From StotraSamhita

zItalASTakam

asya zrIzItalAstOtrasya mahAdEva RSiH|

anuSTup chandaH| zItalA dEvatA| lakSmIrbIjam|

bhavAnI zaktiH| sarvavisphOTakanivRtyarthE japE viniyOgaH||

Izvara uvAca

vandE'haM zItalAM dEvIM rAsabhasthAM digambarAm| mArjanIkalazOpEtAM zUrpAlaGkRtamastakAm||1||

vandE'haM zItalAM dEvIM sarvarOgabhayApahAm| yAmAsAdya nivartEta visphOTakabhayaM mahat||2||

zItalE zItalE cEti yO brUyAddAhapIDitaH| visphOTakabhayaM ghOraM kSipraM tasya praNazyati||3||

yastvAmudakamadhyE tu dhyAtvA sampUjayEnnaraH| visphOTakabhayaM ghOraM gRhE tasya na jAyatE||4||

zItalE jvaradagdhasya pUtigandhayutasya ca| praNaSTacakSuSaH puMsastvAmAhurjIvanauSadham||5||

zItalE tanujAn rOgAn nRNAM harasi dustyajAn| visphOTakavidIrNAnAM tvamEkA'mRtavarSiNI||6||

galagaNDagrahA rOgA yE cAnyE dAruNA nRNAm| tvadanudhyAnamAtrENa zItalE yAnti saGkSayam||7||

na mantrO nauSadhaM tasya pAparOgasya vidyatE| tvAmEkAM zItalE dhAtrIM nAnyAM pazyAmi dEvatAm||8||

mRNAlatantusadRzIM nAbhihRnmadhyasaMsthitAm| yastvAM saJcintayEddEvi tasya mRtyurna jAyatE||9||

aSTakaM zItalAdEvyA yO naraH prapaThEtsadA| visphOTakabhayaM ghOraM gRhE tasya na jAyatE||10||

zrOtavyaM paThitavyaM ca zraddhAbhaktisamanvitaiH| upasargavinAzAya paraM svastyayanaM mahat||11||

zItalE tvaM jaganmAtA zItalE tvaM jagatpitA| zItalE tvaM jagaddhAtrI zItalAyai namO namaH||12||

rAsabhO gardabhazcaiva kharO vaizAkhanandanaH| zItalAvAhanazcaiva dUrvAkandanikRntanaH||13||

EtAni kharanAmAni zItalAgrE tu yaH paThEt| tasya gEhE zizUnAM ca zItalAruG na jAyatE||14||

zItalASTakamEvEdaM na dEyaM yasyakasyacit| dAtavyaM ca sadA tasmai zraddhAbhaktiyutAya vai||15||

||iti zrIskAndapurANE zItalASTakaM sampUrNam||