From StotraSamhita

||navamO'dhyAyaH - rAjavidyArAjaguhya-yOgaH||

zrIbhagavAnuvAca

idaM tu tE guhyatamaM pravakSyAmyanasUyavE| jJAnaM vijJAnasahitaM yajjJAtvA mOkSyasE'zubhAt||1|| idaM tu tE guhyatamaM pravakSyAmi anasUyavE| jJAnaM vijJAnasahitaM yat jJAtvA mOkSyasE azubhAt||1|| +

rAjavidyA rAjaguhyaM pavitramidamuttamam| pratyakSAvagamaM dharmyaM susukhaM kartumavyayam||2|| rAjavidyA rAjaguhyaM pavitram idam uttamam| pratyakSAvagamaM dharmyaM susukhaM kartum avyayam||2|| +

azraddadhAnAH puruSA dharmasyAsya parantapa| aprApya mAM nivartantE mRtyusaMsAravartmani||3|| azraddadhAnAH puruSAH dharmasya asya parantapa| aprApya mAM nivartantE mRtyusaMsAravartmani||3|| +

mayA tatamidaM sarvaM jagadavyaktamUrtinA| matsthAni sarvabhUtAni na cAhaM tESvavasthitaH||4|| mayA tatam idaM sarvaM jagat avyaktamUrtinA| matsthAni sarvabhUtAni na ca ahaM tESu avasthitaH||4|| +

na ca matsthAni bhUtAni pazya mE yOgamaizvaram| bhUtabhRnna ca bhUtasthO mama''tmA bhUtabhAvanaH||5|| na ca matsthAni bhUtAni pazya mE yOgam aizvaram| bhUtabhRt na ca bhUtasthaH mama AtmA bhUtabhAvanaH||5|| +

yathA''kAzasthitO nityaM vAyuH sarvatragO mahAn| tathA sarvANi bhUtAni matsthAnItyupadhAraya||6|| yathA AkAzasthitaH nityaM vAyuH sarvatragaH mahAn| tathA sarvANi bhUtAni matsthAni iti upadhAraya||6|| +

sarvabhUtAni kauntEya prakRtiM yAnti mAmikAm| kalpakSayE punastAni kalpAdau visRjAmyaham||7|| sarvabhUtAni kauntEya prakRtiM yAnti mAmikAm| kalpakSayE punaH tAni kalpAdau visRjAmi aham||7|| +

prakRtiM svAmavaSTabhya visRjAmi punaH punaH| bhUtagrAmamimaM kRtsnamavazaM prakRtErvazAt||8|| prakRtiM svAm avaSTabhya visRjAmi punaH punaH| bhUtagrAmam imaM kRtsnam avazaM prakRtEH vazAt||8|| +

na ca mAM tAni karmANi nibadhnanti dhanaJjaya| udAsInavadAsInamasaktaM tESu karmasu||9|| na ca mAM tAni karmANi nibadhnanti dhanaJjaya| udAsInavat AsInam asaktaM tESu karmasu||9|| +

mayA'dhyakSENa prakRtiH sUyatE sacarAcaram| hEtunA'nEna kauntEya jagadviparivartatE||10|| mayA adhyakSENa prakRtiH sUyatE sacarAcaram| hEtunA anEna kauntEya jagat viparivartatE||10|| +

avajAnanti mAM mUDhA mAnuSIM tanumAzritam| paraM bhAvamajAnantO mama bhUtamahEzvaram||11|| avajAnanti mAM mUDhAH mAnuSIM tanum Azritam| paraM bhAvam ajAnantaH mama bhUtamahEzvaram||11|| +

mOghAzA mOghakarmANO mOghajJAnA vicEtasaH| rAkSasImAsurIM caiva prakRtiM mOhinIM zritAH||12|| mOghAzAH mOghakarmANaH mOghajJAnAH vicEtasaH| rAkSasIm AsurIM ca Eva prakRtiM mOhinIM zritAH||12|| +

mahAtmAnastu mAM pArtha daivIM prakRtimAzritAH| bhajantyananyamanasO jJAtvA bhUtAdimavyayam||13|| mahAtmAnaH tu mAM pArtha daivIM prakRtim AzritAH| bhajanti ananyamanasaH jJAtvA bhUtAdim avyayam||13|| +

satataM kIrtayantO mAM yatantazca dRDhavratAH| namasyantazca mAM bhaktyA nityayuktA upAsatE||14|| satataM kIrtayantaH mAM yatantaH ca dRDhavratAH| namasyantaH ca mAM bhaktyA nityayuktAH upAsatE||14|| +

jJAnayajJEna cApyanyE yajantO mAmupAsatE| EkatvEna pRthaktvEna bahudhA vizvatOmukham||15|| jJAnayajJEna ca api anyE yajantaH mAm upAsatE| EkatvEna pRthaktvEna bahudhA vizvatOmukham||15|| +

ahaM kraturahaM yajJaH svadhA'hamahamauSadham| mantrO'hamahamEva''jyamahamagnirahaM hutam||16|| ahaM kratuH ahaM yajJaH svadhA aham aham auSadham| mantraH aham aham Eva Ajyam aham agniH ahaM hutam||16|| +

pitA'hamasya jagatO mAtA dhAtA pitAmahaH| vEdyaM pavitramOGkAra RksAma yajurEva ca||17|| pitA aham asya jagatO mAtA dhAtA pitAmahaH| vEdyaM pavitram OGkAraH RksAma yajuH Eva ca||17|| +

gatirbhartA prabhuH sAkSI nivAsaH zaraNaM suhRt| prabhavaH pralayaH sthAnaM nidhAnaM bIjamavyayam||18|| gatiH bhartA prabhuH sAkSI nivAsaH zaraNaM suhRt| prabhavaH pralayaH sthAnaM nidhAnaM bIjam avyayam||18|| +

