EkapaJcAzattama-dazakam -- aghAsuravadhaH

kadAcana vrajazizubhiH samaM bhavAn vanAzanE vihitamatiH pragEtarAm|
samAvRtO bahutaravatsamaNDalaiH satEmanairniragamadIza jEmanaiH||1||

viniryatastava caraNAmbujadvayAdudaJcitaM tribhuvanapAvanaM rajaH|
maharSayaH pulakadharaiH kalEbarairudUhirE dhRtabhavadIkSaNOtsavAH||2||

pracArayatyaviralazAdvalE talE pazUnvibhO bhavati samaM kumArakaiH|
aghAsurO nyaruNadaghAya vartanIM bhayAnakaH sapadi zayAnakAkRtiH||3||

mahAcalapratimatanOrguhAnibhaprasAritaprathitamukhasya kAnanE|
mukhOdaraM viharaNakautukAdgatAH kumArakAH kimapi vidUragE tvayi||4||

pramAdataH pravizati pannagOdaraM kvathattanau pazupakulE savAtsakE|
vidannidaM tvamapi vivEzitha prabhO suhRjjanaM vizaraNamAzu rakSitum||5||

gaLOdarE vipulitavarSmaNA tvayA mahOragE luThati niruddhamArutE|
drutaM bhavAnvidalitakaNThamaNDalO vimOcayanpazupazUn viniryayau||6||

kSaNaM divi tvadupagamArthamAsthitaM mahAsuraprabhavamahO mahO mahat|
vinirgatE tvayi tu nilInamaJjasA nabhaHsthalE nanRturathO jagussurAH||7||

savismayaiH kamalabhavAdibhiH surairanudRtastadanu gataH kumArakaiH|
dinE punastaruNadazAmupEyuSi svakairbhavAnatanuta bhOjanOtsavam||8||

viSANikAmapi muraLIM nitambakE nivEzayankabaLadharaH karAmbujE|
prahAsayankalavacanaiH kumArakAn bubhOjitha tridazagaNairmudA nutaH||9||

sukhAzanaM tviha tava gOpamaNDalE makhAzanAtpriyamiva dEvamaNDalE|
iti stutastridazavarairjagatpatE marutpurInilaya gadAtprapAhi mAm||10||