From StotraSamhita
durgAstOtram
zrI nArAyaNa uvAca
stOtraM ca zrUyatAM brahman sarvavighnavinAzakam| sukhadaM mOkSadaM sAraM bhavasantArakAraNam|| |
zrIkRSNa uvAca
tvamEva sarvajananI mUlaprakRtirIzvarI| tvamEvA''dyA sRSTividhau svEcchayA triguNAtmikA||1|| |
kAryArthE saguNA tvaM ca vastutO nirguNA svayam| parabrahmasvarUpA tvaM satyA nityA sanAtanI||2|| |
tEjaHsvarUpA paramA bhaktAnugrahavigrahA| sarvasvarUpA sarvEzA sarvAdhArA parAtparA||3|| |
sarvabIjasvarUpA ca sarvapUjyA nirAzrayA| sarvajJA sarvatObhadrA sarvamaGgalamaGgalA||4|| |
sarvabuddhisvarUpA ca sarvazaktisvarUpiNI| sarvajJAnapradA dEvI sarvajJA sarvabhAvinI||5|| |
tvaM svAhA dEvadAnE ca pitRdAnE svadhA svayam| dakSiNA sarvadAnE ca sarvazaktisvarUpiNI||6|| |
nidrA tvaM ca dayA tvaM ca tRSNA tvaM cA''tmanaH priyA| kSutkSAntiH zAntirIzA ca kAntistuSTizca zAzvatI||7|| |
zraddhA puSTizca tandrA ca lajjA zObhA prabhA tathA| satAM sampatsvarUpA zrIrvipattirasatAmiha||8|| |
prItirUpA puNyavatAM pApinAM kalahAGkurA| zazvatkarmamayI zaktiH sarvadA sarvajIvinAm||9|| |
dEvEbhyaH svapadO dAtrI dhAturdhAtrI kRpAmayI| hitAya sarvadEvAnAM sarvAsuravinAzinI||10|| |
yOganidrA yOgarUpA yOgadAtrI ca yOginAm| siddhisvarUpA siddhAnAM siddhidA siddhiyOginI||11|| |
mAhEzvarI ca brahmANI viSNumAyA ca vaiSNavI| bhadradA bhadrakAlI ca sarvalOkabhayaGkarI||12|| |
grAmE grAmE grAmadEvI gRhadEvI gRhE gRhE| satAM kIrtiH pratiSThA ca nindA tvamasatAM sadA||13|| |
mahAyuddhE mahAmArI duSTasaMhArarUpiNI| rakSAsvarUpA ziSTAnAM mAtEva hitakAriNI||14|| |
vandyA pUjyA stutA tvaM ca brahmAdInAM ca sarvadA| brAhmaNyarUpA viprANAM tapasyA ca tapasvinAm||15|| |
vidyA vidyAvatAM tvaM ca buddhirbuddhimatAM satAm| mEdhA smRtisvarUpA ca pratibhA pratibhAvatAm||16|| |
rAjJAM pratAparUpA ca vizAM vANijyarUpiNI| sRSTau sRSTisvarUpA tvaM rakSArUpA ca pAlanE||17|| |
tathA'ntE tvaM mahAmArI vizvE vizvaizca pUjitE| kAlarAtrirmahArAtrirmOharAtrizca mOhinI||18|| |
duratyayA mE mAyA tvaM yayA sammOhitaM jagat| yayA mugdhO hi vidvAMzca mOkSamArgaM na pazyati||19|| |
phalazrutiH
ityAtmanA kRtaM stOtraM durgAyA durganAzanam| pUjAkAlE paThEdyO hi siddhirbhavati vAJchitA||20|| |
vandhyA ca kAkavandhyA ca mRtavatsA ca durbhagA| zrutvA stOtraM varSamEkaM suputraM labhatE dhruvam||21|| |
kArAgArE mahAghOrE yO baddhO dRDhabandhanE| zrutvA stOtraM mAsamEkaM bandhanAnmucyatE dhruvam||22|| |
yakSmagrastO galatkuSThI mahAzUlI mahAjvarI| zrutvA stOtraM varSamEkaM sadyO rOgAt pramucyatE||23|| |
putrabhEdE prajAbhEdE patnIbhEdE ca durgataH| zrutvA stOtraM mAsamEkaM labhatE nAtra saMzayaH||24|| |
rAjadvArE zmazAnE ca mahAraNyE raNasthalE| hiMsrajantusamIpE ca zrutvA stOtraM pramucyatE||25|| |
gRhadAhE ca dAvAgnau dasyusainyasamanvitE| stOtrazravaNamAtrENa labhatE nAtra saMzayaH||26|| |
mahAdaridrO mUrkhazca varSaM stOtraM paThEttu yaH| vidyAvAn dhanavAMzcaiva sa bhavEnnAtra saMzayaH||27|| |
||iti zrIbrahmavaivartamahApurANE prakRtikhaNDE SaTSaSTitame'dhyAye zrI nArada-nArAyaNa-saMvAdE durgOpAkhyAnE zrI kRSNaviracitaM zrI durgAstOtraM sampUrNam||