazaktiyutaM paraM tvAM kEcinmahApuruSamavyayamAtmatantram||9|| |
nAhaM parAyurRSayO na marIcimukhyA jAnanti yadviracitaM khalu sattvasargAH| yanmAyayA muSitacEtasa Iza daitya martyAdayaH kimuta zazvadabhadravRttAH||10|| |
sa tvaM samIhitamadaH sthitijanmanAzaM bhUtEhitaM ca jagatO bhavabandhamOkSau| vAyuryathA vizati khaM ca carAcarAkhyaM sarvaM tadAtmakatayAvagamO'varuntsE||11|| |
avatArA mayA dRSTA ramamANasya tE guNaiH| sO'haM taddraSTumicchAmi yattE yOSidvapurdhRtam||12|| |
yEna sammOhitA daityAH pAyitAzcAmRtaM surAH| taddidRkSava AyAtAH paraM kautUhalaM hi naH||13|| |
zrIzuka uvAca
EvamabhyarthitO viSNurbhagavAnzUlapANinA| prahasya bhAvagambhIraM girizaM pratyabhASata||14|| |
zrIbhagavAnuvAca
kautUhalAya daityAnAM yOSidvESO mayA dhRtaH| pazyatA surakAryANi gatE pIyUSabhAjanE||15|| |
tattE'haM darzayiSyAmi didRkSOH surasattama| kAminAM bahu mantavyaM saGkalpaprabhavOdayam||16|| |
zrIzuka uvAca
iti bruvANO bhagavAMstatraivAntaradhIyata| sarvatazcArayaMzcakSurbhava AstE sahOmayA||17|| |
tatO dadarzOpavanE varastriyaM vicitrapuSpAruNapallavadrumE| vikrIDatIM kandukalIlayA lasaddukUlaparyastanitambamEkhalAm||18|| |
AvartanOdvartanakampitastana prakRSTahArOrubharaiH padE padE| prabhajyamAnAmiva madhyatazcalatpadapravAlaM nayatIM tatastataH||19|| |
dikSu bhramatkandukacApalairbhRzaM prOdvignatArAyatalOlalOcanAm| svakarNavibhrAjitakuNDalOllasatkapOlanIlAlakamaNDitAnanAm||20|| |
zlathaddukUlaM kabarIM ca vicyutAM sannahyatIM vAmakarENa valgunA| vinighnatImanyakarENa kandukaM vimOhayantIM jagadAtmamAyayA||21|| |
tAM vIkSya dEva iti kandukalIlayESadvrIDAsphuTasmitavisRSTakaTAkSamuSTaH| strIprEkSaNapratisamIkSaNavihvalAtmA nAtmAnamantika umAM svagaNAMzca vEda||22|| |
tasyAH karAgrAtsa tu kandukO yadA gatO vidUraM tamanuvrajatstriyAH| vAsaH sasUtraM laghu mArutO'haradbhavasya dEvasya kilAnupazyataH||23|| |
EvaM tAM rucirApAGgIM darzanIyAM manOramAm| dRSTvA tasyAM manazcakrE viSajjantyAM bhavaH kila||24|| |
tayApahRtavijJAnastatkRtasmaravihvalaH| bhavAnyA api pazyantyA gatahrIstatpadaM yayau||25|| |
sA tamAyAntamAlOkya vivastrA vrIDitA bhRzam| nilIyamAnA vRkSESu hasantI nAnvatiSThata||26|| |
tAmanvagacchadbhagavAnbhavaH pramuSitEndriyaH| kAmasya ca vazaM nItaH karENumiva yUthapaH||27|| |
sO'nuvrajyAtivEgEna gRhItvAnicchatIM striyam| kEzabandha upAnIya bAhubhyAM pariSasvajE||28|| |
sOpagUDhA bhagavatA kariNA kariNI yathA| itastataH prasarpantI viprakIrNazirOruhA||29|| |
AtmAnaM mOcayitvAGga surarSabhabhujAntarAt| prAdravatsA pRthuzrONI mAyA dEvavinirmitA||30|| |
tasyAsau padavIM rudrO viSNOradbhutakarmaNaH| pratyapadyata kAmEna vairiNEva vinirjitaH||31|| |
tasyAnudhAvatO rEtazcaskandAmOgharEtasaH| zuSmiNO yUthapasyEva vAsitAmanudhAvataH||32|| |
yatra yatrApatanmahyAM rEtastasya mahAtmanaH| tAni rUpyasya hEmnazca kSEtrANyAsanmahIpatE||33|| |
saritsaraHsu zailESu vanESUpavanESu ca| yatra kva cAsannRSayastatra sannihitO haraH||34|| |
skannE rEtasi sO'pazyadAtmAnaM dEvamAyayA| jaDIkRtaM nRpazrESTha sannyavartata kazmalAt||35|| |
athAvagatamAhAtmya AtmanO jagadAtmanaH| aparijJEyavIryasya na mEnE tadu hAdbhutam||36|| |
tamaviklavamavrIDamAlakSya madhusUdanaH| uvAca paramaprItO bibhratsvAM pauruSIM tanum||37|| |
zrIbhagavAnuvAca
diSTyA tvaM vibudhazrESTha svAM niSThAmAtmanA sthitaH| yanmE strIrUpayA svairaM mOhitO'pyaGga mAyayA||38|| |
kO nu mE'titarEnmAyAM viSaktastvadRtE pumAn| tAMstAnvisRjatIM bhAvAndustarAmakRtAtmabhiH||39|| |
sEyaM guNamayI mAyA na tvAmabhibhaviSyati| mayA samEtA kAlEna kAlarUpENa bhAgazaH||40|| |
zrIzuka uvAca
EvaM bhagavatA rAjanzrIvatsAGkEna satkRtaH| Amantrya taM parikramya sagaNaH svAlayaM yayau||41|| |
AtmAMzabhUtAM tAM mAyAM bhavAnIM bhagavAnbhavaH| sammatAmRSimukhyAnAM prItyAcaSTAtha bhArata||42|| |
ayi vyapazyastvamajasya mAyAM parasya puMsaH paradEvatAyAH| ahaM kalAnAmRSabhO'pi muhyE yayAvazO'nyE kimutAsvatantrAH||43|| |
yaM mAmapRcchastvamupEtya yOgAtsamAsahasrAnta upArataM vai| sa ESa sAkSAtpuruSaH purANO na yatra kAlO vizatE na vEdaH||44|| |
zrIzuka uvAca
iti tE'bhihitastAta vikramaH zArGgadhanvanaH| sindhOrnirmathanE yEna dhRtaH pRSThE mahAcalaH||45|| |
EtanmuhuH kIrtayatO'nuzRNvatO na riSyatE jAtu samudyamaH kvacit| yaduttamazlOkaguNAnuvarNanaM samastasaMsAraparizramApaham||46|| |
asadaviSayamaGghriM bhAvagamyaM prapannAn amRtamamaravaryAnAzayatsindhumathyam kapaTayuvativESO mOhayanyaH surArIMs tamahamupasRtAnAM kAmapUraM natO'smi||47|| |
||iti zrImadbhAgavatE mahApurANE pAramahaMsyAM saMhitAyAM aSTamaskandhE dwAdazO'dhyAyaH||