zaGkarAcAryASTOttarazatanAmastOtram

dhyAnam

kailAsAcala-madhyasthaM kAmitAbhISTadAyakam|
brahmAdi-prArthanA-prApta-divyamAnuSa-vigraham||

bhaktAnugrahaNaikAnta-zAnta-svAnta-samujjvalam|
saMyajJaM saMyamIndrANAM sArvabhaumaM jagadgurum||

kiGkarIbhUtabhaktainaH paGkajAtavizOSaNam|
dhyAyAmi zaGkarAcAryaM sarvalOkaikazaGkaram ||

stOtram

zrIzaGkarAcAryavaryO brahmajJAnapradAyakaH|
ajJAnatimirAdityaH sujJAnAmbudhicandramA||1||

varNAzramapratiSThAtA zrImAn muktipradAyakaH|
ziSyOpadEzaniratO bhaktAbhISTapradAyakaH||2||

sUkSmatattvarahasyajJaH kAryAkAryaprabOdhakaH|
jJAnamudrAJcitakaraH ziSya-hRttApa-hArakaH||3||

pArivrAjyAzramOddhartA sarvatantrasvatantradhIH|
advaitasthApanAcAryaH sAkSAcchaGkararUpabhRt||4||

SaNmatasthApanAcAryastrayImArgaprakAzakaH|
vEdavEdAntatattvajJO durvAdimatakhaNDanaH||5||

vairAgyanirataH zAntaH saMsArArNavatArakaH|
prasannavadanAmbhOjaH paramArthaprakAzakaH||6||

purANasmRtisArajJO nityatRptO mahacchuciH|
nityAnandO nirAtaGkO niHsaGgO nirmalAtmakaH||7||

nirmamO nirahaGkArO vizvavandyapadAmbujaH|
sattvapradhAnaH sadbhAvaH saGkhyAtItaguNOjjvalaH||8||

anaghaH sArahRdayaH sudhIH sArasvatapradaH|
satyAtmA puNyazIlazca sAGkhyayOgavicakSaNaH||9||

tapOrAzirmahAtEjA guNatrayavibhAgavit|
kalighnaH kAladharmajJastamOguNanivArakaH||10||

bhagavAn bhAratIjEtA zAradAhvAnapaNDitaH|
dharmAdharmavibhAgajJO lakSyabhEdapradarzakaH||11||

nAdabindukalAbhijJO yOgihRtpadmabhAskaraH|
atIndriya-jJAnanidhirnityAnityavivEkavAn||12||

cidAnandazcinmayAtmA parakAya-pravEzakRt|
amAnuSa-caritrADhyaH kSEmadAyI kSamAkaraH||13||

bhavO bhadrapradO bhUrimahimA vizvaraJjakaH|
svaprakAzaH sadAdhArO vizvabandhuH zubhOdayaH||14||

vizAlakIrtirvAgIzaH sarvalOkahitOtsukaH|
kailAsayAtrA-samprApta-candramauli-prapUjakaH||15||

kAJcyAM zrIcakra-rAjAkhya-yantrasthApana-dIkSitaH|
zrIcakrAtmaka-tATaGka-pOSitAmbA-manOrathaH||16||

zrIbrahmasUtrOpaniSadbhASyAdigranthakalpakaH|
caturdikcaturAmnAyapratiSThAtA mahAmatiH||17||

dvisaptati-matOcchEttA sarvadigvijayaprabhuH|
kASAyavasanOpEtO bhasmOddhUlitavigrahaH||18||

jJAnAtmakaikadaNDADhyaH kamaNDalulasatkaraH|
vyAsasandarzanaprItO bhagavatpAdasaMjJakaH||19||

catuHSaSTikalAbhijJO brahmarAkSasa-mOkSadaH|
saundaryalaharImukhyabahustOtravidhAyakaH||20||

zrImanmaNDanamizrAkhyasvayambhUjayasannutaH|
tOTakAcAryasampUjyaH padmapAdArcitAGghrikaH||21||

hastAmalakayOgIndrabrahmajJAnapradAyakaH|
surEzvarAdi-sacchiSya-sannyAsAzrama-dAyakaH||22||

nirvyAjakaruNAmUrtirjagatpUjyO jagadguruH
bhErIpaTahavAdyAdirAjalakSaNalakSitaH|
sakRtsmaraNasantuSTaH sarvajJO jJAnadAyakaH||23||

||iti zrI-zaGkarAcAryASTOttarazatanAmastOtraM sampUrNam||