mahAgaNEzapaJcaratnam

mudAkarAttamOdakaM sadAvimuktisAdhakam
kalAdharAvataMsakaM vilAsilOkarakSakam|
anAyakaikanAyakaM vinAzitEbhadaityakam
natAzubhAzunAzakaM namAmi taM vinAyakam||1||

natEtarAtibhIkaraM navOditArkabhAsvaram
namatsurArinirjaraM natAdhikApaduddharam|
surEzvaraM nidhIzvaraM gajEzvaraM gaNEzvaram
mahEzvaraM tamAzrayE parAtparaM nirantaram||2||

samastalOkazaGkaraM nirastadaityakuJjaram
darEtarOdaraM varaM varEbhavaktramakSaram|
kRpAkaraM kSamAkaraM mudAkaraM yazaskaram
manaskaraM namaskRtAM namaskarOmi bhAsvaram||3||

akiJcanArtimArjanaM cirantanOktibhAjanam
purAripUrvanandanaM surArigarvacarvaNam|
prapaJcanAzabhISaNaM dhanaJjayAdibhUSaNam
kapOladAnavAraNaM bhajE purANavAraNam||4||

nitAntakAntadantakAntimantakAntakAtmajam
acintyarUpamantahInamantarAyakRntanam|
hRdantarE nirantaraM vasantamEva yOginAm
tamEkadantamEva taM vicintayAmi santatam||5||

mahAgaNEzapaJcaratnamAdarENa yO'nvaham
prajalpati prabhAtakE hRdi smaran gaNEzvaram|
arOgatAmadOSatAM susAhitIM suputratAm
samAhitAyuraSTabhUtimabhyupaiti sO'cirAt||