catuHpaJcAzattama-dazakam -- yamunAhRdE kAliyaH

tvatsEvOtkaH saubhArirnAma pUrvaM kAlindyantardvAdazAbdaM tapasyan|
mInavrAtE snEhavAnbhOgalOlE tArkSyaM sAkSAdaikSatAgrE kadAcit||1||

tvadvAhaM taM sakSudhaM tRkSasUnuM mInaM kaJcijjakSataM lakSayan saH|
taptazcittE zaptavAnatra cEttvaM jantUn bhOktA jIvitaM cApi mOktA||2||

tasminkAlE kAiyaH kSvELadarpAtsarpArAtEH kalpitaM bhAgamaznan|
tEna krOdhAttvatpadAmbhOjabhAjA pakSakSiptastaddurApaM payO'gAt||3||

ghOrE tasminsUrajAnIravAsE tIrE vRkSA vikSatAH kSvELavEgAt|
pakSivrAtAH pEturabhrE patantaH kAruNyArdraM tvanmanastEna jAtam||4||

kAlE tasminnEkadA sIrapANiM muk{}tvA yAtE yAmunaM kAnanAntam|
tvayyuddAmagrISmabhISmOSmataptA gOgOpAlA vyApiban kSvELatOyam||5||

nazyajjIvAn vicyutAn kSmAtalE tAn vizvAn pazyannacyuta tvaM dayArdraH|
prApyOpAntaM jIvayAmAsitha drAk pIyUSAmbhOvarSibhiH zrIkaTAkSaiH||6||

kiM kiM jAtO harSavarSAtirEkaH sarvAGgESvityutthitA gOpasaGghAH|
dRSTvA'grE tvAM tvatkRtaM tadvidantastvAmAliGgan dRSTanAnAprabhAvAH||7||

gAvazcaivaM labdhajIvAH kSaNEna sphItAnandAstvAM ca dRSTvA purastAt|
drAgAvavruH sarvatO harSabASpaM vyAmuJcantyO mandamudyanninAdAH||8||

rOmAJcO'yaM sarvatO naH zarIrE bhUyasyantaH kAcidAnandamUrchA|
AzcaryO'yaM kSvELavEgO mukundEtyuktO gOpairnanditO vanditO'bhUH||9||

EvaM bhaktAnmuktajIvAnapi tvaM mugdhApAGkairastarOgAMstanOSi|
tAdRgbhUtasphItakAruNyabhUmA rOgAtpAyA vAyugEhAdhinAtha||10||