saptaSaSTitama-dazakam -- bhagavataH tirOdhAnam

sphuratparAnandarasAtmakEna tvayA samAsAditabhOgalIlAH|
asImamAnandabharaM prapannA mahAntamApurmadamambujAkSyaH||1||

nilIyatE'sau mayi mayyamAyaM ramApatirvizvamanObhirAmaH|
itisma sarvAH kalitAbhimAnA nirIkSya gOvinda tirOhitO'bhUH||2||

rAdhAbhidhAM tAvadajAtagarvAmatipriyAM gOpavadhUM murArE|
bhavAnupAdAya gatO vidUraM tayA saha svairavihArakArI||3||

tirOhitE'tha tvayi jAtatApAH samaM samEtAH kamalAyatAkSyaH|
vanE vanE tvAM parimArgayantyO viSAdamApurbhagavannapAram||4||

hA cUta hA campaka karNikAra hA mallikE mAlati bAlavallyaH|
kiM vIkSitO nO hRdayaikacOra ityAdi tAstvatpravaNA vilEpuH||5||

nirIkSitO'yaM sakhi paGkajAkSaH purO mamEtyAkulamAlapantI|
tvAM bhAvanAcakSuSi vIkSya kAcittApaM sakhInAM dviguNIcakAra||6||

tvadAtmikAstA yamunAtaTAntE tavAnucakruH kila cESTitAni|
vicitya bhUyO'pi tathaiva mAnAt tvayA viyuktAM dadRzuzca rAdhAm||7||

tataH samaM tA vipinE samantAttamOvatArAvadhi mArgayantyaH|
punarvimizrA yamunAtaTAntE bhRzaM vilEpuzca jagurguNAMstE||8||

tathAvyathAsaGkulamAnasAnAM vrajAGganAnAM karuNaikasindhO|
jagattrayImOhanamOhanAtmA tvaM prAdurAsIrayi mandahAsI||9||

sandigdhasandarzanamAtmakAntaM tvAM vIkSya tanvyassahasA tadAnIm|
kiM kiM na cakruH pramadAtibhArAt sa tvaM gadAtpAlaya mArutEza||10||