EkaSaSTitama-dazakam -- viprapatnI-anugrahaH

tatazca vRndAvanatO'tidUratO vanaM gatastvaM khalu gOpagOkulaiH|
hRdantarE bhaktataradvijAGganAkadambakAnugrahaNAgrahaM vahan||1||

tatO nirIkSyAzaraNE vanAntarE kizOralOkaM kSudhitaM tRSAkulam|
adUratO yajJaparAn dvijAnprati vyasarjayO dIdiviyAcanAya tAn||2||

gatESvathO tESvabhidhAya tE'bhidhAM kumArakESvOdanayAciSu prabhO|
zrutisthirA apyabhinindyurazrutiM na kiJcidUcuzca mahIsurOttamAH||3||

anAdarAt khinnadhiyO hi bAlakAH samAyayuryuktamidaM hi yajvasu|
cirAdabhaktAH khalu tE mahIsurAH kathaM hi bhaktaM tvayi taiH samarpyatE||4||

nivEdayadhvaM gRhiNIjanAya mAM dizEyurannaM karuNAkulA imAH|
iti smitArdraM bhavatEritA gatAstE dArakA dArajanaM yayAcirE||5||

gRhItanAmni tvayi sambhramAkulAzcaturvidhaM bhOjyarasaM pragRhya tAH|
ciraM dhRtatvatpravilOkanAgrahAH svakairniruddhA api tUrNamAyayuH||6||

vilOlapiJchaM cikurE kapOlayOH samullasatkuNDalamArdramIkSitE|
nidhAya bAhuM suhRdaMsasImani sthitaM bhavantaM samalOkayanta tAH||7||

tadA ca kAcittvadupAgamOdyatA gRhItahastA dayitEna yajvanA|
tadaiva saJcintya bhavantamaJjasA vivEza kaivalyamahO kRtinyasau||8||

AdAya bhOjyAnyanugRhya tAH punastvadaGgasaGgaspRhayOjjhatIrgRham|
vilOkya yajJAya visarjayannimAzcakartha bhartRRnapi tAsvagarhaNAn||9||

nirUpya dOSaM nijamaGganAjanE vilOkya bhaktiM ca punarvicAribhiH|
prabuddhatattvaistvamabhiSTutO dvijairmarutpurAdhIza nirundhi mE gadAn||10||