zrI raGganAthASTakam

saptaprAkAramadhyE sarasijamukulOdbhAsamAnE vimAnE
kAvErImadhyadEzE phaNipatizayanE zESaparyaMkabhAgE|
nidrAmudrAbhirAmaM kaTinikaTaziraH pArzvavinyastahastam
padmAdhAtrIkarAbhyAM paricitacaraNaM raGgarAjaM bhajE'ham||

AnandarUpE nijabOdharUpE
brahmasvarUpE zrutimUrtirUpE|
zazAMkarUpE ramaNIyarUpE
zrIraGgarUpE ramatAM manO mE||1||

kAvEritIrE karuNAvilOlE
mandAramUlE dhRtacArucElE|
daityAntakAlE'khilalOkalIlE
zrIraGgalIlE ramatAM manO mE||2||

lakSmInivAsE jagatAM nivAsE
hRtpadmavAsE ravibimbavAsE|
kRpAnivAsE guNabRndavAsE
zrIraGgavAsE ramatAM manO mE||3||

brahmAdivandyE jagadEkavandyE
mukundavandyE suranAthavandyE|
vyAsAdivandyE sanakAdivandyE
zrIraGgavandyE ramatAM manO mE||4||

brahmAdhirAjE garuDAdhirAjE
vaikuNTharAjE surarAjarAjE|
trailOkyarAjE'khilalOkarAjE
zrIraGgarAjE ramatAM manO mE||5||

amOghamudrE paripUrNanidrE
zrIyOganidrE sasamudranidrE|
zritaikabhadrE jagadEkanidrE
zrIraGgabhadrE ramatAM manO mE||6||

sa citrazAyI bhujagEndrazAyI
nandAGkazAyI kamalAGkazAyI|
kSIrAbdhizAyI vaTapatrazAyI
zrIraGgazAyI ramatAM manO mE||7||

idaM hi raGgaM tyajatAmihAGgam
punarnacAGkaM yadi cAGgamEti|
pANau rathAGgaM caraNEmbu gAGgam
yAnE vihaGgaM zayanE bhujaGgam||8||

raGganAthASTakaM puNyam
prAtarutthAya yaH paThEt|
sarvAn kAmAnavApnOti
raGgisAyujyamApnuyAt||