mahAgaNapati navArNavEdapAda stavaH

zrIkaNThatanaya zrIza zrIkara zrIdalArcita|
zrIvinAyaka sarvEza zriyaM vAsaya mE kulE||1||

gajAnana gaNAdhIza dvijarAja-vibhUSita|
bhajE tvAM saccidAnanda brahmaNAM brahmaNaspatE||2||

NaSaSThavAcyanAzAya rOgATavikuThAriNE|
ghRNApAlitalOkAya vanAnAM patayE namaH||3||

dhiyaM prayacchatE tubhyam IpsitArthapradAyinE|
dIptabhUSaNabhUSAya dizAM ca patayE namaH||4||

paJcabrahmasvarUpAya paJcapAtakahAriNE|
paJcatattvAtmanE tubhyaM pazUnAM patayE namaH||5||

taTitkOTi-pratIkAza-tanavE vizvasAkSiNE|
tapasvi-dhyAyinE tubhyaM sEnAnibhyazca vO namaH||6||

yE bhajantyakSaraM tvAM tE prApnuvantyakSarAtmatAm|
naikarUpAya mahatE muSNatAM patayE namaH||7||

nagajAvaraputrAya surarAjArcitAya ca|
saguNAya namastubhyaM sumRDIkAya mIDhuSE||8||

mahApAtakasaGghAta mahAraNabhayApaha|
tvadIya kRpayA dEva sarvAnava yajAmahE||9||

navArNaratnanigamapAdasampuTitAM stutim|
bhaktyA paThanti yE tESAM tuSTO bhava gaNAdhipa||

||iti zrI mahAgaNapati navArNavEdapAdastavaH sampUrNaH||