From StotraSamhita

prahlAdastutiH

zrIprahlAda uvAca

brahmAdayaH suragaNA munayO'tha siddhAH sattvaikatAnagatayO vacasAM pravAhaiH| nArAdhituM puruguNairadhunApi pipruH kiM tOSTumarhati sa mE harirugrajAtEH||8||

manyE dhanAbhijanarUpatapaHzrutaujas tEjaHprabhAvabalapauruSabuddhiyOgAH| nArAdhanAya hi bhavanti parasya puMsO bhaktyA tutOSa bhagavAngajayUthapAya||9||

viprAddviSaDguNayutAdaravindanAbha pAdAravindavimukhAtzvapacaM variSTham| manyE tadarpitamanOvacanEhitArtha prANaM punAti sa kulaM na tu bhUrimAnaH||10||

naivAtmanaH prabhurayaM nijalAbhapUrNO mAnaM janAdaviduSaH karuNO vRNItE| yadyajjanO bhagavatE vidadhIta mAnaM taccAtmanE pratimukhasya yathA mukhazrIH||11||

tasmAdahaM vigataviklava Izvarasya sarvAtmanA mahi gRNAmi yathA manISam| nIcO'jayA guNavisargamanupraviSTaH pUyEta yEna hi pumAnanuvarNitEna||12||

sarvE hyamI vidhikarAstava sattvadhAmnO brahmAdayO vayamivEza na cOdvijantaH| kSEmAya bhUtaya utAtmasukhAya cAsya vikrIDitaM bhagavatO rucirAvatAraiH||13||

tadyaccha manyumasurazca hatastvayAdya mOdEta sAdhurapi vRzcikasarpahatyA| lOkAzca nirvRtimitAH pratiyanti sarvE rUpaM nRsiMha vibhayAya janAH smaranti||14||

nAhaM bibhEmyajita tE'tibhayAnakAsya jihvArkanEtrabhrukuTIrabhasOgradaMSTrAt| AntrasrajaHkSatajakEzarazaGkukarNAn nirhrAdabhItadigibhAdaribhinnakhAgrAt||15||

trastO'smyahaM kRpaNavatsala duHsahOgra saMsAracakrakadanAdgrasatAM praNItaH| baddhaH svakarmabhiruzattama tE'GghrimUlaM prItO'pavargazaraNaM hvayasE kadA nu||16||

yasmAtpriyApriyaviyOgasaMyOgajanma zOkAgninA sakalayOniSu dahyamAnaH| duHkhauSadhaM tadapi duHkhamataddhiyAhaM bhUmanbhramAmi vada mE tava dAsyayOgam||17||

sO'haM priyasya suhRdaH paradEvatAyA lIlAkathAstava nRsiMha viriJcagItAH| aJjastitarmyanugRNanguNavipramuktO durgANi tE padayugAlayahaMsasaGgaH||18||

bAlasya nEha zaraNaM pitarau nRsiMha nArtasya cAgadamudanvati majjatO nauH| taptasya tatpratividhirya ihAJjasESTas tAvadvibhO tanubhRtAM tvadupEkSitAnAm||19||

yasminyatO yarhi yEna ca yasya yasmAd yasmai yathA yaduta yastvaparaH parO vA| bhAvaH karOti vikarOti pRthaksvabhAvaH saJcOditastadakhilaM bhavataH svarUpam||20||

mAyA manaH sRjati karmamayaM balIyaH kAlEna cOditaguNAnumatEna puMsaH| chandOmayaM yadajayArpitaSODazAraM saMsAracakramaja kO'titarEttvadanyaH||21||

sa tvaM hi nityavijitAtmaguNaH svadhAmnA kAlO vazIkRtavisRjyavisargazaktiH| cakrE visRSTamajayEzvara SODazArE niSpIDyamAnamupakarSa vibhO prapannam||22||

dRSTA mayA divi vibhO'khiladhiSNyapAnAm AyuH zriyO vibhava icchati yAnjanO'yam| yE'smatpituH kupitahAsavijRmbhitabhrU visphUrjitEna lulitAH sa tu tE nirastaH||23||

tasmAdamUstanubhRtAmahamAziSO'jJa AyuH zriyaM vibhavamaindriyamAviriJcyAt| nEcchAmi tE vilulitAnuruvikramENa kAlAtmanOpanaya mAM nijabhRtyapArzvam||24||

kutrAziSaH zrutisukhA mRgatRSNirUpAH kvEdaM kalEvaramazESarujAM virOhaH| nirvidyatE na tu janO yadapIti vidvAn kAmAnalaM madhulavaiH zamayandurApaiH||25||

kvAhaM rajaHprabhava Iza tamO'dhikE'smin jAtaH surEtarakulE kva tavAnukampA| na brahmaNO na tu bhavasya na vai ramAyA yanmE'rpitaH zirasi padmakaraH prasAdaH||26||

naiSA parAvaramatirbhavatO nanu syAj jantOryathAtmasuhRdO jagatastathApi| saMsEvayA suratarOriva tE prasAdaH sEvAnurUpamudayO na parAvaratvam||27||

EvaM janaM nipatitaM prabhavAhikUpE kAmAbhikAmamanu yaH prapatanprasaGgAt| kRtvAtmasAtsurarSiNA bhagavangRhItaH sO'haM kathaM nu visRjE tava bhRtyasEvAm||28||

matprANarakSaNamananta piturvadhazca manyE svabhRtyaRSivAkyamRtaM vidhAtum| khaDgaM pragRhya yadavOcadasadvidhitsus tvAmIzvarO madaparO'vatu kaM harAmi||29||

