vEGkaTEza prapattiH

IzAnAM jagatO'sya vEGkaTapatErviSNOH parAM prEyasIm
tadvakSaHsthala-nitya-vAsarasikAM tatkSAnti saMvardhinIm|
padmAlaGkRtapANipallavayugAM padmAsanasthAM zriyam
vAtsalyAdiguNOjjvalAM bhagavatIM vandE jaganmAtaram||1||

zrIman kRpAjalanidhE kRtasarvalOka
sarvajJa zakta natavatsala sarvazESin|
svAmin suzIla sulabhAzritapArijAta
zrIvEGkaTEza caraNau zaraNaM prapadyE||2||

AnUpurArpitasujAtasugandhipuSpa-
saurabhyasaurabhakarau samasannivEzau|
saumyau sadA'nubhavanE'pi navAnubhAvyau
zrIvEGkaTEza caraNau zaraNaM prapadyE||3||

sadyOvikAsisamuditvarasAndrarAga-
saurabhyanirbharasarOruhasAmyavArtAm|
samyakSu sAhasapadESu vilEkhayantau
zrIvEGkaTEza caraNau zaraNaM prapadyE||4||

rEkhAmayadhvajasudhAkalazAtapatra-
vajrAGkuzAmburuhakalpakazaGkhacakraiH|
bhavyairalaGkRtatalau paratattvacihnaiH
zrIvEGkaTEza caraNau zaraNaM prapadyE||5||

tAmrOdaradyutiparAjitapadmarAgau
bAhyairmahObhirabhibhUtamahEndranIlau|
udyannakhAMzubhirudastazazAGkabhAsau
zrIvEGkaTEza caraNau zaraNaM prapadyE||6||

saprEmabhIti kamalAkarapallavAbhyAm
saMvAhanE'pi sapadi klamamAdadhAnau|
kAntAvavAGmana-sagOcara-saukumAryau
zrIvEGkaTEza caraNau zaraNaM prapadyE||7||

lakSmImahItadanurUpanijAnubhAva-
nIlAdidivyamahiSIkarapallavAnAm|
AruNyasaGkramaNataH kila sAndrarAgau
zrIvEGkaTEza caraNau zaraNaM prapadyE||8||

nityAnamadvidhizivAdikirITakOTi-
pratyupta-dIpta-navaratna-mahaHprarOhaiH|
nIrAjanAvidhimudAramupAdadAnau
zrIvEGkaTEza caraNau zaraNaM prapadyE||9||

viSNOH padE parama ityutidaprazaMsau
yau madhva utsa iti bhOgyatayA'pyupAttau|
bhUyastathEti tava pANitalapradiSTau
zrIvEGkaTEza caraNau zaraNaM prapadyE||10||

pArthAya tatsadRza-sArathinA tvayaiva
yau darzitau svacaraNau zaraNaM vrajEti|
bhUyO'pi mahyamiha tau karadarzitau tE
zrIvEGkaTEza caraNau zaraNaM prapadyE||11||

manmUrdhni kAliyaphaNE vikaTATavISu
zrIvEGkaTAdrizikharE zirasi zrutInAm|
cittE'pyananyamanasAM samamAhitau tE
zrIvEGkaTEza caraNau zaraNaM prapadyE||12||

amlAnahRSyadavanItalakIrNapuSpau
zrIvEGkaTAdri-zikharAbharaNAyamAnau|
AnanditAkhila-manO-nayanau tavaitau
zrIvEGkaTEza caraNau zaraNaM prapadyE||13||

prAyaH prapanna-janatA-prathamAvagAhyau
mAtuH stanAviva zizOramRtAyamAnau|
prAptau parasparatulAmatulAntarau tE
zrIvEGkaTEza caraNau zaraNaM prapadyE||14||

sattvOttaraiH satata-sEvyapadAmbujEna
saMsAra-tAraka-dayArdra-dRgaJcalEna|
saumyau payantRmuninA mama darzitau tE
zrIvEGkaTEza caraNau zaraNaM prapadyE||15||

zrIza zriyA ghaTikayA tvadupAyabhAvE
prApyE tvayi svayamupEyatayA sphurantyA|
nityAzritAya niravadyaguNAya tubhyam
syAM kiGkarO vRSagirIza na jAtu mahyam||16||