From StotraSamhita

munikRta-rAmastOtram

munaya UcuH

namastE rAmacandrAya lOkAnugrahakAriNE| arAvaNaM jagatkartumavatIrNAya bhUtalE||1||

tATikAdEhasaMhartrE gAdhijAdhvararakSiNE| namastE jitamArIca subAhuprANahAriNE||2||

ahalyAmuktisandAyipAdapaGkajarENavE| namastE harakOdaNDalIlAbhaJjanakAriNE||3||

namastE maithilIpANigrahaNOtsavazAlinE| namastE rENukAputraparAjayavidhAyinE||4||

sahalakSmaNasItAbhyAM kaikEyyAstu varadvayAt| satyaM pitRvacaH kartuM namO vanamupEyuSE||5||

bharataprArthanAdattapAdukAyugulAya tE| namastE zarabhaGgasya svargaprAptyaikahEtavE||6||

namO virAdhasaMhartrE gRdhrarAjasakhAya tE| mAyAmRgamahAkrUramArIcAGgavidAriNE||7||

sItApahArilOkEzayuddhatyaktakalEvaram| jaTAyuSaM tu sandahya tatkaivalyapradAyinE||8||

namaH kabandhasaMhartrE zabarIpUjitAGghrayE| prAptasugrIvasakhyAya kRtavAlivadhAya tE||9||

namaH kRtavatE sEtuM samudrE varuNAlayE| sarvarAkSasasaMhartrE rAvaNaprANahAriNE||10||

saMsArAmbudhisantArapOtapAdAmbujAya tE| namO bhaktArtisaMhartrE saccidAnandarUpiNE||11||

namastE rAmabhadrAya jagatAmRddhihEtavE| rAmAdipuNyanAmAni japatAM pApahAriNE||12||

namastE sarvalOkAnAM sRSTisthityantakAriNE| namastE karuNAmUrtE bhaktarakSaNadIkSita||13||

sasItAya namastubhyaM vibhISaNasukhaprada| laMkEzvaravadhAdrAma pAlitaM hi jagattvayA||14||

rakSa rakSa jagannAtha pAhyasmAJjAnakIpatE| stutvaivaM munayaH sarvE tUSNIM tasthurdvijOttamAH||15||

zrIsUta uvAca

ya idaM rAmacandrasya stOtraM munibhirIritam| trisandhyaM paThatE bhaktyA bhuktiM muktiM ca vindati||16||

prayANakAlE paThatO na bhItirupajAyatE| EtatstOtrasya paThanAd bhUtavEtAlakAdayaH||17||

nazyanti rOgA nazyanti nazyatE pApasaJcayaH| putrakAmO labhEtputraM kanyA vindati satpatim||18||

mOkSakAmO labhEnmOkSaM dhanakAmO dhanaM labhEt| sarvAnkAmAnavApnOti paThanbhaktyA tvimaM stavam||19||

||iti zrIskAndE mahApurANa EkAzItisAhasryAM saMhitAyAM tRtIyE brahmakhaNDE sEtumAhAtmyE rAmanAthaliGgapratiSThAvidhivarNanaM nAma catuzcatvAriMzO'dhyAyataH munibhiH kRtaM rAmastOtraM sampUrNam||