From StotraSamhita

durgAstOtram (yudhiSThirakRtam)

vaizampAyana uvAca

virATanagaraM ramyaM gacchamAnO yudhiSThiraH| astuvanmanasA dEvIM durgAM tribhuvanEzvarIm||1||

yazOdAgarbhasambhUtAM nArAyaNavarapriyAm| nandagOpakulE jAtAM maGgalyAM kulavardhanIm||2||

kaMsavidrAvaNakarImasurANAM kSayaGkarIm| zilAtaTavinikSiptAmAkAzaM prati gAminIm||3||

vAsudEvasya bhaginIM divyamAlyavibhUSitAm| divyAmbaradharAM dEvIM khaGgakhETakadhAriNIm||4||

bhArAvataraNE puNyE yE smaranti sadA zivAm| tAnvai tArayatE pApAtpaGkE gAmiva durbalAm||5||

stOtuM pracakramE bhUyO vividhaiH stOtrasambhavaiH| Amantrya darzanAkAGkSI rAjA dEvIM sahAnujaH||6||

namOstu varadE kRSNE kumAri brahmacAriNi| bAlArkasadRzAkArE pUrNacandranibhAnanE||7||

caturbhujE caturvakrE pInazrONipayOdharE| mayUrapicchavalayE kEyUrAGgadadhAriNi||8||

bhAsi dEvi yathA padmA nArAyaNaparigrahaH| svarUpaM brahmacaryaM ca vizadaM tava khEcari||9||

kRSNacchavisamA kRSNA saGkarSaNasamAnanA| bibhratI vipulau bAhu zakradhvajasamucchrayau||10||

pAtrI ca paGkajI ghaNTI strI vizuddhA ca yA bhuvi| pAzaM dhanurmahAcakraM vividhAnyAyudhAni ca||11||

kuNDalAbhyAM supUrNAbhyAM karNAbhyAM ca vibhUSitA| candravispardhinA dEvi mukhEna tvaM virAjasE||12||

mukuTEna vicitrENa kEzabandhEna zObhinA| bhujaGgAbhOgavAsEna zrONisUtrENa rAjatA||13||

vibhrAjasE cA''baddhEna bhOgEnEvEha mandaraH| dhvajEna zikhipicchAnAmucchritEna virAjasE||14||

kaumAraM vratamAsthAya tridivaM pAvitaM tvayA| tEna tvaM stUyasE dEvi tridazaiH pUjyasE'pi ca||15||

trailOkyarakSaNArthAya mahiSAsuranAzini| prasannA mE surazrESThE dayAM kuru zivA bhava||16||

jayA tvaM vijayA caiva saGgrAmE ca jayapradA| mamApi vijayaM dEhi varadA tvaM ca sAmpratam||17||

vindhyE caiva nagazrESThE tava sthAnaM hi zAzvatam| kAli kAli mahAkAli zIdhumAMsapazupriyE||18||

kRtAnuyAtrA bhUtaistvaM varadA kAmacAriNI| bhArAvatArE yE ca tvAM saMsmariSyanti mAnavAH||19||

praNamanti ca yE tvAM hi prabhAtE tu narA bhuvi| na tESAM durlabhaM kiJcitputratO dhanatOpi vA||20||

durgAttArayasE durgE tattvaM durgA smRtA janaiH
kAntArESvavasannAnAM magrAnAM ca mahArNavE|
dasyubhirvA niruddhAnAM tvaM gatiH paramA nRNAm||21||

jalaprataraNE caiva kAntArESvaTavISu ca| yE smaranti mahAdEvi na ca sIdanti tE narAH||22||

tvaM kIrtiH zrIrdhRtiH siddhirhrIrvidyA santatirmatiH| sandhyA rAtriH prabhA nidrA jyOtsnA kAntiHkSamAdayA||23||

nRNAM ca bandhanaM mOhaM putranAzaM dhanakSayam| vyAdhiM mRtyuM bhayaM caiva pUjitA nAzayiSyasi||24||

sOhaM rAjyAtparibhraSTaH zaraNaM tvAM prapannavAn| praNatazca yathA mUrdhnA tava dEvi surEzvari||25||

trAhi mAM padmapatrAkSi satyE satyA bhavasva naH| zaraNaM bhava mE durgE zaraNyE bhaktavatsalE||26||

EvaM stutA hi sA dEvI darzayAmAsa pANDavam| upagamya tu rAjAnamidaM vacanamabravIt||27||

dEvyuvAca

zRNu rAjanmahAbAhO madIyaM vacanaM prabhO| bhaviSyatyacirAdEva saGgrAmE vijayastava||28||

mama prasAdAnnirjitya hatvA kauravavAhinIm| rAjyaM niSkaNTakaM kRtvA bhOkSyasE mEdinIM punaH||29||

bhrAtRbhiH sahitO rAjanprItiM prApsyasi puSkalAm| matprasAdAcca tE saukhyamArOgyaM ca bhaviSyati||30||

yE ca saGkIrtayiSyanti lOkE vigatakalmaSAH| tESAM tuSTA pradAsyAmi rAjyamAyurvapuH sutam||31||

pravAsE nagarE vA'pi saGgrAmE zatrusaGkaTE| aTavyAM durgakAntArE sAgarE gahanE girau||32||

yE smariSyanti mAM rAjanyathA'haM bhavatA smRtA| na tESAM durlabhaM kiJcidasmiँllOkE bhaviSyati||33||

idaM stOtravaraM bhaktyA zRNuyAdvA paThEta vA| tasya sarvANi kAryANi siddhiM yAsyanti pANDavAH||34||

matprasAdAcca vaH sarvAnvirATanagarE sthitAn| na prajJAsyanti kurakO narA vA tannivAsinaH||35||

ityuktvA varadA dEvI yudhiSThiramarindamam| rakSAM kRtvA ca pANDUnAM tatraivAntaradhIyata||36||

||iti zrImanmahAbhAratE virATaparvaNi pANDavapravEzaparvaNi aSTamO'dhyAyaH||