From StotraSamhita
< Bhagavatam | Skandha 12
trayOdazO'dhyAyaH
sUta uvAca
yaM brahmA varuNEndrarudramarutaH stunvanti divyaiH stavair vEdaiH sAGgapadakramOpaniSadairgAyanti yaM sAmagAH| dhyAnAvasthitatadgatEna manasA pazyanti yaM yOginO yasyAntaM na viduH surAsuragaNA dEvAya tasmai namaH||1|| |
pRSThE bhrAmyadamandamandaragirigrAvAgrakaNDUyanAn nidrAlOH kamaThAkRtErbhagavataH zvAsAnilAH pAntu vaH| yatsaMskArakalAnuvartanavazAdvElAnibhEnAmbhasAM yAtAyAtamatandritaM jalanidhErnAdyApi vizrAmyati||2|| |
purANasaGkhyAsambhUtimasya vAcyaprayOjanE| dAnaM dAnasya mAhAtmyaM pAThAdEzca nibOdhata||3|| |
brAhmaM daza sahasrANi pAdmaM paJcOnaSaSTi ca| zrIvaiSNavaM trayOviMzaccaturviMzati zaivakam||4|| |
dazASTau zrIbhAgavataM nAradaM paJcaviMzati| mArkaNDaM nava vAhnaM ca dazapaJca catuHzatam||5|| |
caturdaza bhaviSyaM syAttathA paJcazatAni ca| dazASTau brahmavaivartaM laiGgamEkAdazaiva tu||6|| |
caturviMzati vArAhamEkAzItisahasrakam| skAndaM zataM tathA caikaM vAmanaM daza kIrtitam||7|| |
kaurmaM saptadazAkhyAtaM mAtsyaM tattu caturdaza| EkOnaviMzatsauparNaM brahmANDaM dvAdazaiva tu||8|| |
EvaM purANasandOhazcaturlakSa udAhRtaH| tatrASTadazasAhasraM zrIbhAgavatam iSyatE||9|| |
idaM bhagavatA pUrvaM brahmaNE nAbhipaGkajE| sthitAya bhavabhItAya kAruNyAtsamprakAzitam||10|| |
AdimadhyAvasAnESu vairAgyAkhyAnasaMyutam| harilIlAkathAvrAtA mRtAnanditasatsuram||11|| |
sarvavEdAntasAraM yadbrahmAtmaikatvalakSaNam| vastvadvitIyaM tanniSThaM kaivalyaikaprayOjanam||12|| |
prauSThapadyAM paurNamAsyAM hEmasiMhasamanvitam| dadAti yO bhAgavataM sa yAti paramAM gatim||13|| |
rAjantE tAvadanyAni purANAni satAM gaNE| yAvadbhAgavataM naiva zrUyatE'mRtasAgaram||14|| |
sarvavEdAntasAraM hi zrIbhAgavatamiSyatE| tadrasAmRtatRptasya nAnyatra syAdratiH kvacit||15|| |
nimnagAnAM yathA gaGgA dEvAnAmacyutO yathA| vaiSNavAnAM yathA zambhuH purANAnAmidamtathA||16|| |
kSEtrANAM caiva sarvESAM yathA kAzI hyanuttamA| tathA purANavrAtAnAM zrImadbhAgavataM dvijAH||17|| |
zrImadbhAgavataM purANamamalaM yadvaiSNavAnAM priyaM yasminpAramahaMsyamEkamamalaM jJAnaM paraM gIyatE| tatra jJAnavirAgabhaktisahitaM naiSkarmyamAviskRtaM tacchRNvansupaThanvicAraNaparO bhaktyA vimucyEnnaraH||18|| |
kasmai yEna vibhAsitO'yamatulO jJAnapradIpaH purA tadrUpENa ca nAradAya munayE kRSNAya tadrUpiNA| yOgIndrAya tadAtmanAtha bhagavadrAtAya kAruNyatas tacchuddhaM vimalaM vizOkamamRtaM satyaM paraM dhImahi||19|| |
namastasmai bhagavatE vAsudEvAya sAkSiNE| ya idamkRpayA kasmai vyAcacakSE mumukSavE||20|| |
yOgIndrAya namastasmai zukAya brahmarUpiNE| saMsArasarpadaSTaM yO viSNurAtamamUmucat||21|| |
bhavE bhavE yathA bhaktiH pAdayOstava jAyatE| tathA kuruSva dEvEza nAthastvaM nO yataH prabhO||22|| |
nAmasaGkIrtanaM yasya sarvapApa praNAzanam praNAmO duHkhazamanastaM namAmi hariM param||23|| |
||iti zrImadbhAgavatE mahApurANE pAramahaMsyAM saMhitAyAM dwAdazaskandhE trayOdazO'dhyAyaH||
