paJcama-dazakam -- virAT puruSOtpattiH

vyaktAvyaktamidaM na kiJcidabhavatprAkprAkRtaprakzayE
mAyAyAm guNasAmyaruddhavikRutau tvayyAgatAyAM layam|
nO mRtyuzca tadAmRtaM ca samabhUnnAhnO na rAtrEH sthiti-
statraikastvamaziSyathAH kila parAnandaprakAzAtmanA||1||

kAlaH karmaguNAzca jIvanivahA vizvaM ca kAryaM vibhOH
cillIlAratimEyuSi tvayi tadA nirlInatAmAyayuH|
tESAM naiva vadantyasatvamayi bhO zaktyAtmanA tiSTatAm
nO cEt kiM gaganaprasUnasadRuzAM bhUyO bhavEtsaMbhavaH||2||

EvaM ca dviparArdhakAlavigatAvIkzAM sisRkzAtmikAm
vibhrANE tvayi cukzubhE tribhuvanIbhAvAya mAyA svayam|
mAyAtaH khalu kAlazaktirakhilAdRSTAM svabhAvO'pi ca
prAdurbhUya guNAnvikAsya vidadhustasyAsyAssahAyakriyAm||3||

mAyAsannihitO'praviSTavapuSA sAkzIti gItO bhavAn
bhEdaistAM pratibiMbatO vivizivAn jIvO'pi naivAparaH|
kAlAdipratibOdhitA'tha bhavatA saJcOditA ca svayam
mAyA sa khalu buddhitatvamasRjadyO'sau mahAnucyatE||4||

tatrAsau triguNAtmakO'pi ca mahAn satvapradhAnaH svayam
jIvE'smin khalu nirvikalpamahamityudbOdhaniSpAdakaH|
cakrE'smin savikalpabOdhakamahantatvaM mahAn khalvasau
sampuSTaM triguNaistamO'tibahulaM viSNO bhavatprEraNAt||5||

sO'haM ca triguNakramAt trividhatAmAsAdya vaikArikO
bhUyastaijasatAmasAviti bhavannAdyEna satvAtmanA|
dEvAnindriyamAninO'kRta dizAvAtArkapAzyazvinO
vahnIndrAcyutamitrakAn vidhuvidhizrIrudrazArIrakAn||6||

bhUmanmAnasabhuddhyahaGkRtimiLaccittAkhyavRtyanvitam
taccAntaHkaraNaM vibhO tava balAt satvAMza EvAsRjat|
jAtastaijasatO dazEndriyagaNastattAmasAMzAtpuna-
stanmAtraM nabhasO marutpurapatE zabdO'jani tvadbalAt||7||

zabdAd{}vyOma tataH sasarjitha vibhO sparzaM tatO mArutam
tasmAdrUpamatO mahO'tha ca rasaM tOyaM ca gandhaM mahIm|
Evam mAdhava pUrvapUrvakalanAdAdyAdyadharmAnvitam
bhUtagrAmamimaM tvamEva bhagavan prAkAzayastAmasAt||8||

EtE bhUtagaNAstathEndriyagaNA dEvAzca jAtA pRthaG-
nO zEkurbhuvanANDanirmitividhau dEvairamIbhistadA|
tvaM nAnAvidhasUktibhirnutaguNastatvAnyamUnyAvizaM-
zcESTAzaktimudIrya tAni ghaTayan hairaNyamaNDaM vyadhAH||9||

aNDaM tatkhalu pUrvasRSTasalilE'tiSThat sahasraM samAH
nirbhindannakRthAzcaturdazajagadrUpaM virADAhvayam|
sAhasraiH karapAdamUrdhanivahairnizzESajIvAtmakO
nirbhAtO'si marutpurAdhipa sa mAM trAyasva sarvAmayAt||10||