From StotraSamhita

||tRtIyO'dhyAyaH - karma-yOgaH||

arjuna uvAca

jyAyasI cEt karmaNastE matA buddhirjanArdana| tat kiM karmaNi ghOrE mAM niyOjayasi kEzava||1|| jyAyasI cEt karmaNaH tE matA buddhiH janArdana| tat kiM karmaNi ghOrE mAM niyOjayasi kEzava||1|| +

vyAmizrENEva vAkyEna buddhiM mOhayasIva mE| tadEkaM vada nizcitya yEna zrEyO'hamApnuyAm||2|| vyAmizrENa iva vAkyEna buddhiM mOhayasi iva mE| tat EkaM vada nizcitya yEna zrEyaH aham ApnuyAm||2|| +

zrIbhagavAnuvAca

lOkE'smin dvividhA niSThA purA prOktA mayA'nagha| jJAnayOgEna sAGkhyAnAM karmayOgEna yOginAm||3|| lOkE asmin dvividhA niSThA purA prOktA mayA anagha| jJAnayOgEna sAGkhyAnAM karmayOgEna yOginAm||3|| +

na karmaNAmanArambhAnnaiSkarmyaM puruSO'znutE| na ca sannyasanAdEva siddhiM samadhigacchati||4|| na karmaNAm anArambhAt naiSkarmyaM puruSaH aznutE| na ca sannyasanAt Eva siddhiM samadhigacchati||4|| +

na hi kazcit kSaNamapi jAtu tiSThatyakarmakRt| kAryatE hyavazaH karma sarvaH prakRtijairguNaiH||5|| na hi kazcit kSaNam api jAtu tiSThati akarmakRt| kAryatE hi avazaH karma sarvaH prakRtijaiH guNaiH||5|| +

karmEndriyANi saMyamya ya AstE manasA smaran| indriyArthAn vimUDhAtmA mithyAcAraH sa ucyatE||6|| karmEndriyANi saMyamya yaH AstE manasA smaran| indriyArthAn vimUDhAtmA mithyAcAraH saH ucyatE||6|| +

yastvindriyANi manasA niyamya''rabhatE'rjuna| karmEndriyaiH karmayOgamasaktaH sa viziSyatE||7|| yaH tu indriyANi manasA niyamya ArabhatE arjuna| karmEndriyaiH karmayOgam asaktaH saH viziSyatE||7|| +

niyataM kuru karma tvaM karma jyAyO hyakarmaNaH| zarIrayAtrA'pi ca tE na prasiddhyEdakarmaNaH||8|| niyataM kuru karma tvaM karma jyAyaH hi akarmaNaH| zarIrayAtrA api ca tE na prasiddhyEt akarmaNaH||8|| +

yajJArthAt karmaNO'nyatra lOkO'yaM karmabandhanaH| tadarthaM karma kauntEya muktasaGgaH samAcara||9|| yajJArthAt karmaNaH anyatra lOkaH ayaM karmabandhanaH| tat arthaM karma kauntEya muktasaGgaH samAcara||9|| +

sahayajJAH prajAH sRSTvA purOvAca prajApatiH| anEna prasaviSyadhvamESa vO'stviSTakAmadhuk||10|| sahayajJAH prajAH sRSTvA purA uvAca prajApatiH| anEna prasaviSyadhvam ESaH vaH astu iSTakAmadhuk||10|| +

dEvAn bhAvayatA'nEna tE dEvA bhAvayantu vaH| parasparaM bhAvayantaH zrEyaH paramavApsyatha||11|| dEvAn bhAvayata anEna tE dEvAH bhAvayantu vaH| parasparaM bhAvayantaH zrEyaH param avApsyatha||11|| +

iSTAn bhOgAn hi vO dEvA dAsyantE yajJabhAvitAH| tairdattAnapradAyaibhyO yO bhuGktE stEna Eva saH||12|| iSTAn bhOgAn hi vaH dEvAH dAsyantE yajJabhAvitAH| taiH dattAn apradAya EbhyaH yaH bhuGktE stEnaH Eva saH||12|| +

yajJaziSTAzinaH santO mucyantE sarvakilbiSaiH| bhuJjatE tE tvaghaM pApA yE pacantyAtmakAraNAt||13|| yajJaziSTa AzinaH santaH mucyantE sarvakilbiSaiH| bhuJjatE tE tu aghaM pApAH yE pacanti AtmakAraNAt||13|| +

annAdbhavanti bhUtAni parjanyAdannasambhavaH| yajJAdbhavati parjanyO yajJaH karmasamudbhavaH||14|| annAt bhavanti bhUtAni parjanyAt annasambhavaH| yajJAt bhavati parjanyaH yajJaH karmasamudbhavaH||14|| +

karma brahmOdbhavaM viddhi brahmAkSarasamudbhavam| tasmAt sarvagataM brahma nityaM yajJE pratiSThitam||15|| karma brahmOdbhavaM viddhi brahma akSarasamudbhavam| tasmAt sarvagataM brahma nityaM yajJE pratiSThitam||15|| +

