zivarakSAstOtram

asya zrIzivarakSAstOtramantrasya yAjJavalkya RSiH|
zrIsadAzivO dEvatA|anuSTup chandaH|
zrIsadAzivaprItyarthE zivarakSAstOtrajapE viniyOgaH||

caritaM dEvadEvasya mahAdEvasya pAvanam|
apAraM paramOdAraM caturvargasya sAdhanam||

gaurIvinAyakOpEtaM paJcavaktraM trinEtrakam|
zivaM dhyAtvA dazabhujaM zivarakSAM paThEnnaraH||

kavacam

gaGgAdharaH ziraH pAtu phAlamardhEnduzEkharaH|
nayanE madanadhvaMsI karNO sarpavibhUSaNaH||1||

ghrANaM pAtu purArAtirmukhaM pAtu jagatpatiH|
jihvAM vAgIzvaraH pAtu kandharaM zitikandharaH||2||

zrIkaNThaH pAtu mE kaNThaM skandhau vizvadhurandharaH|
bhujau bhUbhArasaMhartA karau pAtu pinAkadhRk||3||

hRdayaM zaGkaraH pAtu jaTharaM girijApatiH|
nAbhiM mRtyuJjayaH pAtu kaTI vyAghrAjinAmbaraH||4||

sakthinI pAtu dInArtazaraNAgatavatsalaH|
UrU mahEzvaraH pAtu jAnunI jagadIzvaraH ||5||

jaGghE pAtu jagatkartA gulphau pAtu gaNAdhipaH|
caraNau karuNAsindhuH sarvAGgAni sadAzivaH||6||

phalazrutiH

EtAM zivabalOpEtAM rakSAM yaH sukRtI paThEt|
sa bhuktvA sakalAn kAmAn zivasAyujyamApnuyAt||

grahabhUtapizAcAdyAstrailOkyE vicaranti yE|
dUrAdAzu palAyantE zivanAmAbhirakSaNAm||

abhayaGkaranAmEdaM kavacaM pArvatIpatEH|
bhaktyA bibharti yaH kaNThE tasya vazyaM jagattrayam||

imAM nArAyaNaH svapnE zivarakSAM yathA'dizat|
prAtarUtthAya yOgIndrO yAjJavalkyastathA'likhat||

||iti zrImadyAjJavalkyamuniprOktaM zivarakSAstOtraM sampUrNam||