EkOnAzItitama-dazakam -- rukmiNI-vivAhaH

balasamEtabalAnugatO bhavAn puramagAhata bhISmakamAnitaH|
dvijasutaM tvadupAgamavAdinaM dhRtarasA tarasA praNanAma sA||1||

bhuvanakAntamavEkSya bhavadvapurnRpasutasya nizamya ca cESTitam|
vipulakhEdajuSAM puravAsinAM saruditairuditairagamannizA||2||

tadanu vanditumindumukhI zivAM vihitamaGgalabhUSaNabhAsurA|
niragamadbhavadarpitajIvitA svapurataH purataH subhaTAvRtA||3||

kulavadhUbhirupEtya kumArikA girisutAM paripUjya ca sAdaram|
muhurayAcata tatpadapaGkajE nipatitA patitAM tava kEvalam||4||

samavalOka kutuhalasaGkulE nRpakulE nibhRtaM tvayi ca sthitE|
nRpasutA niragAt grijAlayAt suruciraM ruciraJjitadiGmukhA||5||

bhuvanamOhanarUparucA tadA vivazitAkhilarAjakadambayA|
tvamapi dEva kaTAkSavimOkSaNaiH pramadayA madayAJcakRSE manAk||6||

kva tu gamiSyasi candramukhIti tAM sarasamEtya karENa haran kSaNAt|
samadhirOpya rathaM tvamapAhRthA bhuvi tatO vitatO ninadO dviSAm||7||

kvanu gataH pazupAla iti krudhA kRtaraNA yadubhizca jitA nRpAH|
na tu bhavAnudacAlyata tairahO pizunakaiH zunakairiva kEsarI||8||

tadanu rukmiNamAgatamAhavE vadhamupEkSya nibadhya virUpayan|
hRtamadaM parimucya balOktibhiH puramayA ramayA saha kAntayA||9||

navasamAgamalajjitamAnasAM praNayakautukajRmbhitamanmathAm|
aramayaH khalu nAtha yathAsukhaM rahasi tAM hasitAMzulasanmukhIm||10||

vividhanarmabhirEvamaharnizaM pramadamAkalayanpunarEkadA|
RjumatEH kila vakrAgirA bhavAn varatanOratanOdatilOlatAm||11||

tadadhikairatha lAlanakauzalaiH praNayinImadhikaM ramayannimAm|
ayi mukunda bhavaccaritAni naH pragadatAM gadatAntimapAkuru||12||