zAradAbhujaGgaprayAtASTakam

suvakSOjakumbhAM sudhApUrNakumbhAm
prasAdAvalambAM prapuNyAvalambAm|
sadAsyEndubimbAM sadAnOSThabimbAm
bhajE zAradAmbAmajasraM madambAm||1||

kaTAkSE dayArdrO karE jJAnamudrAm
kalAbhirvinidrAM kalApaiH subhadrAm|
purastrIM vinidrAM purastuGgabhadrAm
bhajE zAradAmbAmajasraM madambAm||2||

lalAmAGkaphAlAM lasadgAnalOlAm
svabhaktaikapAlAM yazaHzrIkapOlAm|
karE tvakSamAlAM kanatpratnalOlAm
bhajE zAradAmbAmajasraM madambAm||3||

susImantavENIM dRzA nirjitaiNIm
ramatkIravANIM namadvajrapANIm|
sudhAmantharAsyAM mudA cintyavENIm
bhajE zAradAmbAmajasraM madambAm||4||

suzAntAM sudEhAM dRgantE kacAntAm
lasatsallatAGgImanantAmacintyAm|
smarEttApasaiH saGgapUrvasthitAM tAm
bhajE zAradAmbAmajasraM madambAm||5||

kuraGgE turaGgE mRgEndrE khagEndrE
marAlE madEbhE mahOkSE'dhirUDhAm|
mahatyAM navamyAM sadA sAmarUpAm
bhajE zAradAmbAmajasraM madambAm||6||

jvalatkAntivahniM jaganmOhanAGgIm
bhajE mAnasAmbhOjasubhrAntabhRGgIm|
nijastOtrasaGgItanRtyaprabhAGgIm
bhajE zAradAmbAmajasraM madambAm||7||

bhavAmbhOjanEtrAjasampUjyamAnAm
lasanmandahAsaprabhAvaktracihnAm|
calaccaJcalAcArutATaGkakarNO -
bhajE zAradAmbAmajasraM madambAm||8||