kRSNASTakam 1

zriyAzliSTO viSNuH sthiracaragururvEdaviSayO
dhiyAM sAkSI zuddhO harirasurahantAbjanayanaH|
gadI zaGkhI cakrI vimalavanamAlI sthiraruciH
zaraNyO lOkEzO mama bhavatu kRSNO'kSiviSayaH||1||

yataH sarvaM jAtaM viyadanilamukhyaM jagadidam
sthitau niHzESaM yO'vati nijasukhAMzEna madhuhA|
layE sarvaM svasmin harati kalayA yastu sa vibhuH
zaraNyO lOkEzO mama bhavatu kRSNO'kSiviSayaH||2||

asUnAyamyAdau yamaniyamamukhyaiH sukaraNaiH
niruddhyEdaM cittaM hRdi vilayamAnIya sakalam|
yamIDyaM pazyanti pravaramatayO mAyinamasau
zaraNyO lOkEzO mama bhavatu kRSNO'kSiviSayaH||3||

pRthivyAM tiSThan yO yamayati mahIM vEda na dharA
yamityAdau vEdO vadati jagatAmIzamamalam|
niyantAraM dhyEyaM munisuranRNAM mOkSadamasau
zaraNyO lOkEzO mama bhavatu kRSNO'kSiviSayaH||4||

mahEndrAdirdEvO jayati ditijAn yasya balatO
na kasya svAtantryaM kvacidapi kRtau yatkRtimRtE|
balArAtErgarvaM pariharati yO'sau vijayinaH
zaraNyO lOkEzO mama bhavatu kRSNO'kSiviSayaH||5||

vinA yasya dhyAnaM vrajati pazutAM sUkaramukhAm
vinA yasya jJAnaM janimRtibhayaM yAti janatA|
vinA yasya smRtyA kRmizatajaniM yAti sa vibhuH
zaraNyO lOkEzO mama bhavatu kRSNO'kSiviSayaH||6||

narAtaGkOTTaGkaH zaraNazaraNO bhrAntiharaNO
ghanazyAmO vAmO vrajazizuvayasyO'rjunasakhaH|
svayambhUrbhUtAnAM janaka ucitAcArasukhadaH
zaraNyO lOkEzO mama bhavatu kRSNO'kSiviSayaH||7||

yadA dharmaglAnirbhavati jagatAM kSObhakaraNI
tadA lOkasvAmI prakaTitavapuH sEtudhRgajaH|
satAM dhAtA svacchO nigamagaNagItO vrajapatiH
zaraNyO lOkEzO mama bhavatu kRSNO'kSiviSayaH||8||