zivapaJcAkSarastOtram

nAgEndrahArAya trilOcanAya
bhasmAGgarAgAya mahEzvarAya|
nityAya zuddhAya digambarAya
tasmai nakArAya namaH zivAya||1||

mandAkinI-salilacandana-carcitAya
nandIzvara-pramathanAtha-mahEzvarAya|
mandArapuSpa-bahupuSpa-supUjitAya
tasmai makArAya namaH zivAya||2||

zivAya gaurIvadanAbja-vRnda-
sUryAya dakSAdhvaranAzakAya|
zrInIlakaNThAya vRSadhvajAya
tasmai zikArAya namaH zivAya||3||

vasiSTha-kumbhOdbhava-gautamArya-
munIndra-dEvArcitazEkharAya|
candrArka-vaizvAnaralOcanAya
tasmai vakArAya namaH zivAya||4||

yakSasvarUpAya jaTAdharAya
pinAkahastAya sanAtanAya|
divyAya dEvAya digambarAya
tasmai yakArAya namaH zivAya||5||

paJcAkSaramidaM puNyaM yaH paThEcchivasannidhau|
zivalOkamavApnOti zivEna saha mOdatE||