From StotraSamhita

||EkAdazO'dhyAyaH - vizwarUpadarzana-yOgaH||

arjuna uvAca

madanugrahAya paramaM guhyamadhyAtmasaMjJitam| yattvayOktaM vacastEna mOhO'yaM vigatO mama||1|| mat anugrahAya paramaM guhyam adhyAtmasaMjJitam| yat tvayA uktaM vacaH tEna mOhaH ayaM vigataH mama||1|| +

bhavApyayau hi bhUtAnAM zrutau vistarazO mayA| tvattaH kamalapatrAkSa mAhAtmyamapi cAvyayam||2|| bhava api ayau hi bhUtAnAM zrutau vistarazaH mayA| tvattaH kamalapatrAkSa mAhAtmyam api ca avyayam||2|| +

EvamEtadyathA''ttha tvamAtmAnaM paramEzvara| draSTumicchAmi tE rUpamaizvaraM puruSOttama||3|| Evam Etat yathA Attha tvam AtmAnaM paramEzvara| draSTum icchAmi tE rUpam aizvaraM puruSOttama||3|| +

manyasE yadi tacchakyaM mayA draSTumiti prabhO| yOgEzvara tatO mE tvaM darzaya''tmAnamavyayam||4|| manyasE yadi tat zakyaM mayA draSTum iti prabhO| yOgEzvara tataH mE tvaM darzaya AtmAnam avyayam||4|| +

zrIbhagavAnuvAca

pazya mE pArtha rUpANi zatazO'tha sahasrazaH| nAnAvidhAni divyAni nAnAvarNAkRtIni ca||5|| pazya mE pArtha rUpANi zatazaH atha sahasrazaH| nAnAvidhAni divyAni nAnAvarNAkRtIni ca||5|| +

pazya''dityAn vasUn rudrAnazvinau marutastathA| bahUnyadRSTapUrvANi pazya''zcaryANi bhArata||6|| pazya AdityAn vasUn rudrAn azvinau marutaH tathA| bahUni adRSTapUrvANi pazya AzcaryANi bhArata||6|| +

ihaikasthaM jagatkRtsnaM pazya''dya sacarAcaram| mama dEhE guDAkEza yaccAnyad-draSTumicchasi||7|| iha EkasthaM jagat kRtsnaM pazya adya sacarAcaram| mama dEhE guDAkEza yat ca anyat draSTum icchasi||7|| +

na tu mAM zakyasE draSTumanEnaiva svacakSuSA| divyaM dadAmi tE cakSuH pazya mE yOgamaizvaram||8|| na tu mAM zakyasE draSTum anEna Eva svacakSuSA| divyaM dadAmi tE cakSuH pazya mE yOgam aizvaram||8|| +

saJjaya uvAca

EvamuktvA tatO rAjan mahAyOgEzvarO hariH| darzayAmAsa pArthAya paramaM rUpamaizvaram||9|| Evam uktvA tataH rAjan mahAyOgEzvaraH hariH| darzayAmAsa pArthAya paramaM rUpam aizvaram||9|| +

anEkavaktranayanamanEkAdbhutadarzanam| anEkadivyAbharaNaM divyAnEkOdyatAyudham||10|| anEkavaktranayanam anEkAdbhutadarzanam| anEkadivyaAbharaNaM divyAnEkOdyatAyudham||10|| +

divyamAlyAmbaradharaM divyagandhAnulEpanam| sarvAzcaryamayaM dEvamanantaM vizvatOmukham||11|| divyamAlyAmbaradharaM divyagandhAnulEpanam| sarvAzcaryamayaM dEvam anantaM vizvatOmukham||11|| +

divi sUryasahasrasya bhavEdyugapadutthitA| yadi bhAH sadRzI sA syAdbhAsastasya mahAtmanaH||12|| divi sUryasahasrasya bhavEt yugapat utthitA| yadi bhAH sadRzI sA syAt bhAsaH tasya mahAtmanaH||12|| +

tatraikasthaM jagatkRtsnaM pravibhaktamanEkadhA| apazyaddEvadEvasya zarIrE pANDavastadA||13|| tatra EkasthaM jagat kRtsnaM pravibhaktam anEkadhA| apazyat dEvadEvasya zarIrE pANDavaH tadA||13|| +

tataH sa vismayAviSTO hRSTarOmA dhanaJjayaH| praNamya zirasA dEvaM kRtAJjalirabhASata||14|| tataH saH vismayAviSTaH hRSTarOmA dhanaJjayaH| praNamya zirasA dEvaM kRtAJjaliH abhASata||14|| +

