dakSiNAmUrtistOtram

upAsakAnAM yadupAsanIyam
upAttavAsaM vaTazAkhimUlE|
taddhAma dAkSiNyajuSA svamUrtyA
jAgartu cittE mama bOdharUpam||1||

adrAkSamakSINadayAnidhAnam
AcAryamAdyaM vaTamUlabhAgE|
maunEna mandasmitabhUSitEna
maharSi lOkasya tamO nudantam||2||

vidrAvitAzESa-tamOguNEna
mudrAvizESENa muhurmunInAm|
nirasya mAyAM dayayA vidhattE
dEvO mahAMstattvamasIti bOdham||3||

apArakAruNyasudhAtaraGgaiH
apAGgapAtairavalOkayantam|
kaThOrasaMsAranidAghataptAn
munInahaM naumi guruM gurUNAm||4||

mamAdyadEvO vaTamUlavAsI
kRpAvizESAtkRtasannidhAnaH|
OMkArarUpAmupadizya vidyAm
AvidyakadhvAntamapAkarOtu||5||

kalAbhirindOriva kalpitAGgaM
muktAkalApairiva baddhamUrtim|
AlOkayE dEzikamapramEyam
anAdyavidyAtimiraprabhAtam||6||

svadakSajAnusthitavAmapAdam
pAdOdarAlaGkRtayOgapaTTam|
apasmRtErAhitapAdamaGgE
praNaumi dEvaM praNidhAnavantam||7||

tattvArthamantEvasatAmRSINAm
yuvA'pi yaH sannupadESTumISTE|
praNaumi taM prAktanapuNyajAlaiH
AcAryamAzcaryaguNAdhivAsam||8||

EkEna mudrAM parazuM karENa
karENa cAnyEna mRgaM dadhAnaH|
svajAnuvinyastakaraH purastAt
AcAryacUDAmaNirAvirastu||9||

AlEpavantaM madanAGgabhUtyA
zArdUlakRttyA paridhAnavantam|
AlOkayE kaJcanadEzikEndram
ajJAnavArAkarabADavAgnim||10||

cArusmitaM sOmakalAvataMsam
vINAdharaM vyaktajaTAkalApam|
upAsatE kEcana yOginastvAm
upAttanAdAnubhavapramOdam||11||

upAsatE yaM munayaH zukAdyAH
nirAziSO nirmamatAdhivAsAH|
taM dakSiNAmUrtitanuM mahEzam
upAsmahE mOhamahArtizAntyai||12||

kAntyA ninditakundakandalavapurnyagrOdhamUlE vasan
kAruNyAmRtavAribhirmunijanaM sambhAvayan vIkSitaiH|
mOhadhvAntavibhEdanaM viracayan bOdhEna tattAdRzA
dEvastattvamasIti bOdhayatu mAM mudrAvatA pANinA||13||

agauragAtrairalalATanEtraiH
azAntavESairabhujaGgabhUSaiH|
abOdhamudrairanapAstanidraiH
apUrNakAmairamarairalaM naH||14||

daivatAni kati santi cAvanau
naiva tAni manasO matAni mE|
dIkSitaM jaDadhiyAmanugrahE
dakSiNAbhimukhamEva daivatam||15||

muditAya mugdhazazinAvataMsinE
bhasitAvalEparamaNIyamUrtayE|
jagadIndrajAlaracanApaTIyasE
mahasE namO'stu vaTamUlavAsinE||16||

vyAlambinIbhiH paritO jaTAbhiH
kalAvazESENa kalAdharENa|
pazyallalATEna mukhEndunA ca
prakAzasE cEtasi nirmalAnAm||17||

upAsakAnAM tvamumAsahAyaH
pUrNEndubhAvaM prakaTIkarOSi|
yadadya tE darzanamAtratO mE
dravatyahO mAnasacandrakAntaH||18||

yastE prasannAmanusandadhAnO
mUrtiM mudA mugdhazazAGkamaulEH|
aizvaryamAyurlabhatE ca vidyAm
antE ca vEdAntamahArahasyam||19||