sUryASTOttarazatanAmastOtram

||dhyAnam||

dhyEyaH sadA savitRmaNDalamadhyavartI nArAyaNaH sarasijAsanasanniviSTaH|
kEyUravAn makarakuNDalavAn kirITI hArI hiraNmayavapurdhRtazaGkhacakraH||

||stOtram||

dhaumya uvAca

sUryO'ryamA bhagastvaSTA pUSA'rkaH savitA raviH|
gabhastimAnajaH kAlO mRtyurdhAtA prabhAkaraH||1||

pRthivyApazca tEjazca khaM vAyuzca parAyaNam|
sOmO bRhaspatiH zukrO budhO'GgAraka Eva ca||2||

indrO vivasvAn dIptAMzuH zuciH zauriH zanaizcaraH|
brahmA viSNuzca rudrazca skandO vai varuNO yamaH||3||

vaidyutO jATharazcAgniraindhanastEjasAM patiH|
dharmadhvajO vEdakartA vEdAGgO vEdavAhanaH||4||

kRtaM trEtA dvAparazca kaliH sarvamalAzrayaH|
kalAkASThAmuhUrtAzca kSapA yAmastathA kSaNaH||5||

saMvatsarakarO'zvatthaH kAlacakrO vibhAvasuH|
puruSaH zAzvatO yOgI vyaktAvyaktaH sanAtanaH||6||

kAlAdhyakSaH prajAdhyakSO vizvakarmA tamOnudaH|
varuNaH sAgarOM'zuzca jImUtO jIvanO'rihA||7||

bhUtAzrayO bhUtapatiH sarvalOkanamaskRtaH|
sraSTA saMvartakO vahniH sarvasyAdiralOlupaH||8||

anantaH kapilO bhAnuH kAmadaH sarvatOmukhaH|
jayO vizAlO varadaH sarvabhUtaniSEvitaH¹||9||

manaH suparNO bhUtAdiH zIghragaH prANadhArakaH|
dhanvatarirdhUmakEturAdidEvO'ditEH sutaH||10||

dvAdazAtmA'ravindAkSaH pitA mAtA pitAmahaH|
svargadvAraM prajAdvAraM mOkSadvAraM triviSTapam||11||

dEhakartA prazAntAtmA vizvAtmA vizvatOmukhaH|
carAcarAtmA sUkSmAtmA maitrEyaH karuNAnvitaH||12||

Etadvai kIrtanIyasya sUryasyAmitatEjasaH|
nAmASTazatakaM cEdaM prOktamEtat svayambhuvA||13||

suragaNapitRyakSasEvitaM hyasuranizAcarasiddhavanditam|
varakanakahutAzanaprabhaM praNipatitO'smi hitAya bhAskaram||14||

sUryOdayE yaH susamAhitaH paThEt sa putradArAn dhanaratnasaJcayAn|
labhEta jAtismaratAM naraH sadA dhRtiM ca mEdhAM ca sa vindatE pumAn||15||

imaM stavaM dEvavarasya yO naraH prakIrtayEcchuddhamanAH samAhitaH|
vimucyatE zOkadavAgnisAgarAllabhEta kAmAn manasA yathEpsitAn||16||

Variations

||iti zrImahAbhAratE vanaparvaNi dhaumyayudhiSThirasaMvAdE zrI sUryASTOttarazatanAmastOtraM sampUrNam||