tapAmyahamahaM varSaM nigRNhAmyutsRjAmi ca| amRtaM caiva mRtyuzca sadasaccAhamarjuna||19|| tapAmi aham ahaM varSaM nigRhNAmi utsRjAmi ca| amRtaM ca Eva mRtyuH ca sat asat ca aham arjuna||19|| +

traividyA mAM sOmapAH pUtapApAH yajJairiSTvA svargatiM prArthayantE| tE puNyamAsAdya surEndralOkam aznanti divyAn divi dEvabhOgAn||20|| traividyAH mAM sOmapAH pUtapApAH yajJaiH iSTvA svargatiM prArthayantE| tE puNyam AsAdya surEndralOkam aznanti divyAn divi dEvabhOgAn||20|| +

tE taM bhuktvA svargalOkaM vizAlam kSINE puNyE martyalOkaM vizanti| EvaM trayIdharmamanuprapannAH gatAgataM kAmakAmA labhantE||21|| tE taM bhuktvA svargalOkaM vizAlaM kSINE puNyE martyalOkaM vizanti| EvaM trayIdharmam anuprapannAH gatAgataM kAmakAmAH labhantE||21|| +

ananyAzcintayantO mAM yE janAH paryupAsatE| tESAM nityAbhiyuktAnAM yOgakSEmaM vahAmyaham||22|| ananyAH cintayantaH mAM yE janAH paryupAsatE| tESAM nityAbhiyuktAnAM yOgakSEmaM vahAmi aham||22|| +

yE'pyanyadEvatAbhaktA yajantE zraddhayAnvitAH| tE'pi mAmEva kauntEya yajantyavidhipUrvakam||23|| yE api anyadEvatAbhaktAH yajantE zraddhayA anvitAH| tE api mAm Eva kauntEya yajanti avidhipUrvakam||23|| +

ahaM hi sarvayajJAnAM bhOktA ca prabhurEva ca| na tu mAmabhijAnanti tattvEnAtazcyavanti tE||24|| ahaM hi sarvayajJAnAM bhOktA ca prabhuH Eva ca| na tu mAm abhijAnanti tattvEna ataH cyavanti tE||24|| +

yAnti dEvavratA dEvAn pitRRn yAnti pitRvratAH| bhUtAni yAnti bhUtEjyA yAnti madyAjinO'pi mAm||25|| yAnti dEvavratAH dEvAn pitRRn yAnti pitRvratAH| bhUtAni yAnti bhUtEjyAH yAnti mat yAjinaH api mAm||25|| +

patraM puSpaM phalaM tOyaM yO mE bhaktyA prayacchati| tadahaM bhaktyupahRtamaznAmi prayatAtmanaH||26|| patraM puSpaM phalaM tOyaM yaH mE bhaktyA prayacchati| tat ahaM bhaktyupahRtam aznAmi prayata AtmanaH||26|| +

yat karOSi yadaznAsi yajjuhOSi dadAsi yat| yat tapasyasi kauntEya tat kuruSva madarpaNam||27|| yat karOSi yat aznAsi yat juhOSi dadAsi yat| yat tapasyasi kauntEya tat kuruSva mat arpaNam||27|| +

zubhAzubhaphalairEvaM mOkSyasE karmabandhanaiH| sannyAsayOgayuktAtmA vimuktO mAmupaiSyasi||28|| zubhAzubhaphalaiH EvaM mOkSyasE karmabandhanaiH| sannyAsayOgayuktAtmA vimuktaH mAm upaiSyasi||28|| +

samO'haM sarvabhUtESu na mE dvESyO'sti na priyaH| yE bhajanti tu mAM bhaktyA mayi tE tESu cApyaham||29|| samaH ahaM sarvabhUtESu na mE dvESyaH asti na priyaH| yE bhajanti tu mAM bhaktyA mayi tE tESu ca api aham||29|| +

api cEt sudurAcArO bhajatE mAmananyabhAk| sAdhurEva sa mantavyaH samyagvyavasitO hi saH||30|| api cEt sudurAcAraH bhajatE mAm ananyabhAk| sAdhuH Eva saH mantavyaH samyak vyavasitaH hi saH||30|| +

kSipraM bhavati dharmAtmA zazvacchAntiM nigacchati| kauntEya pratijAnIhi na mE bhaktaH praNazyati||31|| kSipraM bhavati dharmAtmA zazvat zAntiM nigacchati| kauntEya pratijAnIhi na mE bhaktaH praNazyati||31|| +

mAM hi pArtha vyapAzritya yE'pi syuH pApayOnayaH| striyO vaizyAstathA zUdrAstE'pi yAnti parAM gatim||32|| mAM hi pArtha vyapAzritya yE api syuH pApayOnayaH| striyaH vaizyAH tathA zUdrAH tE api yAnti parAM gatim||32|| +

kiM punarbrAhmaNAH puNyA bhaktA rAjarSayastathA| anityamasukhaM lOkamimaM prApya bhajasva mAm||33|| kiM punaH brAhmaNAH puNyAH bhaktAH rAjarSayaH tathA| anityam asukhaM lOkam imaM prApya bhajasva mAm||33|| +

manmanA bhava madbhaktO madyAjI mAM namaskuru| mAmEvaiSyasi yuktvaivamAtmAnaM matparAyaNaH||34|| manmanAH bhava madbhaktaH madyAjI mAM namaskuru| mAm Eva ESyasi yuktvA Evam AtmAnaM matparAyaNaH||34|| +

||OM tatsaditi zrImadbhagavadgItAsUpaniSatsu brahmavidyAyAM yOgazAstrE zrIkRSNArjunasaMvAdE rAjavidyArAjaguhyayOgO nAma navamO'dhyAyaH||