gAyatrIstOtram

nArada uvAca

bhaktAnukampin sarvajJa hRdayaM pApanAzanam|
gAyatryAH kathitaM tasmAdgAyatryAH stOtramIraya||1||

AdizaktE jaganmAtarbhaktAnugrahakAriNi|
sarvatra vyApikE'nantE zrIsandhyE tE namO'stu tE||2||

tvamEva sandhyA gAyatrI sAvitrI ca sarasvatI|
brahmANI vaiSNavI raudrI raktazvEtA sitEtarA||3||

prAtarbAlA ca madhyAhnE yauvanasthA bhavEtpunaH|
vRddhA sAyaM bhagavatI cintyatE munibhiH sadA||4||

haMsasthA garuDArUDhA tathA vRSabhavAhinI|
RgvEdAdhyAyinI bhUmau dRzyatE yA tapasvibhiH||5||

yajurvEdaM paThantI ca hyantarikSE virAjatE|
yA sAmagA'pi sarvESu bhrAmyamANA tathA bhuvi||6||

rudralOkaM gatA tvaM hi viSNulOkanivAsinI|
tvamEva brahmaNO lOkE'martyAnugrahakAriNI||7||

saptarSiprItijananI mAyA bahuvarapradA|
zivayOH karanEtrOtthA hyazrusvEdasamudbhavA||8||

AnandajananI durgA dazadhA paripaThyatE|
varENyA varadA caiva variSThA varavarNinI||9||

gariSThA ca varAhI ca varArOhA ca saptamI|
nIlagaGgA tathA sandhyA sarvadA bhOgamOkSadA||10||

bhAgIrathI martyalOkE pAtAlE bhOgavatyapi|
trilOkavAhinI dEvI sthAnatrayanivAsinI||11||

bhUrlOkasthA tvamEvAsi dharitrI zOkadhAriNI|
bhuvO lOkE vAyuzaktiH svarlOkE tEjasAM nidhiH||12||

maharlOkE mahAsiddhirjanalOkE'janEtyapi|
tapasvinI tapOlOkE satyalOkE tu satyavAk||13||

kamalA viSNulOkE ca gAyatrI brahmalOkagA|
rudralOkE sthitA gaurI harArdhAGganivAsinI||14||

ahamO mahatazcaiva prakRtistvaM hi gIyasE|
sAmyAvasthAtmikA tvaM hi zabalabrahmarUpiNI||15||

tataH parA parAzaktiH paramA tvaM hi gIyasE|
icchAzaktiH kriyAzaktirjJAnazaktistrizaktidA||16||

gaGgA ca yamunA caiva vipAzA ca sarasvatI|
sarayU rEvikA sindhurnarmadairAvatI tathA||17||

gOdAvarI zatadruzca kAvErI dEvalOkagA|
kauzikI candrabhAgA ca vitastA ca sarasvatI||18||

gaNDakI tApinI tOyA gOmatI vEtravatyapi|
iDA ca piGgalA caiva suSumNA ca tRtIyakA||19||

gAndhArI hastajihvA ca pUSA'pUSA tathaiva ca|
alambuSA kuhUzcaiva zaGkhinI prANavAhinI||20||

nADI ca tvaM zarIrasthA gIyasE prAktanairbudhaiH|
hRtpadmasthA prANazaktiH kaNThasthA svapnanAyikA||21||

tAlusthA tvaM sadAdhArA bindusthA bindumAlinI|
mUlE tu kuNDalIzaktirvyApinI kEzamUlagA||22||

zikhAmadhyAsanA tvaM hi zikhAgrE tu manOnmanI|
kimanyadbahunOktEna yatkiJcijjagatItrayE||23||

tatsarvaM tvaM mahAdEvi zriyE sandhyE namO'stu tE|
itIdaM kIrtitaM stOtraM sandhyAyAM bahupuNyadam||24||

mahApApaprazamanaM mahAsiddhividAyakam|
ya idaM kIrtayEt stOtraM sandhyAkAlE samAhitaH||25||

aputraH prApnuyAt putraM dhanArthI dhanamApnuyAt|
sarvatIrthatapOdAnayajJayOgaphalaM labhEt||26||

bhOgAn bhuktvA ciraM kAlamantE mOkSamavApnuyAt|
tapasvibhiH kRtaM stOtraM snAnakAlE tu yaH paThEt||27||

yatra kutra jalE magnaH sandhyAmajjanajaM phalam|
labhatE nAtra sandEhaH satyaM satyaM tu nArada||28||

zRNuyAdyO'pi tadbhaktyA sa tu pApAt pramucyatE|
pIyUSasadRzaM vAkyaM sandhyOktaM nAradEritam||29||

||iti zrI gAyatrI stOtraM sampUrNam||