viMza-dazakam -- RSabhayOgIzvaracaritam

priyavratasya priyaputrabhUtAdAgnIdhrarAjAduditO hi nAbhiH|
tvAM dRSTavAniSTadamiSTamadhyE tavaiva tuSTyai kRtayajJakarmA||1||

abhiSTutastatra munIzvaraistvaM rAjJA svatulyaM sutamarthyamAnaH|
svayaM janiSyE'hamiti bruvANastirOdadhA barhiSi vizvamUrtE||2||

nAbhipriyAyAmatha mErudEvyAM tvamaMzatO'bhUrRSabhAbhidhAnaH|
alOkasAmAnyaguNaprabhAvaprabhAvitAzESajanapramOdaH||3||

tvayi trilOkIbhRti rAjybhAraM nidhAya nAbhiH saha mErudEvyA|
tapOvanaM prApya bhavanniSEvI gataH kilAnandapadaM padaM tE||4||

indrastvadutkarSakRtAdamarSAdvavarSa nAsminnajanAbhavarSE|
yadA tadA tvaM nijayOgazaktyA svavarSamEnad{}vyadadhAH suvarSam||5||

jitEndradattAM kamanIM jayantImathOdvahannAtmaratAzayO'pi|
ajIjanattatra zataM tanUjAnyESAM kSitIzO bharatO'grajanmA||6||

navAbhavanyOgivarA navAnyE tvapAlayanbhAratavarSakhaNDAn|
saikA tvazItistava zESaputrAstapObalAdbhUsurabhUyamIyuH||7||

uktvA sutEbhyO'tha munIndramadhyE viraktibhaktyanvitamuktimArgam|
svayaM gataH pAramahaMsyavRttimadhA jaDOnmattapizAcacaryAm||8||

parAtmabhUtO'pi parOpadEzaM kurvanbhavansarvanirasyamAnaH|
vikArahInO vicacAra kRtsnAM mahImahInAtmarasAbhilInaH||9||

zayuvrataM gOmRgakAkacaryAM ciraM carannApya paraM svarUpam|
davAhRtAGgaH kuTakAcalE tvaM tApAnmamApAkuru vAtanAtha||10||