From StotraSamhita

EkAdazO'dhyAyaH

zrIbhagavAnuvAca

baddhO mukta iti vyAkhyA guNatO mE na vastutaH| guNasya mAyAmUlatvAnna mE mOkSO na bandhanam||1||

zOkamOhau sukhaM duHkhaM dEhApattizca mAyayA| svapnO yathAtmanaH khyAtiH saMsRtirna tu vAstavI||2||

vidyAvidyE mama tanU viddhyuddhava zarIriNAm| mOkSabandhakarI AdyE mAyayA mE vinirmitE||3||

Ekasyaiva mamAMzasya jIvasyaiva mahAmatE| bandhO'syAvidyayAnAdirvidyayA ca tathEtaraH||4||

atha baddhasya muktasya vailakSaNyaM vadAmi tE| viruddhadharmiNOstAta sthitayOrEkadharmiNi||5||

suparNAvEtau sadRzau sakhAyau yadRcchayaitau kRtanIDau ca vRkSE| EkastayOH khAdati pippalAnnamanyO nirannO'pi balEna bhUyAn||6||

AtmAnamanyaM ca sa vEda vidvAnapippalAdO na tu pippalAdaH| yO'vidyayA yuksa tu nityabaddhO vidyAmayO yaH sa tu nityamuktaH||7||

dEhasthO'pi na dEhasthO vidvAnsvapnAdyathOtthitaH| adEhasthO'pi dEhasthaH kumatiH svapnadRgyathA||8||

indriyairindriyArthESu guNairapi guNESu ca| gRhyamANESvahaM kuryAnna vidvAnyastvavikriyaH||9||

daivAdhInE zarIrE'sminguNabhAvyEna karmaNA| vartamAnO'budhastatra kartAsmIti nibadhyatE||10||

EvaM viraktaH zayana AsanATanamajjanE darzanasparzanaghrANa bhOjanazravaNAdiSu na tathA badhyatE vidvAntatra tatrAdayanguNAn||11||

prakRtisthO'pyasaMsaktO yathA khaM savitAnilaH vaizAradyEkSayAsaGga zitayA chinnasaMzayaH pratibuddha iva svapnAnnAnAtvAdvinivartatE||12||

yasya syurvItasaGkalpAH prANEndriyarnanOdhiyAm| vRttayaH sa vinirmuktO dEhasthO'pi hi tadguNaiH||14||

yasyAtmA hiMsyatE hiMsrairyEna kiJcidyadRcchayA| arcyatE vA kvacittatra na vyatikriyatE budhaH||15||

na stuvIta na nindEta kurvataH sAdhvasAdhu vA| vadatO guNadOSAbhyAM varjitaH samadRGmuniH||16||

na kuryAnna vadEtkiJcinna dhyAyEtsAdhvasAdhu vA| AtmArAmO'nayA vRttyA vicarEjjaDavanmuniH||17||

zabdabrahmaNi niSNAtO na niSNAyAtparE yadi| zramastasya zramaphalO hyadhEnumiva rakSataH||18||

gAM dugdhadOhAmasatIM ca bhAryAM dEhaM parAdhInamasatprajAM ca| vittaM tvatIrthIkRtamaGga vAcaM hInAM mayA rakSati duHkhaduHkhI||19||

yasyAM na mE pAvanamaGga karma sthityudbhavaprANanirOdhamasya| lIlAvatArEpsitajanma vA syAdvandhyAM giraM tAM bibhRyAnna dhIraH||20||

EvaM jijJAsayApOhya nAnAtvabhramamAtmani| upAramEta virajaM manO mayyarpya sarvagE||21||

yadyanIzO dhArayituM manO brahmaNi nizcalam| mayi sarvANi karmANi nirapEkSaH samAcara||22||

zraddhAlurmatkathAH zRNvansubhadrA lOkapAvanIH| gAyannanusmarankarma janma cAbhinayanmuhuH||23||

madarthE dharmakAmArthAnAcaranmadapAzrayaH| labhatE nizcalAM bhaktiM mayyuddhava sanAtanE||24||

satsaGgalabdhayA bhaktyA mayi mAM sa upAsitA| sa vai mE darzitaM sadbhiraJjasA vindatE padam||25||

zrIuddhava uvAca

sAdhustavOttamazlOka mataH kIdRgvidhaH prabhO| bhaktistvayyupayujyEta kIdRzI sadbhirAdRtA||26||

