From StotraSamhita
sarasvatIstOtraM zrImad-brahmaviracitam
||nyAsaH||
OM asya zrIsarasvatIstOtramantrasya|
brahmA RSiH| gAyatrI chandaH| zrIsarasvatI dEvatA|
dharmArthakAmamOkSArthE japE viniyOgaH|
||stOtram||
ArUDhA zvEtahaMsE bhramati ca gaganE dakSiNE cAkSasUtram vAmE hastE ca divyAmbarakanakamayaM pustakaM jJAnagamyA| sA vINAM vAdayantI svakarakarajapaiH zAstravijJAnazabdaiH krIDantI divyarUpA karakamaladharA bhAratI suprasannA||1|| |
zvEtapadmAsanA dEvI zvEtagandhAnulEpanA|
arcitA munibhiH sarvair-RSibhiH stUyatE sadA| +EvaM dhyAtvA sadA dEvIM vAJchitaM labhatE naraH||2|| |
zuklAM brahmavicArasAraparamAmAdyAM jagadvyApinIm vINApustakadhAriNImabhayadAM jADyAndhakArApahAm| hastE sphaTikamAlikAM vidadhatIM padmAsanE saMsthitAM vandE tAM paramEzvarIM bhagavatIM buddhipradAM zAradAm||3|| |
yA kundEndutuSArahAradhavalA yA zubhravastrAvRtA yA vINAvaradaNDamaNDitakarA yA zvEtapadmAsanA| yA brahmAcyutazaGkaraprabhRtibhirdEvaiH sadA vanditA sA mAM pAtu sarasvatI bhagavatI niHzESajADyApahA||4|| |
hrIM hrauM hRdyaikabIjE zazirucikamalE kalpavispaSTazObhE bhavyE bhavyAnukUlE kumativanadavE vizvavandyAGghripadmE| padmE padmOpaviSTE praNajanamanOmOdasampAdayitri prOtphullajJAnakUTE harinijadayitE dEvi saMhArasArE||5|| |
aiM aiM aiM dRSTamantrE kamalabhavamukhAmbhOjabhUtasvarUpE rUpArUpaprakAzE sakalaguNamayE nirguNE nirvikArE| na sthUlE naiva sUkSmE'pyaviditavibhavE nApi vijJAnatattvE vizvE vizvAntarAtmE suravaranamitE niSkalE nityazuddhE||6|| |
hrIM hrIM hrIM jApyatuSTE himarucimukuTE vallakIvyagrahastE mAtarmAtarnamastE daha daha jaDatAM dEhi buddhiM prazastAm| vidyE vEdAntavEdyE pariNatapaThitE mOkSadE muktimArgE mArgAtItasvarUpE bhava mama varadA zAradE zubhrahArE||7|| |
dhIM dhIM dhIM dhAraNAkhyE dhRtimatinatibhirnAmabhiH kIrtanIyE nityE'nityE nimittE munigaNanamitE nUtanE vai purANE| puNyE puNyapravAhE hariharanamitE nityazuddhE suvarNE mAtarmAtrArdhatattvE matimati matidE mAdhavaprItimOdE||8|| |
hUM hUM hUM svarUpE daha daha duritaM pustakavyagrahastE santuSTAkAracittE smitamukhi subhagE jRmbhiNi stambhavidyE| mOhE mugdhapravAhE kuru mama vimatidhvAntavidhvaMsamIDE gIrgaurvAgbhArati tvaM kavivararasanAsiddhidE siddhisAdhyE||9|| |
staumi tvAM tvAM ca vandE mama khalu rasanAM nO kadAcit tyajEthA mA mE buddhirviruddhA bhavatu na ca manO dEvi mE yAtu pApam| mA mE duHkhaM kadAcit kvacidapi viSayE'pyastu mE nAkulatvam zAstrE vAdE kavitvE prasaratu mama dhIrmA'stu kuNThA kadA'pi||10|| |
ityEtaiH zlOkamukhyaiH pratidinamuSasi stauti yO bhaktinamrO vANI vAcaspatErapyaviditavibhavO vAkpaTurmRSTakaNThaH| syAdiSTAdyarthalAbhaiH sutamiva satataM pAtitaM sA ca dEvI saubhAgyaM tasya lOkE prabhavati kavitA vighnamastaM prayAti||11|| |
nirvighnaM tasya vidyA prabhavati satataM cAzrutagranthabOdhaH kIrtisrailOkyamadhyE nivasati vadanE zAradA tasya sAkSAt| dIrghAyurlOkapUjyaH sakalaguNanidhiH santataM rAjamAnyO - vAgdEvyAH samprasAdAt trijagati vijayI jAyatE satsabhAsu||12|| |
brahmacArI vratI maunI trayOdazyAM nirAmiSaH| sArasvatO janaH pAThAt sakRdiSTArthalAbhavAn||13|| |
pakSadvayE trayOdazyAm EkaviMzatisaGkhyayA| +avicchinnaH paThEddhImAn dhyAtvA dEvIM sarasvatIm||14|| |
sarvapApavinirmuktaH subhagO lOkavizrutaH| vAJchitaM phalamApnOti lOkE'sminnAtra saMzayaH||15|| |
brahmaNEti svayaM prOktaM sarasvatyAH stavaM zubham| prayatnEna paThEnnityaM sO'mRtatvAya kalpatE||16|| |
||iti zrImadbrahmaNA viracitaM sarasvatIstOtraM sampUrNam||