EkastvamEva jagadEtamamuSya yattvam AdyantayOH pRthagavasyasi madhyatazca| sRSTvA guNavyatikaraM nijamAyayEdaM nAnEva tairavasitastadanupraviSTaH||30||

tvamvA idaM sadasadIza bhavAMstatO'nyO mAyA yadAtmaparabuddhiriyaM hyapArthA| yadyasya janma nidhanaM sthitirIkSaNaM ca tadvaitadEva vasukAlavadaSTitarvOH||31||

nyasyEdamAtmani jagadvilayAmbumadhyE zESEtmanA nijasukhAnubhavO nirIhaH| yOgEna mIlitadRgAtmanipItanidras turyE sthitO na tu tamO na guNAMzca yuGkSE||32||

tasyaiva tE vapuridaM nijakAlazaktyA saJcOditaprakRtidharmaNa AtmagUDham| ambhasyanantazayanAdviramatsamAdhEr nAbhErabhUtsvakaNikAvaTavanmahAbjam||33||

tatsambhavaH kaviratO'nyadapazyamAnas tvAM bIjamAtmani tataM sa bahirvicintya| nAvindadabdazatamapsu nimajjamAnO jAtE'GkurE kathamuhOpalabhEta bIjam||34||

sa tvAtmayOnirativismita AzritO'bjaM kAlEna tIvratapasA parizuddhabhAvaH| tvAmAtmanIza bhuvi gandhamivAtisUkSmaM bhUtEndriyAzayamayE vitataM dadarza||35||

EvaM sahasravadanAGghriziraHkarOru nAsAdyakarNanayanAbharaNAyudhADhyam| mAyAmayaM sadupalakSitasannivEzaM dRSTvA mahApuruSamApa mudaM viriJcaH||36||

tasmai bhavAnhayazirastanuvaM hi bibhrad vEdadruhAvatibalau madhukaiTabhAkhyau| hatvAnayacchrutigaNAMzca rajastamazca sattvaM tava priyatamAM tanumAmananti||37||

itthaM nRtiryagRSidEvajhaSAvatArair lOkAnvibhAvayasi haMsi jagatpratIpAn| dharmaM mahApuruSa pAsi yugAnuvRttaM channaH kalau yadabhavastriyugO'tha sa tvam||38||

naitanmanastava kathAsu vikuNThanAtha samprIyatE duritaduSTamasAdhu tIvram| kAmAturaM harSazOkabhayaiSaNArtaM tasminkathaM tava gatiM vimRzAmi dInaH||39||

jihvaikatO'cyuta vikarSati mAvitRptA ziznO'nyatastvagudaraM zravaNaM kutazcit| ghrANO'nyatazcapaladRkkva ca karmazaktir bahvyaH sapatnya iva gEhapatiM lunanti||40||

EvaM svakarmapatitaM bhavavaitaraNyAm anyOnyajanmamaraNAzanabhItabhItam| pazyanjanaM svaparavigrahavairamaitraM hantEti pAracara pIpRhi mUDhamadya||41||

kO nvatra tE'khilagurO bhagavanprayAsa uttAraNE'sya bhavasambhavalOpahEtOH| mUDhESu vai mahadanugraha ArtabandhO kiM tEna tE priyajanAnanusEvatAM naH||42||

naivOdvijE para duratyayavaitaraNyAs tvadvIryagAyanamahAmRtamagnacittaH| zOcE tatO vimukhacEtasa indriyArtha mAyAsukhAya bharamudvahatO vimUDhAn||43||

prAyENa dEva munayaH svavimuktikAmA maunaM caranti vijanE na parArthaniSThAH| naitAnvihAya kRpaNAnvimumukSa EkO nAnyaM tvadasya zaraNaM bhramatO'nupazyE||44||

yanmaithunAdigRhamEdhisukhaM hi tucchaM kaNDUyanEna karayOriva duHkhaduHkham| tRpyanti nEha kRpaNA bahuduHkhabhAjaH kaNDUtivanmanasijaM viSahEta dhIraH||45||

maunavratazrutatapO'dhyayanasvadharma vyAkhyArahOjapasamAdhaya ApavargyAH| prAyaH paraM puruSa tE tvajitEndriyANAM vArtA bhavantyuta na vAtra tu dAmbhikAnAm||46||

rUpE imE sadasatI tava vEdasRSTE bIjAGkurAviva na cAnyadarUpakasya| yuktAH samakSamubhayatra vicakSantE tvAM yOgEna vahnimiva dAruSu nAnyataH syAt||47||

tvaM vAyuragniravanirviyadambu mAtrAH prANEndriyANi hRdayaM cidanugrahazca| sarvaM tvamEva saguNO viguNazca bhUman nAnyattvadastyapi manOvacasA niruktam||48||

naitE guNA na guNinO mahadAdayO yE sarvE manaH prabhRtayaH sahadEvamartyAH| Adyantavanta urugAya vidanti hi tvAm EvaM vimRzya sudhiyO viramanti zabdAt||49||

tattE'rhattama namaH stutikarmapUjAH karma smRtizcaraNayOH zravaNaM kathAyAm| saMsEvayA tvayi vinEti SaDaGgayA kiM bhaktiM janaH paramahaMsagatau labhEta||50||

||iti zrImadbhAgavatE mahApurANE pAramahaMsyAM saMhitAyAM saptamaskandhE navamE'dhyAyE zrI prahlAdakRta nRsiMhastutiH sampUrNaH||