saptAzItitama-dazakam -- kucEla-vRttAntaH

kuchElanAmA bhavataH satIrthyatAM gataH sa sAndIpanimandirE dvijaH|
tvadEkarAgENa dhanAdiniHspRhO dinAni ninyE prazamI gRhAzramI||1||

samAnazIlA'pi tadIyavallabhA tathaiva nO chittajayaM samEyuShI|
kadAchidUchE bata vRttilabdhayE ramApatiH kiM na sakhA niShEvyatE||2||

itIritO'yaM priyayA kShudhArtayA jugupsamAnO'pi dhanE madAvahE|
tadA tvadAlOkanakautukAdyayau vahanpaTAntE pRthukAnupAyanam||3||

gatO'yamAzcharyamayIM bhavatpUrIM gRhEShu zaibyAbhavanaM samEyivAn|
pravizya vaikuNThamivApa nirvRtiM tavAtisambhAvanayA tu kiM punaH||4||

prapUjitaM taM priyayA cha vIjitaM karE gRhItvA'kathayaH purA kRtam|
yadindhanArthaM gurudArachOditairapartuvarShaM tadamarShi kAnanE||5||

trapAjuShO'smAtpRthukaM balAdatha pragRhya muShTau sakRdAzitE tvayA|
kRtaM kRtaM nanviyatEti sambhramAdramA kilOpEtya karaM rurOdha tE||6||

bhaktEShu bhaktEna sa mAnitastvayA purIM vasannEkanizAM mahAsukham|
batAparEdyurdraviNaM vinA yayau vichitrarUpastava khalvanugrahaH||7||

yadi hyayachiShyamadAsyadachyutO vadAmi bhAryAM kimiti vrajannasau|
tvaduktilIlAsmitamagnadhIH punaH kramAdapazyanmaNidIpramAlayam||8||

kiM mArgavibhraMza iti bhramankShaNaM gRhaM praviShTaH sa dadarza vallabhAm|
sakhIparItAM maNihEmabhUShitAM bubOdha cha tvatkaruNAM mahAdbhutAm||9||

sa ratnazAlAsu vasannapi svayaM samunnamadbhaktibharO'mRtaM yayau|
tvamEvamApUritabhaktavAJChitO marutpurAdhIza harasva mE gadAn||10||