SaNNavatitama-dazakam -- bhagavadvibhUtayaH

tvaM hi brahmaiva sAkShAt paramurumahimannakSharANAmakAra\-
stArO mantrEShu rAjJAM manurasi muniShu tvaM bhRgurnAradO'pi|
prahlAdO dAnavAnAM pazuShu cha surabhiH pakShiNAM vainatEyO
nAgAnAmasyanantaH surasaridapi cha srOtasAM vizvamUrtE||1||

brahmaNyAnAM balistvaM kratuShu cha japayajJO'sO vIrEShu pArthO
bhaktAnAmuddhavastvaM balamasi balinAM dhAma tEjasvinAM tvam|
nAstyantastvadvibhUtErvikasadatizayaM vastu sarvaM tvamEva
tvaM jIvastvaM pradhAnaM yadiha bhavadRtE tanna kiJchitprapaJchE||2||

dharmaM varNAzramANAM zrutipathavihitaM tvatparatvEna bhaktyA
kurvantO'ntarvirAgE vikasati zanakaissantyajantO labhantE|
sattAsphUrtipriyatvAtmakamakhilapadArthEShu bhinnEShvabhinnam
nirmUlaM vizvamUlaM paramamahamiti tvadvibOdhaM vizuddham||3||

jJAnaM karmApi bhaktistritayamiha bhavatprApakaM tatra tAva\-
nnirviNNAnAmazEShE viShaya iha bhavEt jJAnayOgE'dhikAraH|
saktAnAM karmayOgastvayi hi vinihitO yE tu nAtyantasaktA
nApyatyantaM viraktAstvayi cha dhRtarasA bhaktiyOgO hyamIShAm||4||

jJAnaM tvadbhaktatAM vA laghu sukRtavazAnmartyalOkE labhantE
tasmAttatraiva janma spRhayati bhagavan nAkagO nArakO vA|
AviShTaM mAM tu daivAdbhavajalanidhipOtAyitE martyadEhE
tvaM kRtvA karNadhAraM gurumanuguNavAtAyitastArayEthAH||5||

avyaktaM mArgayantaH zrutibhirapi nayaiH kEvalajJAnalubdhAH
klizyantE'tIva siddhiM bahutarajanuShAmanta EvApnuvanti|
dUrasthaH karmayOgO'pi cha paramaphalE nanvayaM bhaktiyOga\-
stvAmUlAdEva hRdyastvaritamayi bhavatprApakO vardhatAM mE||6||

jJAnAyaivAtiyatnaM munirapavadatE brahmatattvaM tu zruNvan
gADhaM tvatpAdabhaktiM zaraNamayati yastasya muktiH karAgrE|
tvaddhyAnE'pIha tulyA punarasukaratA chittachAJchalyahEtO\-
rabhyAsAdAzu zakyaM vazayituM tvatkRpAchArutAbhyAm||7||

nirviNNaH karmamArgE khalu viShamatamE tvatkathAdau cha gADham
jAtazraddhO'pi kAmAnayi bhuvanapatE naiva zaknOmi hAtum|
tadbhUyO nizchayEna tvayi nihitamanA dOShabuddhyA bhajaMstAn
puShNIyAM bhaktimEva tvayi hRdayagatE maGkShu naGkShyanti saGgAH||8||

kazchitklEzArjitArthakShayavimalamatirnudyamAnO janaudhaiH
prAgEvaM prAhi viprO na khalu mama janaH kAlakarmagrahA vA|
chEtO mE duHkhahEtustadiha guNagaNaM bhAvayatsarvakArI\-
tyuktvA zAntO gatastvAM mama cha kuru vibhO tAdRzIM chittazAntim||9||

aiLaH prAgurvazIM pratyativivazamanAH sEvamAnazchiraM tAm
gADhaM nirvidya bhUyO yuvatisukhamidaM kShudramEvEti gAyan|
tvadbhaktiM prApya pUrNaH sukhataramacharattadvaduddhUta saGgam
bhaktOttaMsaM kriyA mAM pavanapurapatE hanta mE rundhirOgAn||10||