EvaM pravartitaM cakraM nAnuvartayatIha yaH| aghAyurindriyArAmO mOghaM pArtha sa jIvati||16|| EvaM pravartitaM cakraM na anuvartayati iha yaH| aghAyuH indriyArAmaH mOghaM pArtha saH jIvati||16|| +

yastvAtmaratirEva syAdAtmatRptazca mAnavaH| AtmanyEva ca santuSTastasya kAryaM na vidyatE||17|| yaH tu AtmaratiH Eva syAt AtmatRptaH ca mAnavaH| Atmani Eva ca santuSTaH tasya kAryaM na vidyatE||17|| +

naiva tasya kRtEnArthO nAkRtEnEha kazcana| na cAsya sarvabhUtESu kazcidarthavyapAzrayaH||18|| na Eva tasya kRtEna arthaH na akRtEna iha kazcana| na ca asya sarvabhUtESu kazcit arthavyapAzrayaH||18|| +

tasmAdasaktaH satataM kAryaM karma samAcara| asaktO hyAcaran karma paramApnOti pUruSaH||19|| tasmAt asaktaH satataM kAryaM karma samAcara| asaktaH hi Acaran karma param ApnOti pUruSaH||19|| +

karmaNaiva hi saMsiddhim AsthitA janakAdayaH| lOkasaGgrahamEvApi sampazyan kartumarhasi||20|| karmaNA Eva hi saMsiddhim AsthitAH janakAdayaH| lOkasaGgraham Eva api sampazyan kartum arhasi||20|| +

yadyadAcarati zrESThastattadEvEtarO janaH| sa yat pramANaM kurutE lOkastadanuvartatE||21|| yat yat Acarati zrESThaH tat tat Eva itaraH janaH| saH yat pramANaM kurutE lOkaH tat anuvartatE||21|| +

na mE pArthAsti kartavyaM triSu lOkESu kiJcana| nAnavAptamavAptavyaM varta Eva ca karmaNi||22|| na mE pArtha asti kartavyaM triSu lOkESu kiJcana| na anavAptam avAptavyaM vartE Eva ca karmaNi||22|| +

yadi hyahaM na vartEyaM jAtu karmaNyatandritaH| mama vartmAnuvartantE manuSyAH pArtha sarvazaH||23|| yadi hi ahaM na vartEyaM jAtu karmaNi atandritaH| mama vartma anuvartantE manuSyAH pArtha sarvazaH||23|| +

utsIdEyurimE lOkA na kuryAM karma cEdaham| saGkarasya ca kartA syAmupahanyAmimAH prajAH||24|| utsIdEyuH imE lOkAH na kuryAM karma cEt aham| saGkarasya ca kartA syAm upahanyAm imAH prajAH||24|| +

saktAH karmaNyavidvAMsO yathA kurvanti bhArata| kuryAdvidvAMstathA'saktazcikIrSurlOkasaGgraham||25|| saktAH karmaNi avidvAMsaH yathA kurvanti bhArata| kuryAt vidvAn tathA asaktaH cikIrSuH lOkasaGgraham||25|| +

na buddhibhEdaM janayEdajJAnAM karmasaGginAm| jOSayEt sarvakarmANi vidvAn yuktaH samAcaran||26|| na buddhibhEdaM janayEt ajJAnAM karmasaGginAm| jOSayEt sarvakarmANi vidvAn yuktaH samAcaran||26|| +

prakRtEH kriyamANAni guNaiH karmANi sarvazaH| ahaGkAravimUDhAtmA kartA'hamiti manyatE||27|| prakRtEH kriyamANAni guNaiH karmANi sarvazaH| ahaGkAravimUDhAtmA kartA aham iti manyatE||27|| +

tattvavit tu mahAbAhO guNakarmavibhAgayOH| guNA guNESu vartanta iti matvA na sajjatE||28|| tattvavit tu mahAbAhO guNakarmavibhAgayOH| guNAH guNESu vartantE iti matvA na sajjatE||28|| +

prakRtErguNasammUDhAH sajjantE guNakarmasu| tAnakRtsnavidO mandAn kRtsnavinna vicAlayEt||29|| prakRtEH guNasammUDhAH sajjantE guNakarmasu| tAn akRtsnavidaH mandAn kRtsnavit na vicAlayEt||29|| +

