AdityahRdayam

tatO yuddhaparizrAntaM samarE cintayA sthitam|
rAvaNaM cAgratO dRSTvA yuddhAya samupasthitam||1||

daivataizca samAgamya draSTumabhyAgatO raNam|
upAgamyAbravIdrAmam agastyO bhagavAn RSiH||2||

rAma rAma mahAbAhO zRNu guhyaM sanAtanam|
yEna sarvAnarIn vatsa samarE vijayiSyasi||3||

AdityahRdayaM puNyaM sarvazatruvinAzanam|
jayAvahaM japEnnityam akSayyaM paramaM zivam||4||

sarvamaGgalamAGgalyaM sarvapApapraNAzanam|
cintAzOkaprazamanam Ayurvardhanamuttamam||5||

razmimantaM samudyantaM dEvAsuranamaskRtam|
pUjayasva vivasvantaM bhAskaraM bhuvanEzvaram||6||

sarvadEvAtmakO hyESa tEjasvI razmibhAvanaH|
ESa dEvAsuragaNAn lOkAn pAti gabhastibhiH||7||

ESa brahmA ca viSNuzca zivaH skandaH prajApatiH|
mahEndrO dhanadaH kAlO yamaH sOmO hyapAM patiH||8||

pitarO vasavaH sAdhyA hyazvinau marutO manuH|
vAyurvahniH prajAprANa RtukartA prabhAkaraH||9||

AdityaH savitA sUryaH khagaH pUSA gabhastimAn|
suvarNasadRzO bhAnurhiraNyarEtA divAkaraH||10||

haridazvaH sahasrArciH saptasaptirmarIcimAn|
timirOnmathanaH zambhustvaSTA mArtANDa aMzumAn||11||

hiraNyagarbhaH zizirastapanO bhAskarO raviH|
agnigarbhO'ditEH putraH zaGkhaH ziziranAzanaH||12||

vyOmanAthastamObhEdI RgyajussAmapAragaH|
ghanavRSTirapAM mitrO vindhyavIthIplavaGgamaH||13||

AtapI maNDalI mRtyuH piGgalaH sarvatApanaH|
kavirvizvO mahAtEjA raktaH sarvabhavOdbhavaH||14||

nakSatragrahatArANAm adhipO vizvabhAvanaH|
tEjasAmapi tEjasvI dvAdazAtman namO'stu tE||15||

namaH pUrvAya girayE pazcimAyAdrayE namaH|
jyOtirgaNAnAM patayE dinAdhipatayE namaH||16||

jayAya jayabhadrAya haryazvAya namO namaH|
namO namaH sahasrAMzO AdityAya namO namaH||17||

nama ugrAya vIrAya sAraGgAya namO namaH|
namaH padmaprabOdhAya mArtANDAya namO namaH||18||

brahmEzAnAcyutEzAya sUryAyAdityavarcasE|
bhAsvatE sarvabhakSAya raudrAya vapuSE namaH||19||

tamOghnAya himaghnAya zatrughnAyAmitAtmanE|
kRtaghnaghnAya dEvAya jyOtiSAM patayE namaH||20||

taptacAmIkarAbhAya vahnayE vizvakarmaNE|
namastamO'bhinighnAya rucayE lOkasAkSiNE||21||

nAzayatyESa vai bhUtaM tadEva sRjati prabhuH|
pAyatyESa tapatyESa varSatyESa gabhastibhiH||22||

ESa suptESu jAgarti bhUtESu pariniSThitaH|
ESa EvAgnihOtraM ca phalaM caivAgnihOtriNAm||23||

vEdAzca kratavazcaiva kratUnAM phalamEva ca|
yAni kRtyAni lOkESu sarva ESa raviH prabhuH||24||

phalazrutiH

EnamApatsu kRcchrESu kAntArESu bhayESu ca|
kIrtayan puruSaH kazcinnAvasIdati rAghava||25||

pUjayasvainamEkAgrO dEvadEvaM jagatpatim|
Etat triguNitaM japtvA yuddhESu vijayiSyasi||26||

asmin kSaNE mahAbAhO rAvaNaM tvaM vadhiSyasi|
EvamuktvA tadA'gastyO jagAma ca yathA''gatam||27||

EtacchrutvA mahAtEjA naSTazOkO'bhavattadA|
dhArayAmAsa suprItO rAghavaH prayatAtmavAn||28||

AdityaM prEkSya japtvA tu paraM harSamavAptavAn|
trirAcamya zucirbhUtvA dhanurAdAya vIryavAn||29||

rAvaNaM prEkSya hRSTAtmA yuddhAya samupAgamat|
sarvayatnEna mahatA vadhE tasya dhRtO'bhavat||30||

atha raviravadannirIkSya rAmaM muditamanAH paramaM prahRSyamANaH|
nizicarapatisaGkSayaM viditvA suragaNamadhyagatO vacastvarEti||31||

||ityArSE zrImadrAmAyaNE vAlmIkIyE AdikAvyE yuddhakANDE AdityahRdayaM nAma saptOttarazatatamaH sargaH||