brahmakRtarAmastavaH

tatO hi durmanA rAmaH zrutvaivaM vadatAM giraH|
dadhyau muhUrtaM dharmAtmA bASpavyAkulalOcanaH||1||

tatO vaizravaNO rAjA yamazca pitRbhiH saha|
sahasrAkSazca dEvEzO varuNazca jalEzvaraH||2||

SaDardhanayanaH zrImAnmahAdEvO vRSadhvajaH|
kartA sarvasya lOkasya brahmA brahmavidAM varaH||3||

EtE sarvE samAgamya vimAnaiH sUryasannibhaiH|
Agamya nagarIM laGkAm abhijagmuzca rAghavam||4||

tataH sahastAbharaNAn pragRhya vipulAn bhujAn|
abruvaMstridazazrESThAH prAJjaliM rAghavaM sthitam||5||

kartA sarvasya lOkasya zrESThO jJAnavidAM vibhuH|
upEkSasE kathaM sItAM patantIM havyavAhanE||6||

kathaM dEvagaNazrESTham AtmAnaM nAvabudhyasE|
RtadhAmA vasuH pUrvaM vasUnAM tvaM prajApatiH||7||

trayANAM tvaM hi lOkAnAm AdikartA svayamprabhuH|
rudrANAmaSTamO rudraH sAdhyAnAmasi paJcamaH||8||

azvinau cApi tE karNau candrasUryau ca cakSuSI|
antE cAdau ca lOkAnAm dRzyasE tvaM parantapa||9||

upEkSasE ca vaidEhIM mAnuSaH prAkRtO yathA|
ityuktO lOkapAlaistaiH svAmI lOkasya rAghavaH||10||

abravIt tridazazrESThAn rAmO dharmabhRtAM varaH|
AtmAnaM mAnuSaM manyE rAmaM dazarathAtmajam||11||

yO'haM yasya yatazcAhaM bhagavAMstad bravItu mE|
iti bruvantaM kAkutsthaM brahmA brahmavidAM varaH||12||

abravIcchRNu mE rAma satyaM satyaparAkrama|
bhavAn nArAyaNO dEvaH zrImAMzcakrAyudhaH prabhuH||13||

EkazRGgO varAhastvaM bhUtabhavyasapatnajit|
akSaraM brahma satyaM ca madhyE cAntE ca rAghava||14||

lOkAnAM tvaM parO dharmO viSvaksEnazcaturbhujaH|
zArGgadhanvA hRSIkEzaH puruSaH puruSOttamaH||15||

ajitaH khaDgadhRd viSNuH kRSNazcaiva sanAtanaH|
sEnAnIrgrAmaNIzca tvaM buddhiH sattvaM kSamA damaH||16||

prabhavazcApyayazca tvam upEndrO madhusUdanaH|
indrakarmA mahEndrastvaM padmanAbhO raNAntakRt||17||

zaraNyaM zaraNaM ca tvAm AhurdivyA maharSayaH|
sahasrazRGgO vEdAtmA zatazIrSO maharSabhaH||18||

tvaM trayANAM hi lOkAnAm AdikartA svayamprabhuH|
siddhAnAmapi sAdhyAnAm AzrayazcAsi pUrvajaH||19||

tvaM yajJastvaM vaSaTkArastvamOGkAraH parAtparaH|
prabhavaM nidhanaM vA tE nO viduH kO bhavAniti||20||

dRzyasE sarvabhUtESu brAhmaNESu ca gOSu ca|
dikSu sarvAsu gaganE parvatESu vanESu ca||21||

sahasracaraNaH zrImAn zatazIrSaH sahasradRk|
tvaM dhArayasi bhUtAni pRthivIM ca saparvatAm||22||

antE pRthivyAH salilE dRzyasE tvaM mahOragaH|
trIn lOkAn dhArayan rAma dEvagandharvadAnavAn||23||

ahaM tE hRdayaM rAma jihvA dEvI sarasvatI|
dEvA gAtrESu rOmANi brahmaNA nirmitAH prabhO||24||

nimESastE bhavEd rAtrirunmESastE bhavEd divA|
saMskArAstE'bhavan vEdA na tadasti tvayA vinA||25||

jagat sarvaM zarIraM tE sthairyaM tE vasudhAtalam|
agniH kOpaH prasAdastE sOmaH zrIvatsalakSaNaH||26||

tvayA lOkAstrayaH krAntAH purA svairvikramaistribhiH|
mahEndrazca kRtO rAjA baliM baddhvA mahAsuram||27||

sItA lakSmIrbhavAn viSNuH dEvaH kRSNaH prajApatiH|
vadhArthaM rAvaNasyEha praviSTO mAnuSIM tanum||28||

tadidaM naH kRtaM kAryaM tvayA dharmabhRtAM vara|
nihatO rAvaNO rAma prahRSTO divamAkrama||29||

amOghaM balavIryaM tE amOghastE parAkramaH|
amOghaM darzanaM rAma amOghastava saMstavaH||30||

amOghAstE bhaviSyanti bhaktimantO narA bhuvi|
yE tvAM dEvaM dhruvaM bhaktAH purANaM puruSOttamam||31||

prApnuvanti sadA kAmAn iha lOkE paratra ca
imamArSaM stavaM nityam itihAsaM purAtanam|
yE narAH kIrtayiSyanti tESAM nAsti parAbhavaH||32||

||ityArSE zrImadrAmAyaNE vAlmIkIyE AdikAvyE caturviMzatisahasrikAyAM saMhitAyAM yuddhakANDE brahmakRtarAmastavO nAma viMzatyadhikazatatamaH sargaH||