sUryamaNDala stOtram

namO'stu sUryAya sahasrarazmayE sahasrazAkhAnvitasambhavAtmanE|
sahasrayOgOdbhavabhAvabhAginE sahasrasaGkhyAyugadhAriNE namaH||

yanmaNDalaM dIptikaraM vizAlaM ratnaprabhaM tIvramanAdirUpam|
dAridryaduHkhakSayakAraNaM ca punAtu mAM tatsaviturvarENyam||1||

yanmaNDalaM dEvagaNaiH supUjitaM vipraiH stutaM bhAvanamuktikOvidam|
taM dEvadEvaM praNamAmi sUryaM punAtu mAM tatsaviturvarENyam||2||

yanmaNDalaM jJAnaghanaM tvagamyaM trailOkyapUjyaM triguNAtmarUpam|
samasta-tEjOmaya-divyarUpaM punAtu mAM tatsaviturvarENyam||3||

yanmaNDalaM gUDhamatiprabOdhaM dharmasya vRddhiM kurutE janAnAm|
yatsarvapApakSayakAraNaM ca punAtu mAM tatsaviturvarENyam||4||

yanmaNDalaM vyAdhivinAzadakSaM yadRgyajuHsAmasu sampragItam|
prakAzitaM yEna ca bhUrbhuvaH svaH punAtu mAM tatsaviturvarENyam||5||

yanmaNDalaM vEdavidO vadanti gAyanti yaccAraNa-siddhasaGghAH|
yadyOginO yOgajuSAM ca saGghAH punAtu mAM tatsaviturvarENyam||6||

yanmaNDalaM sarvajanaizca pUjitaM jyOtizca kuryAdiha martyalOkE|
yatkAlakAlAdyamanAdirUpaM punAtu mAM tatsaviturvarENyam||7||

yanmaNDalaM viSNucAturmukhAkhyaM yadakSaraM pApaharaM janAnAm|
yatkAlakalpakSayakAraNaM ca punAtu mAM tatsaviturvarENyam||8||

yanmaNDalaM vizvasRjaM prasiddhamutpatti-rakSA-pralaya-pragalbham|
yasmiJjagatsaMharatE'khilaM ca punAtu mAM tatsaviturvarENyam||9||

yanmaNDalaM sarvagatasya viSNOrAtmA paraM dhAma vizuddhatattvam|
sUkSmAntarairyOgapathAnugamyaM punAtu mAM tatsaviturvarENyam||10||

yanmaNDalaM vEdavidO vadanti gAyanti yaccAraNa-siddhasaGghAH|
yanmaNDalaM vEdavidaH smaranti punAtu mAM tatsaviturvarENyam||11||

yanmaNDalaM vEdavidOpagItaM yadyOginAM yOgapathAnugamyam|
tatsarvavEdyaM praNamAmi sUryaM punAtu mAM tatsaviturvarENyam||12||

sUryamaNDalasustOtraM yaH paThEt satataM naraH|
sarvapApavizuddhAtmA sUryalOkE mahIyatE||13||