From StotraSamhita

aSTamO'dhyAyaH

zrIzuka uvAca

haritO rOhitasutazcampastasmAdvinirmitA| campApurI sudEvO'tO vijayO yasya cAtmajaH||1||

bharukastatsutastasmAdvRkastasyApi bAhukaH| sO'ribhirhRtabhU rAjA sabhAryO vanamAvizat||2||

vRddhaM taM paJcatAM prAptaM mahiSyanumariSyatI| aurvENa jAnatAtmAnaM prajAvantaM nivAritA||3||

AjJAyAsyai sapatnIbhirgarO dattO'ndhasA saha| saha tEnaiva saJjAtaH sagarAkhyO mahAyazAH||4||

sagarazcakravartyAsItsAgarO yatsutaiH kRtaH| yastAlajaGghAnyavanAJchakAnhaihayabarbarAn||5||

nAvadhIdguruvAkyEna cakrE vikRtavESiNaH| muNDAnchmazrudharAnkAMzcinmuktakEzArdhamuNDitAn||6||

anantarvAsasaH kAMzcidabahirvAsasO'parAn| sO'zvamEdhairayajata sarvavEdasurAtmakam||7||

aurvOpadiSTayOgEna harimAtmAnamIzvaram| tasyOtsRSTaM pazuM yajJE jahArAzvaM purandaraH||8||

sumatyAstanayA dRptAH piturAdEzakAriNaH| hayamanvESamANAstE samantAnnyakhananmahIm||9||

prAgudIcyAM dizi hayaM dadRzuH kapilAntikE| ESa vAjiharazcaura AstE mIlitalOcanaH||10||

hanyatAM hanyatAM pApa iti SaSTisahasriNaH| udAyudhA abhiyayurunmimESa tadA muniH||11||

svazarIrAgninA tAvanmahEndrahRtacEtasaH| mahadvyatikramahatA bhasmasAdabhavankSaNAt||12||

na sAdhuvAdO munikOpabharjitA nRpEndraputrA iti sattvadhAmani| kathaM tamO rOSamayaM vibhAvyatE jagatpavitrAtmani khE rajO bhuvaH||13||

yasyEritA sAGkhyamayI dRDhEha nauryayA mumukSustaratE duratyayam| bhavArNavaM mRtyupathaM vipazcitaH parAtmabhUtasya kathaM pRthaGmatiH||14||

yO'samaJjasa ityuktaH sa kEzinyA nRpAtmajaH| tasya putrO'MzumAnnAma pitAmahahitE rataH||15||

asamaJjasa AtmAnaM darzayannasamaJjasam| jAtismaraH purA saGgAdyOgI yOgAdvicAlitaH||16||

AcarangarhitaM lOkE jJAtInAM karma vipriyam| sarayvAM krIDatO bAlAnprAsyadudvEjayanjanam||17||

EvaM vRttaH parityaktaH pitrA snEhamapOhya vai| yOgaizvaryENa bAlAMstAndarzayitvA tatO yayau||18||

ayOdhyAvAsinaH sarvE bAlakAnpunarAgatAn| dRSTvA visismirE rAjanrAjA cApyanvatapyata||19||

aMzumAMzcOditO rAjJA turagAnvESaNE yayau| pitRvyakhAtAnupathaM bhasmAnti dadRzE hayam||20||

tatrAsInaM muniM vIkSya kapilAkhyamadhOkSajam| astautsamAhitamanAH prAJjaliH praNatO mahAn||21||

aMzumAnuvAca

na pazyati tvAM paramAtmanO'janO na budhyatE'dyApi samAdhiyuktibhiH| kutO'parE tasya manaHzarIradhI visargasRSTA vayamaprakAzAH||22||

yE dEhabhAjastriguNapradhAnA guNAnvipazyantyuta vA tamazca| yanmAyayA mOhitacEtasastvAM viduH svasaMsthaM na bahiHprakAzAH||23||

taM tvAm ahaM jJAnaghanaM svabhAva pradhvastamAyAguNabhEdamOhaiH| sanandanAdyairmunibhirvibhAvyaM kathaM vimUDhaH paribhAvayAmi||24||

prazAnta mAyAguNakarmaliGgamanAmarUpaM sadasadvimuktam| jJAnOpadEzAya gRhItadEhaM namAmahE tvAM puruSaM purANam||25||

tvanmAyAracitE lOkE vastubuddhyA gRhAdiSu| bhramanti kAmalObhErSyA mOhavibhrAntacEtasaH||26||

adya naH sarvabhUtAtmankAmakarmEndriyAzayaH| mOhapAzO dRDhazchinnO bhagavaMstava darzanAt||27||

zrIzuka uvAca

itthaM gItAnubhAvastaM bhagavAnkapilO muniH| aMzumantamuvAcEdamanugrAhya dhiyA nRpa||28||

zrIbhagavAnuvAca

azvO'yaM nIyatAM vatsa pitAmahapazustava| imE ca pitarO dagdhA gaGgAmbhO'rhanti nEtarat||29||

taM parikramya zirasA prasAdya hayamAnayat| sagarastEna pazunA yajJazESaM samApayat||30||

rAjyamaMzumatE nyasya niHspRhO muktabandhanaH aurvOpadiSTamArgENa lEbhE gatimanuttamAm||31||

||iti zrImadbhAgavatE mahApurANE pAramahaMsyAM saMhitAyAM navamaskandhE aSTamO'dhyAyaH||

See Also

• http://vedabase.net/sb/9/8/en