arjuna uvAca

pazyAmi dEvAMstava dEva dEhE sarvAMstathA bhUtavizESasaGghAn| brahmANamIzaM kamalAsanastham RSIMzca sarvAnuragAMzca divyAn||15|| pazyAmi dEvAn tava dEva dEhE sarvAn tathA bhUtavizESasaGghAn| brahmANam IzaM kamalAsanastham RSIn ca sarvAn uragAn ca divyAn||15|| +

anEkabAhUdaravaktranEtram pazyAmi tvAM sarvatO'nantarUpam| nAntaM na madhyaM na punastava''dim pazyAmi vizvEzvara vizvarUpa||16|| anEkabAhUdaravaktranEtraM pazyAmi tvAM sarvataH anantarUpam| na antaM na madhyaM na punaH tava AdiM pazyAmi vizvEzvara vizvarUpa||16|| +

kirITinaM gadinaM cakriNaM ca tEjOrAziM sarvatO dIptimantam| pazyAmi tvAM durnirIkSyaM samantAd- dIptAnalArkadyutimapramEyam||17|| kirITinaM gadinaM cakriNaM ca tEjOrAziM sarvataH dIptimantam| pazyAmi tvAM durnirIkSyaM samantAt dIptAnalArkadyutim apramEyam||17|| +

tvamakSaraM paramaM vEditavyam tvamasya vizvasya paraM nidhAnam| tvamavyayaH zAzvatadharmagOptA sanAtanastvaM puruSO matO mE||18|| tvam akSaraM paramaM vEditavyaM tvam asya vizvasya paraM nidhAnam| tvam avyayaH zAzvatadharmagOptA sanAtanaH tvaM puruSaH mataH mE||18|| +

anAdimadhyAntamanantavIryam anantabAhuM zazisUryanEtram| pazyAmi tvAM dIptahutAzavaktram svatEjasA vizvamidaM tapantam||19|| anAdimadhyAntam anantavIryam anantabAhuM zazisUryanEtram| pazyAmi tvAM dIptahutAzavaktraM svatEjasA vizvam idaM tapantam||19|| +

dyAvApRthivyOridamantaraM hi vyAptaM tvayaikEna dizazca sarvAH| dRSTvA'dbhutaM rUpamugraM tavEdam lOkatrayaM pravyathitaM mahAtman||20|| dyAvApRthivyOH idam antaraM hi vyAptaM tvayA EkEna dizaH ca sarvAH| dRSTvA adbhutaM rUpam ugraM tava idaM lOkatrayaM pravyathitaM mahAtman||20|| +

amI hi tvAM surasaGghA vizanti kEcidbhItAH prAJjalayO gRNanti| svastItyuktvA maharSisiddhasaGghAH stuvanti tvAM stutibhiH puSkalAbhiH||21|| amI hi tvAM surasaGghAH vizanti kEcit bhItAH prAJjalayaH gRNanti| svasti iti uktvA maharSisiddhasaGghAH stuvanti tvAM stutibhiH puSkalAbhiH||21|| +

rudrAdityA vasavO yE ca sAdhyAH vizvEzvinau marutazcOSmapAzca| gandharvayakSAsurasiddhasaGghAH vIkSantE tvAM vismitAzcaiva sarvE||22|| rudrAdityAH vasavaH yE ca sAdhyAH vizvE azvinau marutaH ca uSmapAH ca| gandharvayakSAsurasiddhasaGghAH vIkSantE tvAM vismitAH ca Eva sarvE||22|| +

rUpaM mahattE bahuvaktranEtram mahAbAhO bahubAhUrupAdam| bahUdaraM bahudaMSTrAkarAlam dRSTvA lOkAH pravyathitAstathA'ham||23|| rUpaM mahat tE bahuvaktranEtraM mahAbAhO bahubAhUrupAdam| bahUdaraM bahudaMSTrAkarAlaM dRSTvA lOkAH pravyathitAH tathA aham||23|| +

nabhaHspRzaM dIptamanEkavarNam vyAttAnanaM dIptavizAlanEtram| dRSTvA hi tvAM pravyathitAntarAtmA dhRtiM na vindAmi zamaM ca viSNO||24|| nabhaHspRzaM dIptamanEkavarNaM vyAttAnanaM dIptavizAlanEtram| dRSTvA hi tvAM pravyathitAntarAtmA dhRtiM na vindAmi zamaM ca viSNO||24|| +