EtanmE puruSAdhyakSa lOkAdhyakSa jagatprabhO| praNatAyAnuraktAya prapannAya ca kathyatAm||27||

tvaM brahma paramaM vyOma puruSaH prakRtEH paraH| avatIrnO'si bhagavansvEcchOpAttapRthagvapuH||28||

zrIbhagavAnuvAca

kRpAlurakRtadrOhastitikSuH sarvadEhinAm| satyasArO'navadyAtmA samaH sarvOpakArakaH||29||

kAmairahatadhIrdAntO mRduH zucirakiJcanaH| anIhO mitabhukSAntaH sthirO maccharaNO muniH||30||

apramattO gabhIrAtmA dhRtimAJjitaSaDguNaH| amAnI mAnadaH kalyO maitraH kAruNikaH kaviH||31||

AjJAyaivaM guNAndOSAnmayAdiSTAnapi svakAn| dharmAnsantyajya yaH sarvAnmAM bhajEta sa tu sattamaH||32||

jJAtvAjJAtvAtha yE vai mAM yAvAnyazcAsmi yAdRzaH| bhajantyananyabhAvEna tE mE bhaktatamA matAH||33||

malliGgamadbhaktajana darzanasparzanArcanam| paricaryA stutiH prahva guNakarmAnukIrtanam||34||

matkathAzravaNE zraddhA madanudhyAnamuddhava| sarvalAbhOpaharaNaM dAsyEnAtmanivEdanam||35||

majjanmakarmakathanaM mama parvAnumOdanam| gItatANDavavAditra gOSThIbhirmadgRhOtsavaH||36||

yAtrA balividhAnaM ca sarvavArSikaparvasu| vaidikI tAntrikI dIkSA madIyavratadhAraNam||37||

mamArcAsthApanE zraddhA svataH saMhatya cOdyamaH| udyAnOpavanAkrIDa puramandirakarmaNi||38||

sammArjanOpalEpAbhyAM sEkamaNDalavartanaiH| gRhazuzrUSaNaM mahyaM dAsavadyadamAyayA||39||

amAnitvamadambhitvaM kRtasyAparikIrtanam| api dIpAvalOkaM mE nOpayuJjyAnnivEditam||40||

yadyadiSTatamaM lOkE yaccAtipriyamAtmanaH| tattannivEdayEnmahyaM tadAnantyAya kalpatE||41||

sUryO'gnirbrAhmaNA gAvO vaiSNavaH khaM marujjalam| bhUrAtmA sarvabhUtAni bhadra pUjApadAni mE||42||

sUryE tu vidyayA trayyA haviSAgnau yajEta mAm| AtithyEna tu viprAgryE gOSvaGga yavasAdinA||43||

vaiSNavE bandhusatkRtyA hRdi khE dhyAnaniSThayA| vAyau mukhyadhiyA tOyE dravyaistOyapuraHsaraiH||44||

sthaNDilE mantrahRdayairbhOgairAtmAnamAtmani| kSEtrajJaM sarvabhUtESu samatvEna yajEta mAm||45||

dhiSNyESvityESu madrUpaM zaGkhacakragadAmbujaiH| yuktaM caturbhujaM zAntaM dhyAyannarcEtsamAhitaH||46||

iSTApUrtEna mAmEvaM yO yajEta samAhitaH| labhatE mayi sadbhaktiM matsmRtiH sAdhusEvayA||47||

prAyENa bhaktiyOgEna satsaGgEna vinOddhava| nOpAyO vidyatE samyakprAyaNaM hi satAmaham||48||

athaitatparamaM guhyaM zRNvatO yadunandana sugOpyamapi vakSyAmi tvaM mE bhRtyaH suhRtsakhA||49||

||iti zrImadbhAgavatE mahApurANE pAramahaMsyAM saMhitAyAM EkAdazaskandhE EkAdazO'dhyAyaH||

See Also

• http://vedabase.net/sb/11/11/en