sUryakavacam

yAjJavalkya uvAca

zRNuSva munizArdUla sUryasya kavacaM zubham|
zarIrArOgyadaM divyaM sarvasaubhAgyadAyakam||1||

dEdIpyamAnamukuTaM sphuranmakarakuNDalam|
dhyAtvA sahasrakiraNaM stOtramEtadudIrayEt||2||

zirO mE bhAskaraH pAtu lalATaM mE'mitadyutiH|
nEtrE dinamaNiH pAtu zravaNE vAsarEzvaraH||3||

ghrANaM gharmaghRNiH pAtu vadanaM vEdavAhanaH|
jihvAM mE mAnadaH pAtu kaNThaM mE suravanditaH||4||

skandhau prabhAkaraH pAtu vakSaH pAtu janapriyaH|
pAtu pAdau dvAdazAtmA sarvAGgaM sakalEzvaraH||5||

sUryarakSAtmakaM stOtraM likhitvA bhUrjapatrakE|
dadhAti yaH karE tasya vazagAH sarvasiddhayaH||6||

susnAtO yO japEtsamyagyO'dhItE svasthamAnasaH|
sa rOgamuktO dIrghAyuH sukhaM puSTiM ca vindati||7||

||iti zrI yAjJavalkyamuniviracitaM zrI sUryakavacastOtraM sampUrNam||