daMSTrAkarAlAni ca tE mukhAni dRSTvaiva kAlAnalasannibhAni| dizO na jAnE na labhE ca zarma prasIda dEvEza jagannivAsa||25|| daMSTrAkarAlAni ca tE mukhAni dRSTvA Eva kAlAnalasannibhAni| dizaH na jAnE na labhE ca zarma prasIda dEvEza jagannivAsa||25|| +

amI ca tvAM dhRtarASTrasya putrAH sarvE sahaivAvanipAlasaGghaiH| bhISmO drONaH sUtaputrastathA'sau sahAsmadIyairapi yOdhamukhyaiH||26|| amI ca tvAM dhRtarASTrasya putrAH sarvE saha Eva avanipAlasaGghaiH| bhISmaH drONaH sUtaputraH tathA asau saha asmadIyaiH api yOdhamukhyaiH||26|| +

vaktrANi tE tvaramANA vizanti daMSTrAkarAlAni bhayAnakAni| kEcidvilagnA dazanAntarESu sandRzyantE cUrNitairuttamAGgaiH||27|| vaktrANi tE tvaramANAH vizanti daMSTrAkarAlAni bhayAnakAni| kEcit vilagnAH dazanAntarESu sandRzyantE cUrNitaiH uttamAGgaiH||27|| +

yathA nadInAM bahavO'mbuvEgAH samudramEvAbhimukhA dravanti| tathA tavAmI naralOkavIrA vizanti vaktrANyabhivijvalanti||28|| yathA nadInAM bahavaH ambuvEgAH samudram Eva abhimukhAH dravanti| tathA tava amI naralOkavIrAH vizanti vaktrANi abhivijvalanti||28|| +

yathA pradIptaM jvalanaM pataGgAH vizanti nAzAya samRddhavEgAH| tathaiva nAzAya vizanti lOkAH tavApi vaktrANi samRddhavEgAH||29|| yathA pradIptaM jvalanaM pataGgAH vizanti nAzAya samRddhavEgAH| tathA Eva nAzAya vizanti lOkAH tava api vaktrANi samRddhavEgAH||29|| +

lElihyasE grasamAnaH samantAt lOkAn samagrAn vadanairjvaladbhiH| tEjObhirApUrya jagat samagram bhAsastavOgrAH pratapanti viSNO||30|| lElihyasE grasamAnaH samantAt lOkAn samagrAn vadanaiH jvaladbhiH| tEjObhiH ApUrya jagat samagraM bhAsaH tava ugrAH pratapanti viSNO||30|| +

AkhyAhi mE kO bhavAnugrarUpO- namO'stu tE dEvavara prasIda| vijJAtumicchAmi bhavantamAdyam na hi prajAnAmi tava pravRttim||31|| AkhyAhi mE kO bhavAnugrarUpO namaH astu tE dEvavara prasIda| vijJAtum icchAmi bhavantam AdyaM na hi prajAnAmi tava pravRttim||31|| +

zrIbhagavAnuvAca

kAlO'smi lOkakSayakRt pravRddhO lOkAn samAhartumiha pravRttaH| RtE'pi tvAM na bhaviSyanti sarvE yE'vasthitAH pratyanIkESu yOdhAH||32|| kAlaH asmi lOkakSayakRt pravRddhaH lOkAn samAhartum iha pravRttaH| RtE api tvAM na bhaviSyanti sarvE yE avasthitAH pratyanIkESu yOdhAH||32|| +

tasmAt tvamuttiSTha yazO labhasva jitvA zatrUn bhuGkSva rAjyaM samRddham| mayaivaitE nihatAH pUrvamEva nimittamAtraM bhava savyasAcin||33|| tasmAt tvam uttiSTha yazaH labhasva jitvA zatrUn bhuGkSva rAjyaM samRddham| mayA Eva EtE nihatAH pUrvam Eva nimittamAtraM bhava savyasAcin||33|| +

drONaM ca bhISmaM ca jayadrathaM ca karNaM tathA'nyAnapi yOdhavIrAn| mayA hatAMstvaM jahi mA vyathiSThA yudhyasva jEtAsi raNE sapatnAn||34|| drONaM ca bhISmaM ca jayadrathaM ca karNaM tathA anyAn api yOdhavIrAn| mayA hatAn tvaM jahi mA vyathiSThAH yudhyasva jEtA asi raNE sapatnAn||34|| +

