lakSmInRsiMha karAvalambastOtram

zrImatpayOnidhinikEtanacakrapANE
bhOgIndrabhOgamaNirAjita puNyamUrtE|
yOgIza zAzvata zaraNya bhavAbdhipOta
lakSmInRsiMha mama dEhi karAvalambam ||1||

brahmEndrarudramarudarkakirITakOTi-
saGghaTTitAGghrikamalAmalakAntikAnta|
lakSmIlasatkucasarOruharAjahaMsa
lakSmInRsiMha mama dEhi karAvalambam||2||

saMsAradAvadahanAturabhIkarOru-
jvAlAvalIbhiratidagdhatanUruhasya|
tvatpAdapadmasarasIM zaraNAgatasya
lakSmInRsiMha mama dEhi karAvalambam||3||

saMsArajAlapatitasya jagannivAsa
sarvEndriyArthabaDizAgrajhaSOpamasya|
prOtkampitapracuratAlukamastakasya
lakSmInRsiMha mama dEhi karAvalambam||4||

saMsArakUpamatighOramagAdhamUm
samprApya duHkhazatasarpasamAkulasya|
dInasya dEva kRpayA padamAgatasya
lakSmInRsiMha mama dEhi karAvalambam||5||

saMsArabhIkarakarIndrakarAbhighAta-
niSpIDyamAnavapuSaH sakalArtinAza|
prANaprayANabhavabhItisamAkulasya
lakSmInRsiMha mama dEhi karAvalambam||6||

saMsArasarpaviSadigdhamahOgratIvra-
daMSTrAgrakOTiparidaSTavinaSTamUrtEH|
nAgArivAhana sudhAbdhinivAsa zaurE
lakSmInRsiMha mama dEhi karAvalambam||7||

saMsAravRkSamaghabIjamanantakarma-
zAkhAyutaM karaNapatramanaGgapuSpam|
Aruhya duHkhaphalitaM cakitaM dayAlO
lakSmInRsiMha mama dEhi karAvalambam||8||

saMsArasAgaravizAlakarAlakAla-
nakragrahagrasitanigrahavigrahasya|
vyagrasya rAganicayOrminipIDitasya
lakSmInRsiMha mama dEhi karAvalambam||9||

saMsArasAgaranimajjanamuhyamAnam
dInaM vilOkaya vibhO karuNAnidhE mAm|
prahlAdakhEdaparihAraparAvatAra
lakSmInRsiMha mama dEhi karAvalambam||10||

saMsAraghOragahanE caratO murArE
mArOgrabhIkaramRgapracurArditasya|
Artasya matsaranidAghasuduHkhitasya
lakSmInRsiMha mama dEhi karAvalambam||11||

baddhvA galE yamabhaTA bahu tarjayantaH
karSanti yatra bhavapAzazatairyutaM mAm|
EkAkinaM paravazaM cakitaM dayAlO
lakSmInRsiMha mama dEhi karAvalambam||12||

lakSmIpatE kamalanAbha surEza viSNO
yajJEza yajJa madhusUdana vizvarUpa|
brahmaNya kEzava janArdana vAsudEva
lakSmInRsiMha mama dEhi karAvalambam||13||

EkEna cakramaparENa karENa zaGkham
anyEna sindhutanayAmavalambya tiSThan|
vAmEtarENa varadAbhayapadmacihnaM
lakSmInRsiMha mama dEhi karAvalambam||14||

andhasya mE hRtavivEkamahAdhanasya
cOrairmahAbalibhirindriyanAmadhEyaiH|
mOhAndhakArakuharE vinipAtitasya
lakSmInRsiMha mama dEhi karAvalambam||15||

prahlAdanAradaparAzarapuNDarIka-
vyAsAdibhAgavatapuGgavahRnnivAsa|
bhaktAnuruktaparipAlanapArijAta
lakSmInRsiMha mama dEhi karAvalambam||16||

lakSmInRsiMhacaraNAbjamadhuvratEna
stOtraM kRtaM zubhakaraM bhuvi zaGkarENa|
yE tatpaThanti manujA haribhaktiyuktA:
tE yAnti tatpadasarOjamakhaNDarUpam||17||