sarasvatIstOtram agastyamuni prOktam

yA kundEndutuSArahAradhavalA yA zubhravastrAvRtA
yA vINAvaradaNDamaNDitakarA yA zvEtapadmAsanA|
yA brahmAcyutazaGkaraprabhRtibhirdEvaiH sadA pUjitA
sA mAM pAtu sarasvatI bhagavatI niHzESajADyApahA||1||

dOrbhiryuktA caturbhiH sphaTikamaNinibhairakSamAlAM dadhAnA
hastEnaikEna padmaM sitamapi ca zukaM pustakaM cAparENa|
bhAsA kundEnduzaGkhasphaTikamaNinibhA bhAsamAnA'samAnA
sA mE vAgdEvatEyaM nivasatu vadanE sarvadA suprasannA||2||

surAsurasEvitapAdapaGkajA
karE virAjatkamanIyapustakA|
viriJcipatnI kamalAsanasthitA
sarasvatI nRtyatu vAci mE sadA||3||

sarasvatI sarasijakEsaraprabhA
tapasvinI sitakamalAsanapriyA|
ghanastanI kamalavilOlalOcanA
manasvinI bhavatu varaprasAdinI||4||

sarasvati namastubhyaM varadE kAmarUpiNi|
vidyArambhaM kariSyAmi siddhirbhavatu mE sadA||5||

sarasvati namastubhyaM sarvadEvi namO namaH|
zAntarUpE zazidharE sarvayOgE namO namaH||6||

nityAnandE nirAdhArE niSkalAyai namO namaH|
vidyAdharE vizAlAkSi zuddhajJAnE namO namaH||7||

zuddhasphaTikarUpAyai sUkSmarUpE namO namaH|
zabdabrahmi caturhastE sarvasiddhyai namO namaH||8||

muktAlaGkRta-sarvAGgyai mUlAdhArE namO namaH|
mUlamantrasvarUpAyai mUlazaktyai namO namaH||9||

manO maNimahAyOgE vAgIzvari namO namaH|
vAgbhyai varadahastAyai varadAyai namO namaH||10||

vEdAyai vEdarUpAyai vEdAntAyai namO namaH|
guNadOSavivarjinyai guNadIptyai namO namaH||11||

sarvajJAnE sadAnandE sarvarUpE namO namaH|
sampannAyai kumAryai ca sarvajJE tE namO namaH||12||

yOgAnArya umAdEvyai yOgAnandE namO namaH|
divyajJAna trinEtrAyai divyamUrtyai namO namaH||13||

ardhacandrajaTAdhAri candrabimbE namO namaH|
candrAdityajaTAdhAri candrabimbE namO namaH||14||

aNurUpE mahArUpE vizvarUpE namO namaH|
aNimAdyaSTasiddhAyai AnandAyai namO namaH||15||

jJAna-vijJAna-rUpAyai jJAnamUrtE namO namaH|
nAnAzAstra-svarUpAyai nAnArUpE namO namaH||16||

padmadA padmavaMzA ca padmarUpE namO namaH|
paramESThyai parAmUrtyai namastE pApanAzini||17||

mahAdEvyai mahAkAlyai mahAlakSmyai namO namaH|
brahmaviSNuzivAyai ca brahmanAryai namO namaH||18||

kamalAkarapuSpA ca kAmarUpE namO namaH|
kapAli karmadIptAyai karmadAyai namO namaH||19||

sAyaM prAtaH paThEnnityaM SaNmAsAt siddhirucyatE|
cOravyAghrabhayaM nAsti paThatAM zRNvatAmapi||20||

itthaM sarasvatIstOtram agastyamunivAcakam|
sarvasiddhikaraM nRRNAM sarvapApapraNAzanam||21||