saJjaya uvAca

EtacchrutvA vacanaM kEzavasya kRtAJjalirvEpamAnaH kirITI| namaskRtvA bhUya Eva''ha kRSNam sagadgadaM bhItabhItaH praNamya||35|| Etat zrutvA vacanaM kEzavasya kRtAJjaliH vEpamAnaH kirITI| namaskRtvA bhUyaH Eva Aha kRSNaM sagadgadaM bhItabhItaH praNamya||35|| +

arjuna uvAca

sthAnE hRSIkEza tava prakIrtyA jagat prahRSyatyanurajyatE ca| rakSAMsi bhItAni dizO dravanti sarvE namasyanti ca siddhasaGghAH||36|| sthAnE hRSIkEza tava prakIrtyA jagat prahRSyati anurajyatE ca| rakSAMsi bhItAni dizaH dravanti sarvE namasyanti ca siddhasaGghAH||36|| +

kasmAcca tE na namEran mahAtman garIyasE brahmaNO'pyAdikartrE| ananta dEvEza jagannivAsa tvamakSaraM sadasattatparaM yat||37|| kasmAt ca tE na namEran mahAtman garIyasE brahmaNaH api AdikartrE| ananta dEvEza jagat nivAsa tvam akSaraM sat asat tat paraM yat||37|| +

tvamAdidEvaH puruSaH purANaH tvamasya vizvasya paraM nidhAnam| vEttA'si vEdyaM ca paraM ca dhAma tvayA tataM vizvamanantarUpa||38|| tvam AdidEvaH puruSaH purANaH tvam asya vizvasya paraM nidhAnam| vEttA asi vEdyaM ca paraM ca dhAma tvayA tataM vizvam anantarUpa||38|| +

vAyuryamO'gnirvaruNaH zazAGkaH prajApatistvaM prapitAmahazca| namO namastE'stu sahasrakRtvaH punazca bhUyO'pi namO namastE||39|| vAyuH yamaH agniH varuNaH zazAGkaH prajApatiH tvaM prapitAmahaH ca| namaH namaH tE astu sahasrakRtvaH punaH ca bhUyaH api namaH namaH tE||39|| +

namaH purastAdatha pRSThatastE namO'stu tE sarvata Eva sarva| anantavIryAmitavikramastvam sarvaM samApnOSi tatO'si sarvaH||40|| namaH purastAt atha pRSThataH tE namaH astu tE sarvataH Eva sarva| anantavIryAmitavikramaH tvaM sarvaM samApnOSi tataH asi sarvaH||40|| +

sakhEti matvA prasabhaM yaduktam hE kRSNa hE yAdava hE sakhEti| ajAnatA mahimAnaM tavEdam mayA pramAdAtpraNayEna vA'pi||41|| sakhA iti matvA prasabhaM yat uktaM hE kRSNa hE yAdava hE sakhA iti| ajAnatA mahimAnaM tava idaM mayA pramAdAt praNayEna vA api||41|| +

yaccAvahAsArthamasatkRtO'si vihArazayyAsanabhOjanESu| EkO'thavA'pyacyuta tat samakSam tat kSAmayE tvAmahamapramEyam||42|| yat ca avahAsArtham asat kRtaH asi vihArazayyAsanabhOjanESu| EkaH athavA api acyuta tat samakSaM tat kSAmayE tvAm aham apramEyam||42|| +

pitA'si lOkasya carAcarasya tvamasya pUjyazca gururgarIyAn| na tvatsamO'styabhyadhikaH kutO'nyO lOkatrayE'pyapratimaprabhAva||43|| pitA asi lOkasya carAcarasya tvam asya pUjyaH ca guruH garIyAn| na tvat samaH asti abhyadhikaH kutaH anyaH lOkatrayE api apratimaprabhAva||43|| +

tasmAt praNamya praNidhAya kAyam prasAdayE tvAmahamIzamIDyam| pitEva putrasya sakhEva sakhyuH priyaH priyAyArhasi dEva sODhum||44|| tasmAt praNamya praNidhAya kAyaM prasAdayE tvAm aham Izam IDyam| pitA iva putrasya sakhA iva sakhyuH priyaH priyAyAH arhasi dEva sODhum||44|| +