mayi sarvANi karmANi sannyasyAdhyAtmacEtasA| nirAzIrnirmamO bhUtvA yudhyasva vigatajvaraH||30|| mayi sarvANi karmANi sannyasya adhyAtmacEtasA| nirAzIH nirmamaH bhUtvA yudhyasva vigatajvaraH||30|| +

yE mE matamidaM nityam anutiSThanti mAnavAH| zraddhAvantO'nasUyantO mucyantE tE'pi karmabhiH||31|| yE mE matam idaM nityam anutiSThanti mAnavAH| zraddhAvantaH anasUyantaH mucyantE tE api karmabhiH||31|| +

yE tvEtadabhyasUyantO nAnutiSThanti mE matam| sarvajJAnavimUDhAMstAn viddhi naSTAnacEtasaH||32|| yE tu Etat abhyasUyantaH na anutiSThanti mE matam| sarvajJAnavimUDhAn tAn viddhi naSTAn acEtasaH||32|| +

sadRzaM cESTatE svasyAH prakRtErjJAnavAnapi| prakRtiM yAnti bhUtAni nigrahaH kiM kariSyati||33|| sadRzaM cESTatE svasyAH prakRtEH jJAnavAn api| prakRtiM yAnti bhUtAni nigrahaH kiM kariSyati||33|| +

indriyasyEndriyasyArthE rAgadvESau vyavasthitau| tayOrna vazamAgacchEt tau hyasya paripanthinau||34|| indriyasya indriyasyArthE rAgadvESau vyavasthitau| tayOH na vazam AgacchEt tau hi asya paripanthinau||34|| +

zrEyAn svadharmO viguNaH paradharmAt svanuSThitAt| svadharmE nidhanaM zrEyaH paradharmO bhayAvahaH||35|| zrEyAn svadharmaH viguNaH paradharmAt svanuSThitAt| svadharmE nidhanaM zrEyaH paradharmaH bhayAvahaH||35|| +

arjuna uvAca

atha kEna prayuktO'yaM pApaM carati pUruSaH| anicchannapi vArSNEya balAdiva niyOjitaH||36|| atha kEna prayuktaH ayaM pApaM carati pUruSaH| anicchan api vArSNEya balAt iva niyOjitaH||36|| +

zrIbhagavAnuvAca

kAma ESa krOdha ESa rajOguNasamudbhavaH| mahAzanO mahApApmA viddhyEnamiha vairiNam||37|| kAmaH ESaH krOdhaH ESaH rajaH guNasamudbhavaH| mahAzanaH mahApApmA viddhi Enam iha vairiNam||37|| +

dhUmEna''vriyatE vahniryathA'darzO malEna ca| yathOlbEna''vRtO garbhastathA tEnEdamAvRtam||38|| dhUmEna AvriyatE vahniH yathA AdarzaH malEna ca| yathA ulbEna AvRtaH garbhaH tathA tEna idam AvRtam||38|| +

AvRtaM jJAnamEtEna jJAninO nityavairiNA| kAmarUpENa kauntEya duSpUrENAnalEna ca||39|| AvRtaM jJAnam EtEna jJAninaH nityavairiNA| kAmarUpENa kauntEya duSpUrENa analEna ca||39|| +

indriyANi manO buddhirasyAdhiSThAnamucyatE| EtairvimOhayatyESa jJAnamAvRtya dEhinam||40|| indriyANi manaH buddhiH asya adhiSThAnam ucyatE| EtaiH vimOhayati ESaH jJAnam AvRtya dEhinam||40|| +

tasmAt tvamindriyANyAdau niyamya bharatarSabha| pApmAnaM prajahi hyEnaM jJAnavijJAnanAzanam||41|| tasmAt tvam indriyANi Adau niyamya bharatarSabha| pApmAnaM prajahi hi EnaM jJAnavijJAnanAzanam||41|| +

indriyANi parANyAhurindriyEbhyaH paraM manaH| manasastu parA buddhiryO buddhEH paratastu saH||42|| indriyANi parANi AhuH indriyEbhyaH paraM manaH| manasaH tu parA buddhiH yaH buddhEH parataH tu saH||42|| +

EvaM buddhEH paraM buddhvA saMstabhya''tmAnamAtmanA| jahi zatruM mahAbAhO kAmarUpaM durAsadam||43|| EvaM buddhEH paraM buddhvA saMstabhya AtmAnam AtmanA| jahi zatruM mahAbAhO kAmarUpaM durAsadam||43|| +

||OM tatsaditi zrImadbhagavadgItAsUpaniSatsu brahmavidyAyAM yOgazAstrE zrIkRSNArjunasaMvAdE karmayOgO nAma tRtIyO'dhyAyaH||