dwAviMza-dazakam -- ajAmiLamOkSaH

ajAmiLO nAma mahIsuraH purA caranvibhO dharma pathAn gRhAzramI|
gurOrgirA kAnanamEtya dRSTavAnsughRSTazIlAM kulaTAM madAkulAm||1||

svataH prazAntO'pi tadAhRtAzayaH svadharmamutsRjya tayA samAraman|
adharmakArI dazamI bhavanpunardadhau bhavannAmayutE sutE ratim||2||

sa mRtyukAlE yamarAjakiGkarAn bhayaGkarAMstrInabhilakSayanbhiyA|
purA manAk{}tvatsmRtivAsanAbalAjjuhAva nArAyaNanAmakaM sutam||3||

durAzayasyApi tadAtvanirgatatvadIyanAmAkSaramAtravaibhavAt|
purO'bhipEturbhavadIyapArSadAzcaturbhujAH pItapaTA manOramAH||4||

amuM ca saMpAzya vikarSatO bhatAn vimuJcatEtyArurudhurbalAdamI|
nivAritAstE ca bhavajjanaistadA tadIyapApaM nikhilaM nyavEdayan||5||

bhavantu pApAni kathaM tu niSkRtE kRtE'pi bhO daNDanamasti paNditAH|
na niSkRtiH kiIM viditA bhavAdRzAmiti prabhO tvatpuruSA babhASirE||6||

zrutismRtibhyAM vihitA vratAdayaH punanti pApaM na lunanti vAsanAm|
anantasEvA tu nikRntati dvayImiti prabhO tvatpuruSA babhASirE||7||

anEna bhO janmasahasrakOTibhiH kRtESu pApESvapi niSkRtiH kRtA|
tadagrahInnAma bhayAkulO harEriti prabhO tvatpuruSA babhASirE||8||

nRNAmabuddhyApi mukundakIrtanaM dahatyaghaughAnmahimAsya tAdRzaH|
yathAgnirEdhAMsi yathauSadhaM gadAniti prabhO tvatpuruSA babhASirE||9||

itIritairyAmyabhaTairapAsRtE bhavadbhaTAnAM ca gaNE tirOhitE|
bhavatsmRtiM kaJcana kAlamAcaranbhavatpadaM prApi bhavadbhaTairasau||10||

svakiGgarAvEdanazaGkitO yamastvadaGghribhaktESu na gamyatAmiti|
svakIyabhRtyAnazizikSaduccakaiH sa dEva vAtAlaya pAhi mAm||11||