adRSTapUrvaM hRSitO'smi dRSTvA bhayEna ca pravyathitaM manO mE| tadEva mE darzaya dEva rUpam prasIda dEvEza jagannivAsa||45|| adRSTapUrvaM hRSitaH asmi dRSTvA bhayEna ca pravyathitaM manaH mE| tat Eva mE darzaya dEva rUpaM prasIda dEvEza jagannivAsa||45|| +

kirITinaM gadinaM cakrahastam icchAmi tvAM draSTumahaM tathaiva| tEnaiva rUpENa caturbhujEna sahasrabAhO bhava vizvamUrtE||46|| kirITinaM gadinaM cakrahastam icchAmi tvAM draSTum ahaM tathA Eva| tEna Eva rUpENa caturbhujEna sahasrabAhO bhava vizvamUrtE||46|| +

zrIbhagavAnuvAca

mayA prasannEna tavArjunEdam rUpaM paraM darzitamAtmayOgAt| tEjOmayaM vizvamanantamAdyam yanmE tvadanyEna na dRSTapUrvam||47|| mayA prasannEna tava arjuna idaM rUpaM paraM darzitam AtmayOgAt| tEjOmayaM vizvam anantam AdyaM yat mE tvat anyEna na dRSTapUrvam||47|| +

na vEdayajJAdhyayanairna dAnaiH na ca kriyAbhirna tapObhirugraiH| EvaM rUpaH zakya ahaM nRlOkE draSTuM tvadanyEna kurupravIra||48|| na vEdayajJAdhyayanaiH na dAnaiH na ca kriyAbhiH na tapObhiH ugraiH| EvaM rUpaH zakyaH ahaM nRlOkE draSTuM tvat anyEna kurupravIra||48|| +

mA tE vyathA mA ca vimUDhabhAvO dRSTvA rUpaM ghOramIdRGmamEdam| vyapEtabhIH prItamanAH punastvam tadEva mE rUpamidaM prapazya||49|| mA tE vyathA mA ca vimUDhabhAvaH dRSTvA rUpaM ghOram IdRk mama idam| vyapEtabhIH prItamanAH punaH tvaM tat Eva mE rUpam idaM prapazya||49|| +

saJjaya uvAca

ityarjunaM vAsudEvastathOktvA svakaM rUpaM darzayAmAsa bhUyaH| AzvAsayAmAsa ca bhItamEnam bhUtvA punaH saumyavapurmahAtmA||50|| iti arjunaM vAsudEvaH tathA uktvA svakaM rUpaM darzayAmAsa bhUyaH| AzvAsayAmAsa ca bhItam EnaM bhUtvA punaH saumyavapuH mahAtmA||50|| +

arjuna uvAca

dRSTvEdaM mAnuSaM rUpaM tava saumyaM janArdana| idAnImasmi saMvRttaH sacEtAH prakRtiM gataH||51|| dRSTvA idaM mAnuSaM rUpaM tava saumyaM janArdana| idAnIm asmi saMvRttaH sacEtAH prakRtiM gataH||51|| +

zrIbhagavAnuvAca

sudurdarzamidaM rUpaM dRSTavAnasi yanmama| dEvA apyasya rUpasya nityaM darzanakAGkSiNaH||52|| sudurdarzam idaM rUpaM dRSTavAn asi yat mama| dEvAH api asya rUpasya nityaM darzanakAGkSiNaH||52|| +

nAhaM vEdairna tapasA na dAnEna na cEjyayA| zakya EvaMvidhO draSTuM dRSTavAnasi mAM yathA||53|| na ahaM vEdaiH na tapasA na dAnEna na ca ijyayA| zakyaH EvaM vidhaH draSTuM dRSTavAn asi mAM yathA||53|| +

bhaktyA tvananyayA zakyam ahamEvaMvidhO'rjuna| jJAtuM draSTuM ca tattvEna pravESTuM ca parantapa||54|| bhaktyA tu ananyayA zakyaH aham EvaM vidhaH arjuna| jJAtuM draSTuM ca tattvEna pravESTuM ca parantapa||54|| +

matkarmakRnmatparamO madbhaktaH saGgavarjitaH| nirvairaH sarvabhUtESu yaH sa mAmEti pANDava||55|| matkarmakRt matparamaH madbhaktaH saGgavarjitaH| nirvairaH sarvabhUtESu yaH saH mAm Eti pANDava||55|| +

||OM tatsaditi zrImadbhagavadgItAsUpaniSatsu brahmavidyAyAM yOgazAstrE zrIkRSNArjunasaMvAdE vizvarUpadarzanayOgO nAma EkAdazO'dhyAyaH||